खेलभित्र झेल
राखेपको नेतृत्वमा हुँदा ओलम्पिकलाई गाली गर्ने र त्यहाँ पुगेपछि राखेपलाई सत्तोसराप गर्ने नेपाली खेलकुदको रोग नै हो ।
मतदाता संख्या २७ । १९ पदमा २६ जनाको उम्मेदवारी । नेपाल ओलम्पिक कमिटी (एनओसी) को २० भदौमा हुने निर्वाचनको राप र ताप बुझ्न यिनै आँकडा पर्याप्त छ । दुई कार्यकाल अध्यक्ष भइसकेका ध्रुवबहादुर प्रधान विधानतः कुनै पनि पदमा उठ्न नपाउने भएकाले मात्रै निर्वाचनको रिङबाहिर पुगेका हुन् । नत्र कमिटीमा २७ मा २७ नै उम्मेदवार हुने स्थिति बन्न सक्थ्यो ।
एनओसीमा आबद्ध २७ राष्ट्रिय खेल संघका एक–एक प्रतिनिधिसँग मताधिकार रहन्छ । अध्यक्षसँगै ५ उपाध्यक्ष, महासचिव, सह–महासचिव, ३ सचिव, कोषाध्यक्ष र ७ सदस्य गरी एनओसीमा १९ सदस्यीय कार्यसमिति रहन्छ । २० साउनको विशेष साधारणसभाले उपाध्यक्ष र सचिव पद मात्र थपेन, मानार्थ अध्यक्ष र उपाध्यक्षको परिकल्पना पनि गरेको छ ।
दुई कार्यकाल महासचिव रहेका जीवनराम श्रेष्ठ ४ वर्षअघि एनओसीको अध्यक्ष चुनिए । अध्यक्ष भएलगत्तै उनले स्की संघ गठन गरेर आफैँ अध्यक्ष बने । एनओसी अध्यक्षका रुपमा हुने वैदेशिक भ्रमण, त्यस दौरान पाइने आतिथ्य र अन्तर्राष्ट्रिय सम्बन्धमा पुग्ने मलजलको स्वाद चाखिसकेका काठमाडौँ–८ का नेकपाका सांसद जीवनराम अध्यक्षको एक कार्यकाल थप्ने मुडमा छन् ।
अध्यक्षका अर्का प्रत्यासी उमेशलाल श्रेष्ठ पनि व्यावसायिक हिसाबले हेभिवेट हुन् । ४ वर्षअघि जीवनरामसँग अध्यक्षमा पराजित उनी त्यसको बदला लिने सुरमा छन् ।
क्वेस्ट फर्मास्युटिकल्स संस्थापकमध्येका एक उनी उद्योग वाणिज्य महासंघका उपाध्यक्ष हुन् । नेपाल कम्युनिस्ट पार्टीका संस्थापक पुष्पलाल श्रेष्ठ र सहाना प्रधानका छोरा उमेशलाल यसअघि एनओसीमा दुई कार्यकाल उपाध्यक्ष रहिसकेका छन् । नेकपाको संस्थापन निकट उनी भन्छन्, “यस पटक तयारी राम्रै गरेर आएको छु ।”
राखेपको नेतृत्वमा हुँदा ओलम्पिकलाई गाली गर्ने र त्यहाँ पुगेपछि राखेपलाई सत्तोसराप गर्ने नेपाली खेलकुदको रोग नै हो । तर अचम्मलाग्दो तथ्य, तिनै व्यक्ति जस्केलाबाट भए पनि ओलम्पिक कमिटी छिर्ने छिर्के दाउ खोजिरहेका हुन्छन् ।
