अब्बल जिदान
प्रशिक्षकका रूपमा पनि जिनेदिन जिदान सार्वकालिक महान्
सन् २००२ मा च्याम्पियन्स लिग जित्न फाइनलमा जिदानले हानेको भली निर्णायक थियो । त्यो गोल यति सुन्दर थियो कि अझैसम्म त्यसलाई च्याम्पियन्स लिगको फाइनलमा भएका उत्कृष्ट गोलमध्यको एक भनेर चिनिन्छ । उनकै गोलबाट रियल म्याड्रिडले दसौँपटक च्याम्पियन्स लिग जितेको थियो ।
२०१४ मा रियलले एघारौँपटक च्याम्पियन्स लिग जित्दा पनि जिदान रियलमै थिए । त्यसबेला उनी मुख्य प्रशिक्षक कार्लो एन्सेलोटीका सहायक थिए । गत वर्ष १२औँ पटक जित्दा उनी मुख्य प्रशिक्षक भइसकेका थिए । र, अहिले रियल १३औँ पटक च्याम्पियन बन्ने तरखरमा छ । आउँदो २२ जेठमा रियलले फाइनलमा युभेन्ट्सको सामना गर्दै छ । खेलाडी हुँदा जिदान रियल आउनुअघि युभेन्ट्सबाटै खेल्थे ।
२००६ मा खेल जीवनबाटै संन्यास लिए पनि जिदान फुटबलभन्दा टाढा रहेको रियलले हेर्न चाहँदैनथ्यो । त्यसैले उनलाई २००९ मा रियलले अध्यक्ष फ्लोरेन्टिनो पेरेजको सल्लाहकार बनायो । खेलाडी हुँदा करिब ६ वर्ष बिताएको क्लबसँग पुन आबद्ध हुन पाउनु जिदानका लागि पनि खुसीकै कुरा थियो । त्यसको एक वर्षपछि उनलाई रियल फुटबल टिमकै विशेष सल्लाहकार बनाइयो । त्यो बेला रियलका प्रशिक्षक जोसे माउरिन्हो थिए । ड्रेसिङ रुममा जिदान जस्तो हस्तीलाई भेट्दा खेलाडीलाई पनि प्रेरणा मिल्ने भएका कारण माउरिन्होले जिदानलाई टिमको विशेष सल्लाहकार बनाउन आग्रह गरेका थिए ।
माउरिन्होले खेलाडीलाई प्रेरित गर्नका लागि जिदानलाई विशेष सल्लाहकार बनाउन आग्रह गरेका भए पनि क्लबका अध्यक्ष पेरेजको सोच अर्कै थियो । उनी एक दिन जिदानलाई रियलको प्रशिक्षकको भूमिकामै देख्न चाहन्थे । किनभने, त्यो बेला रियलको प्रतिस्पर्धी क्लब बार्सिलोनाको टिम उसको एक पूर्वखेलाडी पेप ग्वार्डीओलाले हाँकिरहेका थिए । र, ग्वार्डीओलाको बार्सिलोनाले एकपछि अर्को सफलता हात पार्दै थियो । फ्लोरेन्टिनो पेरेज भविष्यमा रियललाई आफ्नै पूर्वखेलाडीले सम्हालेको हेर्न चाहन्थे । र, यसका लागि जिदान नै एक मात्र विकल्प थिए । किनभने, खेलाडी, व्यवस्थापन वा प्रशंसक, जिदानलाई नरुचाउने कोही थिएन ।
जिदान शान्त स्वभाव भएका व्यक्तित्वका रूपमा चिनिन्छन् । भलै, उनले २००६ को विश्वकप फाइनलमा इटालीका मार्को माटाराजीलाई टाउकोले छातीमा हानेका थिए । यसबाहेक जिदान रिसाएको कसैले कहिल्यै देखेका थिएनन् । प्राय: उनी आफ्नै धुनमा हुन्छन् । २०–२२ को हुँदा जिदानको प्रशिक्षक रहेका पिरोट लबाट पनि यसै भन्छन् । उनका अनुसार जिदान जुनसुकै निर्णय लिनका लागि पनि दसपटक सोच्छन् । र, आफैँ विश्वस्त नभएसम्म उनी कुनै निर्णय गर्दैनन् । उनको यही स्वभावका कारण होला, उनले प्रशिक्षक बन्ने इच्छा पनि २०१२ मा मात्रै व्यक्त गरे ।
उनलाई प्रशिक्षकका रूपमा तयार पार्न रियलले कार्लो एन्सेलोटीसँग सहायक प्रशिक्षक भएर काम गर्ने मौका दियो । लगत्तै अर्को सिजन रियलकै जुनियर टिममा मुख्य प्रशिक्षक भए । जुनियर टिम सम्हाल्दा जिदान ‘मास्टरमाइन्ड’ प्रशिक्षक बन्लान् बनेर कसैले सोचेका थिएनन् । किनभने, उनको टिमले एकरूपको खेल कहिल्यै खेलेन । त्यसैले गत वर्ष सिनियर टिमको प्रशिक्षक नियुक्त हुँदा रियलले ठूलै चमत्कार गर्ला भनेर आश पनि कमैले गरेका होलान् ।
