मोदीले बजाएको झामर कति पुरानो ?
भजनियाले दिन–रात गरी दैनिक दुई सत्रमा ३/३ घन्टाको ड्युटी गर्छन्
जनकपुर– जानकी मन्दिरको ‘आजन्म अखण्ड श्री सीताराम संकीर्तन’का भजनियाका लागि ऐतिहासिक दिन रह्यो, २८ वैशाख । मन्दिरको उत्तरतर्फको सानो कोठामा ५७ वर्षयता २४ घन्टै अखण्ड रामनामको जप गर्दै आएका भजनिया समूहमा मिसिएर भारतीय प्रधानमन्त्री नरेन्द्र मोदी स्वयंले ‘झामर’ बजाउनुले एकातर्फ रामनामको महिमा बढाएको छ भने अर्कोतर्फ पूर्णकालीन यी भजनियाको आत्मबल बढेको छ । महन्त रामतपेश्वर दास वैष्णव भन्छन्, “मोदीजीलाई रामनामको महिमा थाहा छ । कलियुगमा रामनामको जपभन्दा ठूलो धर्म–कर्म अर्को छैन ।”
आजन्म अखण्ड रामनाम संकीर्तनको प्रारम्भ जानकी मन्दिरका १५औँ पुस्ताका महन्त रामशरण दास वैष्णवले ०१८ मा गराएका थिए । १६औँ पुस्ताका महन्त रामतपेश्वरका अनुसार त्यतिबेला देशमा परेको अनिकाल निवारण तथा विश्व शान्तिका लागि रामनाम संकीर्तन सुरु गरिएको थियो । तत्कालीन जिल्ला प्रहरी प्रमुख मानबहादुर तथा समाजसेवी राधा चौधरीलगायतको सहयोगमा सञ्चालित यस संकीर्तनलाई पछि अखण्ड बनाइएको हो ।
जानकी मन्दिरमा पूजापाठपछि मन्दिरको त्रिपेक्षण (गर्भगृहको परिक्रमा)का क्रममा मोदीले रामनाम जपको स्वर सुने । अनि, स्वयं संकीर्तन स्थलमा प्रवेश गरे । त्रिपेक्षणका क्रममा सँगै रहेका महन्त रामतपेश्वर दास सम्झिन्छन्, ‘ मोदीजीले आफैँ झामर बजाए अनि मग्न भएर रामनाम संकीर्तन पनि गरे ।’
मोदी संकीर्तनस्थल पुग्दा हार्मोनियम बजाइरहेका ७५ वर्षीय भजनिया मानेश्वर चौधरीसहितका सिँगै कीर्तनिया मण्डली रोमाञ्चित बनेका थिए । चौधरीका अनुसार दैनिक सयौँ श्रद्धालु भजनकीर्तनमा सहभागी हुन्छन् । तर, मोदीजस्ता अतिविशिष्ट व्यक्ति स्वयंले झामर बजाएर कीर्तन गरेको त्यो पहिलो अवसर थियो ।
आजन्म अखण्ड रामनाम संकीर्तनका लागि जानकी मन्दिर व्यवस्थापनले १५ जनाको भजनिया टोली नियुक्त गरेको छ । चार–चार समूहमा विभाजित भजनियाले दिन–रात गरी दैनिक दुई सत्रमा ३/३ घन्टाको ड्युटी गर्छन् । भजनकीर्तन गरेबापत उनीहरूलाई जनही ६ हजारदेखि साढे ७ हजार रुपियाँ मासिक तलब, खाना, आवास र लुगाफाटोको व्यवस्था छ । पूर्णकालीन भजनिया विधिवत् बिदा लिएर मात्र घर जान पाउँछन् ।
०५३ सम्म अखण्ड संकीर्तनका लागि नगरमा चन्दा माग्ने चलन थियो । संकीर्तन मण्डलीमध्ये एक टोली दिनमा नगरवासीसँग चन्दा माग्थे । अनि, चन्दाबाट प्राप्त नगद, चामल, दाल आदिबाटै संकीर्तन सञ्चालित गरिन्थ्यो । रामतपेश्वर दास वैष्णव महन्त नियुक्त भएपछि ०५४ देखि उनले नगरबाट चन्दा माग्ने चलन अन्त्य गरे । महन्त दास भन्छन्, “मागेर रामनाम संकीर्तन गर्नु राम्रो लागेन । जुन श्रद्धालुलाई चन्दा दिन मन लाग्छ, मन्दिरमै आएर चन्दा दिन्छन् । अपुग रकम मन्दिरबाट दिन्छौँ । म जीवित रहेसम्म संकीर्तन रोकिँदैन ।”
भारतीय प्रधानमन्त्रीसँग झन्डै आधा घन्टा बिताएका जानकी मन्दिरका महन्त रामतपेश्वर दास वैष्णव मोदीलाई धार्मिकसँगै भावुक व्यक्तिको संज्ञा दिन्छन् । सीतालाई आमाका रूपमा पूजा गर्ने क्रममा मोदीले जनकपुरलाई आफ्नो ननिहाल (मावली) भनेको उनी सुनाउँछन् । मोदीले जानकी मन्दिरलाई के दिए त ? महन्त दास भन्छन्, “मावली आएकालाई पो दिनुपर्छ, माग्ने कुरै भएन ।”
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...