[झटारो] सरकारलाई प्रवेश निषेध !
सावधान ! सरकारलाई हाम्रो साम्राज्यमा प्रवेश निषेध छ ।
तीन दशकसम्मको अनवरत प्रयासपछि यसपालि सरकारले न्वारानदेखिको बल निकालेर यातायात क्षेत्रको ‘सिन्डीकेट साम्राज्य’ समाप्त पार्यो । यातायात साम्राज्यका राजा–रजौटाहरूले सरकारसँग घुँडा टेकेकोप्रति हामी अरू साम्राज्यका राजा–रजौटाहरू खेद व्यक्त गर्दछौँ । र, सरकारको विस्तारवादी नीतिप्रति घोर आपत्ति प्रकट गर्दछौँ । सरकारका केही मन्त्रीहरू अरू क्षेत्रका सिन्डीकेट साम्राज्यलाई पनि यसैगरी तह लगाउँछौँ भन्दै हौसिएको समाचार सुनिँदैछ । यस्तो सोच कल्पनामा पनि नराखे हुन्छ, हामी सम्पूर्ण सिन्डीकेट साम्राज्यका राजा–रजौटाहरू सरकारलाई ठाडो चुनौती दिन चाहन्छौँ, हाम्रो साम्राज्यतिर देब्रे आँखाले पनि नहेर्नू । हेरेमा परिणाम राम्रो हुने छैन ।
हाम्रो साम्राज्यको अथाह क्षेत्रफलबारे सरकारलाई थाहै छ । कहाँ–कहाँ मात्र तैँले धावा बोल्न सक्लास् ! अस्पताल, मल, फलफूल, स्कुल, कलेज, रोजगारी, बेरोजगारी, बैंक, ब्याज, प्याज, सुन, लसुन, तेल, खेल, खानी, पानी, लुगा, जुत्ता, खोला किनार, सरकारी वन, चुरेको पहाड, खोलाको बगर, आकाश, जमिन, भन्सार, कर । सिन्डीकेट साम्राज्यले नगाँजेको क्षेत्र कुनै छ ? मोटर हिँड्ने सडक हाम्रो कब्जामा । पैदल हिँड्ने पेटी हाम्रो राज्याधिकारमा । ल हेर ! यी राजमार्ग र नदी, खोलानालाका सरकारी किनारामा हाम्रा लाखौँ घर–टहरा, हाम्रा पेसा, व्यवसायहरू । ल हेरौँ त कसले छुँदो रहेछ हामीलाई ! यस्तो चक्रव्यूहमा पस्ने आँट कसरी गर्दो रहेछ सरकारले ! देखा त सरकार तेरो पाइन !
कस्ता–कस्ता अभेद्य किल्लाहरू छन् हामीसँग । हामी हाम्रो किल्लामा छिर्नै दिँदैनौँ सरकारलाई । हाम्रा आफ्नै संविधान छन्, कानुन छन्, नियम छन् । हाम्रा आफ्नै जासुसहरू छन्, एजेन्टहरू छन्, घुसपैठियाहरू छन् । त्यहीँ संसद्मा छन्, प्रशासनमा छन् । प्रहरीमा, अदालतमा, वकालतमा छन् । सरकारभित्रै छन् हाम्रा सञ्चालकहरू, संरक्षकहरू, भूमिगत सल्लाहकारहरू । सडकदेखि सदनसम्मै हाम्रो साम्राज्य छ । ल हेरौँ त, कसरी भत्काउन सक्छस् हाम्रो साम्राज्य !
भन्सारको जालो तैँले तोड्नै सक्दैनस् । सुन तस्करीको चक्रव्यूहमा तँलाई नै हुलेर हामी अभिमन्यू बनाइदिन्छौँ । तँलाई तिरिमिरीझ्याँइ पार्ने तेरै कर्मचारी, शिक्षक, प्राध्यापकका संघ–संगठनका सिन्डीकेटहरू छन् । बाइसे–चौबीसे राज्य भन्थे उहिले, अहिले बाइस सय–चौबीस सयभन्दा बढी सिन्डीकेट राज्यहरू चलाएका छौँ हामीले । सरकारले हाम्रा साम्राज्यमा हस्तक्षेप गर्न खोज्यो भने अरिंगालको गोलोझैँ हाम्रा राज्यका सेनाहरू सरकारविरुद्ध खनिनेछन्, जसरी विगतमा खनिने गर्थे र सरकारलाई हरेक पटक घुँडा टेकाएरै छाड्थे । सरकारले पृथ्वीनारायण हुने सपना नदेखे हुन्छ ।
यातायात साम्राज्यजस्तै कमजोर ठानेर हाम्रा महाशक्तिशाली मेडिकल साम्राज्य, शिक्षा साम्राज्य, बैंकिङ साम्राज्य, ट्रेड युनियन साम्राज्यहरूमा झुक्किएर पनि धावा नबोल्नू । नत्र आफैँ फन्दामा परेर अकालमै आयु सकिएला ! तरकारी साम्राज्यमा हमला गर्न खोज्दा सरकारी सेना–मेनाहरूलाई तरकारी नै तरकारीले हानेर लखेटेको बिर्सेको छैन होला । हाम्रो व्यापार साम्राज्यमा चेकजाँच गर्न खोज्दा केही वर्षअघि न्युरोडबाट तिनीहरूलाई युद्धबन्दी बनाएर सटरमा थुनेर नांगेझार पारेर लखेटेको घटना भुलेको छैन होला । नभुल्नू त्यस्ता विगतका घटना र नआउनू हाम्रो साम्राज्यमा । शान्तिपूर्ण तरिकाले राज्य गरेर बसिरहेको अवस्थामा हाम्रो शान्ति भंग गर्ने दुष्प्रयास नगर्नू । हामीलाई यातायात व्यवसायीजस्तो कमजोर र घुँडाटेकुवा सम्झेर आक्रमण गर्ने दुस्साहस गरेमा नराम्रो परिणाम भोग्नुपर्ला ! सावधान ! सरकारलाई हाम्रो साम्राज्यमा प्रवेश निषेध छ ।
सम्बन्धित
अब हामी त्यता वरपर गस्ती गर्छौं । ढुंगाहरूमा लठ्ठीले हानेर आवाजहरू निकाल्छौँ, सुसेल्छौँ । ...
सुत्न दे इन्डिया !
स्रोतले कति पटक बिहान माधव नेपाललाई र दिउँसो प्रचण्डलाई प्रधानमन्त्री बनाइसक्यो । साँझमा प...
यस्ता अद्भुत समाचार मित्रहरूले कहाँबाट ल्याउँछन् ?
हामीले पूरा नहुने आशा गरेर आफ्नो स्वास्थ्य बिगार्नुभन्दा पूरा हुने सम्भावना भएका अपेक्षा ग...
नयाँ वर्ष नयाँ आइडिया
नेपालमा भने कोरोना नियन्त्रणको जिम्मा स्वास्थ्य मन्त्रालयले होइन, गृह मन्त्रालयले लिएजस्तो...
प्रहरी लगाऊ, कोरोना भगाऊ !
यो समय त नाकमा मास्क, आँखामा कालो चस्मा र कानमा ठेडी लगाएर चुपचाप घरमा बस्ने समय हो ।...
त्यत्तिकै भ्रष्टाचार भयो भन्ने ?
बाइकवालाले फुऽ गरेको त मापसे पोजिटिभ देखियो । ट्राफिकले समाइहाले । तर बाइकवालाले भने, ‘माप...