राम्री देखिनुपर्ने दबाब
मनोरञ्जनको दुनियाँमा फेसन अपरिहार्य छ । देखाउने दुनियाँ भएकाले होला, जसले सुन्दर रूपमा प्रस्तुत गर्न सक्छ, उसैले वाहवाही पाउँछ ।
मनोरञ्जनको दुनियाँमा फेसन अपरिहार्य छ । देखाउने दुनियाँ भएकाले होला, जसले सुन्दर रूपमा प्रस्तुत गर्न सक्छ, उसैले वाहवाही पाउँछ । सुन्दरताको व्यापार कहिल्यै फेल खाँदैन । राम्रो देखिन को चाहँदैन ? यस्तै, फेसनलाई चुनौती दिएकी थिइन्, अमेरिकी पपगायिका लेडी गागाले । ग्रामीजस्ता ठूल्ठूला अवार्ड समारोह र मेट गालाजस्तो र्याम्पवाकमा उनले चुनौती दिँदै फरक पहिरन लगाइन् । पहिरनले महिलालाई अत्यन्तै सुन्दरी देखाउनुपर्ने पूर्ववत् सर्त लत्याएर गागाले मासुको पहिरन लगाइन् । सन् २०१० को एमटीभी भीएमए समारोहमा उनले उक्त पहिरन समलिंगीको अधिकारका लागि सरकारको नीतिको आलोचना गर्न लगाएको बताइन् ।
महिला भन्नेबित्तिकै सुन्दर देखिनुपर्छ भन्नेका लागि लेडी गागाको यो ठूलो झापड थियो । उनले पहिरनमा गर्ने भिन्नभिन्न प्रयोगले फेसनलाई 'युनिक' रूपमा स्वीकार्न सञ्चार माध्यम बाध्य बन्यो । तर अझै पनि अमेरिकी मनोरञ्जन उद्योगमा उत्कृष्ट र खराब पहिरनको भोटिङ हुन्छ । मतका आधारमा नराम्रो पहिरनमा परेका कलाकार तथा मोडललाई मिडियाले उछितो काड्छ भने सामाजिक सञ्जालमा ट्रोल पनि उत्तिकै । गायिका गागाले दिएजस्तो झापड अन्य देशका मनोरञ्जनमा काम गर्नेहरूले लगाउन सकेका छन् त ?
मनोरञ्जनको दुनियाँमा अधिकांश युवकयुवतीको आसक्ति नै काफी छ, यो बताउन । चाहे स-साना सहरबाट काठमाडौँमा आउने भीड या भनौँ धनाढ्य खान्दानी परिवारबाट आउने युवा । विराटनगरबाट नायिका बन्ने सपना बुनेर आएकी रेखा थापा होऊन् या राजा सुरेन्द्रकी सन्तति साम्राज्ञीराज्यलक्ष्मी शाह, मनोरञ्जनले सबैलाई लोभ्याएको छ । नाम र दामको लोभमा युवा जमात मनोरञ्जन उद्योगमा आकषिर्त देखिन्छ । यो उद्योगमा प्रख्यात भएपछि मात्र दाम र नाम कमाइन्छ भनिए पनि सुरुआती दिन त्यति सहज छैन । पछिल्लो समयका सामाजिक सञ्जाल फेसबुक, ट्वीटर, इन्स्टाग्राम र युट्युबजस्ता अनलाइन साइटले मनोरञ्जनको दुनियाँमा काम गर्ने कलाकार र मोडललाई चर्चा कमाउन सहयोग त गरेको छ । तर तनाव पनि उत्तिकै दिइरहेको छ । हरेकपल्ट नयाँ पहिरन, नयाँ जुत्ता तथा गरगहनामा देखिरहनु सम्भव छैन । सामाजिक सञ्जालले चुनौती झन् थपेको छ । फेरि संसारमै विडम्बना छ, महिलाको पारिश्रमिक जुनै क्षेत्रमा पनि पुरुषको तुलनामा थोरै छ । राम्रो देखिने दबाब पनि महिलालाई नै छ ।
तस्बिर सौजन्य : ऋचा शर्मा