यस पटक राखेप उपाध्यक्ष पीताम्बर तिम्सिना एनओसीको उपमहासचिवमा निर्विरोध भए । एथ्लेटिक्स संघबाट प्रतिनिधि बनेका तिम्सिनालाई चुनौती दिने कोही निस्केनन् । वर्तमान कोषाध्यक्ष रतन टण्डन पनि सोही पदमा निर्विरोध भए । एनओसीको विधानअनुसार पहिलो पटक साधारणसभामा भाग लिनेले सदस्य, उप–महासचिव र सचिवमा मात्रै उम्मेदवारी दिन पाउँछन् । एथ्लेटिक्स संघका अध्यक्ष राजीव शाहले आफ्नो नाम फिर्ता लिएर अन्तिम समय तिम्सिनाको नाम प्रतिनिधिका रुपमा पठाएका हुन् । संघको साधारणसभा गर्न र चितवनमा भएको सीमित जिल्ला प्रतिनिधि सहभागी साधारणसभालाई वैधानिकता दिन तिम्सिनाले खेलेको भूमिकाको बदलामा शाहले उनलाई ओलम्पिक कमिटीमा एथ्लेटिक्स संघको प्रतिनिधिको गुन लगाएका हुन् ।
राखेप सदस्यसचिवको कार्यकाल ९ असारमा मात्रै सकाएका केशवकुमार विष्ट पनि सचिवका उम्मेदवार छन् । विष्ट तिनै व्यक्ति हुन्, जसले उसु संघमा हस्तक्षेप गरी नेपाल उसु फेडेरेसन स्थापना गरे । तर सचिवमा उम्मेदवार बन्न उनले उसु संघकै सहारा लिएका छन् ।
सदस्यसचिव रहँदा खेल संघलाई नियन्त्रणमा राख्न सफल हुनेहरुलाई ओलम्पिक यात्रा सहज हुन्छ । खेल संघहरु राखेपमा दर्ता हुनुपर्छ । कार्यक्रम सञ्चालनमा पनि सरकारी अनुदान, सहयोग चाहिन्छ । यसैको फाइदा उठाउँछन्, त्यहाँका नेतृत्वले । कमिटी छिर्न खेल अधिकारीहरु लालायित रहेको अर्को उदाहरण बक्सिङ संघका पूर्वअध्यक्ष राजीव श्रेष्ठ हुन् ।
एनओसीका उप–महासचिव श्रेष्ठले यस पटक र्याफ्टिङ तथा क्यानोइङ संघमार्फत ओलम्पिकको प्रतिनिधित्व हात पारे । बक्सिङ संघबाट अध्यक्ष राम अवाले नै प्रतिनिधि भएपछि उपाध्यक्षको उम्मेदवार बन्न उनले जस्केलो प्रयोग गरे । मुस्लिम आयोगका अध्यक्ष समीम मियाँ अन्सारी पनि उपाध्यक्षको उम्मेदवार बनेका छन् । संवैधानिक आयोगका अध्यक्षजस्तो व्यक्तिलाई ओलम्पिक–मोह किन भयो ? बुझिनसक्नु छ ।
सम्बन्धित
कोभिड १९ पछि नेपाली खेलकुदलाई पुरानै लयमा फर्काउने चुनौती ...
खेलकुदमा वर्ष ०७६ लाई फर्केर हेर्दा
१ सय २४ वर्षभन्दा लामो इतिहास बोकेको आधुनिक ओलम्पिकमा प्रतियोगिता स्थगित भएको यो दोस्रो घट...
कोरोना संक्रमणको असरले खेल गतिविधिमा कस्तो असर ?
दुई महान् पिताका पुत्रहरू पनि फुटबलप्रति उति नै रुचि राख्ने भएका छन् । रोनाल्डोका छोरा क्र...
रोनाल्डोका छोराका आदर्श मेसी, मेसीका छोरा रोनाल्डोका प्रशंसक
नेपालको थाइल्यान्ड यात्रा नमीठो सम्झना...
एसिया कप खेल्ने सपनामा यसरी लाग्यो तगारो
एक महिना महत्त्वपूर्ण प्रतियोगिता खेल्न नसक्ने स्थितिमा नेपाल ...
महिला भलिबलका तीन हस्ती नै चोटग्रस्त
आर्मीको खेल साँच्चै नै उम्दा थियो, यो सिजनको लिगमा । डिफेन्स र गोलरक्षणमा निकै बलियो । आर्...