आन्दोलनलाई आवाज
मैले त्यही महान् भाषा समाएँ र यो कविता परिवर्तन चाहनेहरूका लागि नारा नै बन्यो, साझा सपनाजस्तो बन्यो ।
‘बिसे नगर्चीको बयान’ कविता कसरी लेख्नुभयो ?’
विभिन्न पत्रपत्रिका, रेडियो, टेलिभिजनहरूमा मैले यसको जवाफ दिएको छु । तर, आज फर्केर हेर्दा आफैँ आश्चर्यचकित हुन्छु– के यी सब उत्तर मैले नै दिएको हुँ ?
मलाई अनायास हाम्रा प्रयोगवादी कवि मोहन कोइरालाको एउटा घटना सम्झना हुन्छ । ०५० तिर कीर्तिपुरमा एमए पढ्दै गरेका एक विद्यार्थी थेसिस लेख्ने योजनासहित कविजीको वासस्थान मैतीदेवी आइपुगेका थिए । उनले हातमा नोटबुक र कलम तयार पारेर कविजीलाई सोधे– “कविवर ! ‘फर्सीको जरा’, ‘सारंगी’जस्ता कविता कसरी लेख्नुभयो ?”
छोटो मौनतापछि मधुर मुस्कानका साथ मोहन दाइले उत्तर दिनुभयो, “त्यही त भाइ, कसरी लेखेँ हुँला हगि ! म पनि आफैँलाई बेला–बेला यही प्रश्न सोध्ने गर्छु, कसरी लेखेँ हुँला ?” कविजीको यस्तो अनौठो उत्तर सुनेर ती विद्यार्थी अक्क न बक्क भए ।
उनी केही छिनपछि नबोली त्यहाँबाट बिदा भए । मोहन दाइले उनलाई गेट नकाटुन्जेल ‘आउँदै गर्नुस् है’ भनिरहनुभयो । ती विद्यार्थीले एमए गरे–गरेनन् ? थाहा छैन । मलाई भने मोहन दाइसितको त्यो प्रसंग अहिले पनि रोचक लाग्छ । टीएस इलियटलाई पनि ‘वेस्ट ल्यान्ड’ लेखेपछि यस्तै प्रश्न गरियो, गरिएन होला ? तर, जानिफकार भन्छन्– त्यसैले उनी आफँै आफ्ना कविताको समालोचक भए । गोपालप्रसाद रिमाल, भूपि वा बैरागी काइँलाको कुरा पनि यही हो । यद्यपि, काइँलाको कविताको सही विमर्श गरिदिने इन्द्रबहादुर राईजस्ता व्याख्याता थिए ।
०६२/०६३ को जनआन्दोलन सम्पन्न भएको डेढ दशक पुग्नै लाग्यो । राजतन्त्रको अन्त्य र लोकतान्त्रिक गणतन्त्र, अझ समावेशी लोकतन्त्रको अभ्यासमा छौँ हामी । अहिले ‘बिसे नगर्चीको बयान’ कविताको वैचारिक बिन्दु वा आधारभूमिमा नेपालको राजनीतिक व्यवस्था छ । उसो भए अब के यो कविताको सान्दर्भिकता सकिएको हो ? तत्कालीन अवस्थामा निरंकुश राजतन्त्रविरुद्धमा लेखिएको यो कविताबारे छलफल गर्दा आउने कमजोर प्रश्नमध्ये एउटा यो पनि हो । यसको उत्तर मैले दिइरहनु नपर्ला । किनभने, असल सिर्जनाको सान्दर्भिकता सधैँ रहिरहन्छ भन्ने सर्वविदितै छ । तर, आज यहाँ यही विषयमा फेरि किन चर्चा गरिँदैछ भने जनआन्दोलनका बेला यो कविता प्रथमपटक नेपाल साप्ताहिकको १९ असार ०६२ को अंकमा प्रकाशित भएको थियो ।
त्यतिखेर जनआन्दोलन उत्कर्षतिर थियो । राज्यद्वारा सञ्चार माध्यममाथि व्यापक दमन सुरु भएको थियो । रेडियो सगरमाथा, रेडियो कान्तिपुरजस्ता एफएममा ज्यादती बढिरहेको थियो । स्वतन्त्र रेडियो बचाऊ आन्दोलन पनि चर्किंदै थियो । यसका अगुवा थिए, अभियन्ता रघु मैनाली । उनैले वाक् स्वतन्त्रताका पक्षमा स्रष्टाका तर्फबाट ऐक्यबद्धता जाहेर गर्न कवितासहित आर्ट काउन्सिल, बबरमहलमा उपस्थित हुन अनुरोध गरे । मैले भोलि बिहान सुनाउन त्यही रात यो कविता लेखेँ ।
कविता झट्टै, अनायास वा तत्काल लेखिने विषय होइन । कविको चेतन–अवचेतनमा अघिदेखि त्यसको निर्माण वा विनिर्माणको प्रक्रिया गुज्रिरहेको हुन्छ । आशुकवि वा लोककविहरूले पनि कविता तत्काल निर्माण गर्ने होइनन्, उनीहरूभित्र अघि नै तिनका जीवन, संघर्ष वा अनुभवले कविता बुनिसकेका हुन्छन्, बुनिरहेका हुन्छन् । बाहिर प्रस्फुटन हुने मौका मात्रै मेला, हाटबजार, भेट वा संयोगहरू भइदिन्छन् । यसकारण मैले ‘बिसे नगर्चीको बयान’ कविता मेरो मस्तिष्कमा त्यतिबेलादेखि लेख्न थालेँ हुँला, जतिबेलादेखि मैले यो देश, देश होइन । अन्याय, असमानता र विभेदहरूको कालो दह हो । यसको मूल कारण यहाँको व्यवस्था हो भन्ने बुझेँ । तर, कविता त भाषाको कला पनि हो । सार्वजनिक हुन त फेरि शब्दले लेखिनैपर्छ । त्यसैले शब्दद्वारा व्यक्त हुन कविलाई भाषा चाहिन्छ । त्यो भाषा मलाई ०६२–६३ को जनआन्दोलनले दियो । त्यो जनआन्दोलनको भाषा भनेको यो देशका उत्पीडित, दलित, सीमान्तकृत वा सबाल्टर्नहरूले आफ्नो हक–अधिकार खोज्ने भाषा थियो । मैले त्यही महान् भाषा समाएँ र यो कविता परिवर्तन चाहनेहरूका लागि नारा नै बन्यो, साझा सपनाजस्तो बन्यो ।
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...