नेपालको मनोरञ्जन क्षेत्र त्यस्तो फराकिलो पनि छैन, जसरी भारतमा फैलिएको छ । त्यहाँ टीभीमै काम गर्ने कलाकारले हिट भएपछि प्रतिसिरिज भारतीय रुपैयाँ डेढ लाखसम्म पाउँछन् । तर नेपाली उद्योग त्यस्तो छैन । थोरै आम्दानीमा सधैँ टिपटप भएर हिँड्न नसकिने बताउँछिन्, अभिनेत्री ऋचा शर्मा, ३२ । ०६६ सालमा फस्ट लभबाट चलचित्र उद्योगमा आएकी ऋचाका अनुसार आम्दानी हेरी खर्च गर्नुपर्छ । भन्छिन्, "हामीसँग त्यस्तो धेरै पैसा छैन, सधैँ फेरी-फेरी नयाँ लगाएर हिँड्न सकियोस् । ठाउँअनुसार विशेष पहिरन लगाउनुपर्छ । तर हरेक दिन नयाँ सम्भव छैन ।"
ऋचाका अनुसार फेसन ट्रेन्डमा रमाउने कलाकार टन्नै छन् । साम्राज्ञी, स्वस्तिमा खड्का र पि्रयंका कार्की ऋचालाई फेसेनेवल लाग्छन् । तर फेसनलाई आफू भने प्राथमिकतामा राख्दिनन् । सामाजिक सञ्जालको जमाना र 'शो बिजनेस' मा काम गर्ने भएकाले प्रस्तुतिमा ध्यान दिन जरुरी भएको ऋचा बताउँछिन् । भन्छिन्, "म ठीक, उचित र राम्रो देखिनुपर्छ । त्यसमा मात्र हो, मैले ध्यान दिने ।"
आफूले मिडियामा काम गर्दा संक्रमणकालीन समय भएकाले उति समस्या नपरेको ऋचाले सुनाइन् । परम्परागत पहिरनका लागि ६/७ वटा बुटिकले उनलाई सहयोग गरेका छन् । सपिङका लागि अझै न्युरोड नै जान्छिन् । भएकै कपडा मिलाएर लगाउन जान्नु कला भएको उनी मान्छिन् । उनीसँग जिन्सको भेराइटी छ । पहिरन दोहोर्याएर पनि लगाउँछिन् । भन्छिन्, "कुनै कपडा यति आरामदायी हुन्छन्, त्यही मात्र लगाउन मन पर्छ ।"
अभिनेत्री स्वस्तिमा खड्का, २४, लाई चलचित्रजस्तै पहिरन र प्रस्तुतिमा प्रयोग गरिरहन मन पर्छ । तर अरूलाई देखाउनकै लागि फेसन गर्न मन लाग्दैन । भन्छिन्, "मैले कहिल्यै दबाब महसुस गरिनँ । सबैलाई देखाउन जरुरी छैन् । आफूलाई मन परेको, सुहाउने पहिरन लगाउने हो ।"
सृष्टि खड्का
सार्क फिल्म फेस्टिभलमा बुलबुलका लागि विशेष जुरी अवार्ड पाएकी स्वस्तिमाका अनुसार चलचित्र क्षेत्रमा अधिकांश कलाकारका आफ्नै डिजाइनर छन् । विशेष कार्यक्रमका लागि अन्य डिजाइनरका कपडा लगाइन्छ । भन्छिन्, "उनीहरूको कामको पनि प्रमोसन हुने अनि हाम्रो आवश्यकता पनि टर्ने । त्यसैले अन्य डिजाइनरको कपडा लगाउँछौँ ।" नेपाली डिजाइनर पनि अन्तर्राष्ट्रिय स्तरका हुँदै गएको स्वस्तिमाको बुझाइ छ । भन्छिन्, "सार्कमा र अन्य अन्तर्राष्ट्रिय क्षेत्र हेर्दा नेपाली डिजाइनर कम छैनन् ।"
गुगलमा फेसन ह्याक भनेर टाइप गर्यो भने दर्जनौँ भिडियो र समाचारका साइट भेटिन्छन् । यी भिडियो र साइटले एउटै कपडा, जुत्ता र गरगहनालाई कसरी फरक-फरक तरिकाले लगाएर प्रत्येक पटक नयाँ देखाउने भनेर सिकाउँछन् । फेसन ह्याक महिला फेसनपारखीमाझ प्रख्यात छ । फेसन ह्याकजस्तै अभिलाषा शर्मा एउटै कपडालाई कहिले टिसर्ट त कहिले वनपिसका रूपमा लगाएको बताउँछिन् । भन्छिन्, "पहिरन लगाउन जान्नुपर्छ । एउटै कपडालाई पनि फरक-फरक शैलीले लगाउन सकिन्छ ।"
