[झटारो] मदिरामा प्रतिबन्ध नलगाइयोस् !
नयाँ नियममा मदिरा किन्नेले तीनपुस्ते लेखाउने प्रणाली लागू गर्न खोजिएको पनि सुनिएको छ । सरकारको काम जनताको अपमान गर्ने होइन ।
हामी नेपाली जातिले परापूर्वकालदेखि खाइपिई आएको हाम्रो पवित्र सोमरसमाथि सरकारले नियन्त्रण गर्ने र बिस्तारै प्रतिबन्ध लगाउने हल्ला बजारमा आइरहेको छ । यस समाचारबाट हामी मदिराका समस्त स्टेक होल्डरहरू चिन्तित एवं आक्रोशित भएका छौँ । दुई–चार जना महिलाले आफ्ना लोग्नेलाई नियन्त्रणमा राख्न नसकेर उजुरी गरेकै आधारमा लहैलहैमा लागेर गृहमन्त्रीले यस्तो राष्ट्रघाती कदम उठाएमा अन्तत: उनकै लागि यो कदम घातक हुन सक्नेछ ।
मदिरा हाम्रो दैनिक जीवनको अभिन्न पेय हो, जीवनदायिनी रस हो । यसले मुलुकको आर्थिक तथा सामाजिक गतिविधिलाई सदा जीवन्त राखेको छ । यसले लाखौँको रोजगारी सिर्जना गरेको छ, करोडौँलाई आनन्द दिएको छ । रक्सी उत्पादक, वितरक, बिक्रेताको रातारात जीवनस्तर उठाउन यसले योगदान गरेको छ । कुलत हटाउन खुलेका कैयौँ संस्था र क्लिनिक यसले सञ्चालन गरेको छ । अस्पतालहरू चलाएको छ । कतिपय जातजातिको धार्मिक, सांस्कृतिक परम्परा धान्ने पवित्र जल बनेको छ । मुखाले स्वास्नी वा लुरे लोग्नेलाई बसमा राख्न यसले मद्दत गरेको छ । दुष्ट हाकिमहरू, सामन्त र साहुहरूसँग मुखमुखै लाग्न, नेतालाई गाली गर्न यही रसले शक्ति प्रदान गरेको छ । मनका कुण्ठा र रिस पोखेर मानव मात्रमा शान्ति तथा आध्यात्मिकताको विकास गर्न यसैले सघाएको छ । अनेक रोग र दुर्घटना निम्त्याएर सरकारलाई जनसंख्या नियन्त्रणमा पनि साथ दिएको छ । मापसे जाँच, भट्टी अनुगमन, दुर्घटना उद्धार इत्यादि काममा सक्रिय राखेर सुरक्षाकर्मीलाई शरीरमा बोसो लाग्नबाट जोगाएको छ । मुलुकभरि हरेक साँझ लाखौँको जनशक्तिलाई भट्टीमा अलमल्याएर सरकारविरुद्ध सडकमा उत्रिन सक्ने खतराबाट बचाएको छ । अन्न– फलफूलको कुन ठूलो कुरा भयो र ? थोत्रा मोजा तथा कुहिएका छालाबाट समेत सोमरस उत्पादन गर्न सक्ने नेपालीको भीषण प्रतिभाको प्रस्फुटन यसैले गराएको छ ।
सरकारले विचार गरोस्, रक्सीमा लगाइने प्रतिबन्धले उत्पन्न हुने सामाजिक असर निकै भयावह हुनेछ । झैँझगडा, होहल्ला, हानाहान, ठोकाठोक, हत्या, बलात्कारका घटना घटेर हाम्रो समाज निष्प्राण हुनेछ । मानिसमा आँट सिद्धिने छ, जोस हराउनेछ । बैठक, सेमिनार, बिहे, ब्रतवन्ध, पास्नी, तिजलगायत हाम्रा चाडपर्व निरस हुनेछन्, कतिपय लोप नै हुनेछन् । भोजभतेर खाइनसक्नुका खल्ला हुनेछन् । अस्पताल तथा क्लिनिक उद्योगमा ह्रास आउनेछ ।
समाचार अनुसार नगरको वडापिच्छे एउटा र गाउँपालिकामा एउटा मात्र मदिरा बिक्री हुने ठाउँ तोकिनेछ । यो जनतालाई लाइनमा उभ्याएर दु:