जस्तोसुकै राम्रो प्रशिक्षक भए पनि रियल म्याड्रिडमा लामो समय टिक्न गाह्रै हुन्छ । किनभने, रियल ठूलो क्लब हो र यसका अध्यक्षले रियललाई सधैँ सफल क्लबका रूपमा उभ्याउन चाहन्छन् । यहाँ प्रशिक्षकले तुरुन्तै राम्रो प्रभाव देखाउन सक्नुपर्छ । नत्र क्लबले चाँडै उसको विकल्प खोज्न थाल्छ । यस्तो स्थितिमा जिदानलाई काम गर्न गाह्रो हुने पक्का थियो । तर, निकै विचार गरेर लिएको निर्णयप्रति उनलाई पूर्ण विश्वास थियो । उनले सम्हालेपछि रियल यो सिजन लालिगा र च्याम्पियन्स लिग दुवैको उपाधि नजिक छ ।
जिदानको नेतृत्वमा रियलको खेल आकर्षक नहोला । तर, एकरूपको पक्कै छ । जुन उनले पहिला सम्हालेको जुनियर टिममा थिएन । जिदानको एउटै मान्यता छ, राम्रो खेलाडीलाई राम्रै मौका दिनुपर्छ तर को राम्रो र नराम्रो नाम होइन, प्रदर्शनले छुट्याउनुपर्छ । नाम चलेका खेलाडीलाई महँगोमा भित्र्याउने रियलको परम्परा जिदानले नै तोडे । उनले अर्को नयाँ खेलाडी ल्याउनुभन्दा सम्भावना बोकेका जुनियर खेलाडीलाई मौका दिए ।
अहिले रियल म्याड्रिडको कुनै एक निश्चित सुरुआती ११ को टिम छैन । किनभने, बेन्जेमा, बेल, मोड्रिचजस्ता मुख्य खेलाडी बेलाबखत चोटका कारण केही समय खेल्न सकेनन् । रोनाल्डो पनि पहिलाजस्तो यसपटक उति प्रभावकारी देखिएका छैनन् । तर, नतिजामा भने यसले खासै असर पारेको छैन । जिदानबाट रियलले पाएको मुख्य उपलब्धि यही हो ।
रियलले यसपालि पोजेसन गेम खेलिराखेको छ । अघिल्ला सिजनहरूमा जस्तै काउन्टर अट्याकलाई बढी जोड दिएको छैन । बिस्तारै मौका सिर्जना गर्नेतर्फ ध्यान दिएको देखिन्छ । बरू यसका लागि मैदानको हरेक भागलाई राम्रोसँग प्रयोग गरिरहेको छ । विपक्षी झुक्याउन रणनीति अनुसार फरक फर्मेसनमा खेल्छ । रियलले पछिल्ला ६३ खेलमा गोल गरेको छ । युरोपियन क्लबका लागि यो पनि एउटा रेकर्ड नै हो ।
अप्ठ्यारो परेको खेलमा रियललाई यो सिजनमा कप्तान सर्जियो रामोसले पनि बचाएका छन् । डिफेन्डरको भूमिका खेल्ने रामोसले यो सिजनमा दस गोल गरेका छन् । त्यसमध्ये पनि अधिकांश खेलको अन्तिम समयमा, जतिबेला रियल म्याड्रिडले हार्ने निश्चितजस्तै देखिन्छ । जिदानको प्रशिक्षणमा उदाएका अर्का खेलाडी हुन्– कासामीरो । डिफेन्सिभ मिडफिल्डमा उनको भूमिका जबर्जस्त छ । उनकै कारण अन्य मिडफिल्डर मोड्रिच र टोनी क्रुस अझै आक्रामक भएर खेल्न स्वतन्त्र भएका हुन् । अन्य युवा खेलाडीहरू लुकास भाजक्वेज, मोराटा र मार्कोस एसेन्सियोले पनि आफ्नो भूमिका निभाएकै छन् ।
खेलाडी हुँदा जिदान जति भद्र थिए, प्रशिक्षक हुँदा पनि उस्तै छन् । त्यो बेला जिदानको मास्टर क्लासको चर्चा थियो । अघिल्लो वर्ष उनी रियलका लागि खेलाडी र प्रशिक्षक दुवैका रूपमा च्याम्पियन्स लिग जित्ने दोस्रो व्यक्ति बनेका जिदान यसैले पनि अब्बल प्रशिक्षकका रूपमा चिनिँदै छन् ।
सम्बन्धित
कोभिड १९ पछि नेपाली खेलकुदलाई पुरानै लयमा फर्काउने चुनौती ...
खेलकुदमा वर्ष ०७६ लाई फर्केर हेर्दा
१ सय २४ वर्षभन्दा लामो इतिहास बोकेको आधुनिक ओलम्पिकमा प्रतियोगिता स्थगित भएको यो दोस्रो घट...
कोरोना संक्रमणको असरले खेल गतिविधिमा कस्तो असर ?
दुई महान् पिताका पुत्रहरू पनि फुटबलप्रति उति नै रुचि राख्ने भएका छन् । रोनाल्डोका छोरा क्र...
रोनाल्डोका छोराका आदर्श मेसी, मेसीका छोरा रोनाल्डोका प्रशंसक
नेपालको थाइल्यान्ड यात्रा नमीठो सम्झना...
एसिया कप खेल्ने सपनामा यसरी लाग्यो तगारो
एक महिना महत्त्वपूर्ण प्रतियोगिता खेल्न नसक्ने स्थितिमा नेपाल ...
महिला भलिबलका तीन हस्ती नै चोटग्रस्त
आर्मीको खेल साँच्चै नै उम्दा थियो, यो सिजनको लिगमा । डिफेन्स र गोलरक्षणमा निकै बलियो । आर्...