र्यापर निर्णय एनएसकेको गीतबाट म्युजिक भिडियोमा डेब्यु गरेकी अभिलाषा हिमालय कलेज अफ इन्जिनियरिङबाट ब्याचलर्स अफ इन्जिनियरिङ गर्दै छिन् । पढाइका कारण पनि इभेन्टमा जान समय हुँदैन । फुर्सद निकालेर म्युजिक भिडियो र र्याम्पवाक गर्ने भएकाले सपिङ जान समय कम हुने उनी बताउँछिन् । भन्छिन्, "कुनै इभेन्टमा जानैपरे र भनेकै कपडा नभए बुटिकको सहयोग लिने गरेकी छु ।" उनी सपिङ आफ्नै पैसाले गर्छिन् । अस्ट्रेलियाबाट बाआमाले पहिरन, जुत्ता र गरगहना पठाइदिने कारणले पनि उनलाई केही सहज हुने गरेको छ ।
बेलायत, थाइल्यान्ड घुम्न जाँदा एकैपल्ट थुप्रै पहिरन किनेर ल्याउँछिन्, मोडल सृष्टि खड्का, २२ । उनलाई भने बुटिकको ड्रेस लगाउन खासै मन पर्दैन । भन्छिन्, "मलाई एलर्जी हुन्छ, त्यही भएर पनि लगाउँदिनँ ।"
अभिलाषा शर्मा
प्रायः आफ्नै पहिरन लगाउने सृष्टिका मोडलिङ क्षेत्रमा थोरै मात्र साथी छन् । इन्स्टाग्राममा देखाउनकै लागि नयाँ-नयाँ फोटा राख्ने, सस्तो सामान किने पनि ब्रान्डको हो भनेर गफ दिने व्यक्ति उनलाई मन पर्दैनन् । भन्छिन्, "शोअफ गर्ने धेरै छन्, त्यही भएर साथी बन्न सक्दिनँ ।"
हरेक दिन बाहिर निस्कन सृष्टि प्रायः जिन्सका आउटफिट लगाउँछिन् । एउटै पहिरन दोहोर्याएर लगाउन रुचाउँदिनन् । ३ वर्षदेखि उनी मनोरञ्जन क्षेत्रमा काम गर्दै छिन् । मोडलिङ, विज्ञापन तथा म्युजिक भिडियोमा काम गरिरहेकी सृष्टि परिवारबाट खर्च नलिएको बताउँछिन् । भन्छिन्, "म आफ्ना लागि आफैँ खर्च जुटाउँछु । मितव्ययी हिसाबले खर्च गर्छु ।"
अभिनेत्री झरना थापाले जाडो महिनामा वनपिस लगाउँदा सञ्चार माध्यम तातेको थियो । पि्रयंका कार्कीले वनपिस लगाउँदा उस्तै प्रतिक्रिया आयो । पत्रकारले सोध्दा उनले जवाफ दिएकी थिइन्, "हिरोइनलाई कहाँ चिसो लाग्छ ? उनीहरू त ग्लामरस देखिनुपर्यो नि ।" मिडिया या फ्यानले कलाकार तथा मोडललाई राम्रो बन्न दबाब दिएका यी केही उदाहरण हुन् । तर मिडियाले यस्तो कुनै दबाब नदिएको कलाकारद्वय ऋचा र स्वस्तिमाको तर्क छ । त्यस्तो खाले कुनै दबाब नझेलेको उनीहरूको अनुभव छ । यी कलाकारले भनेझैँ मिडियामा राम्रो देखिने दबाब छैन भने किन हाम्रा कलाकार तथा मोडल राम्रो देखिने होडबाजीमा छन् ? किन उनीहरू आफ्नो क्षमता तिखार्नभन्दा पनि इन्स्टाग्राम र फेसबुकमा फोटो राख्न व्यस्त छन् ? गायिका गागाले जस्तो कुनै विशेष 'कज' का लागि पहिरन लगाएका छन् ?
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...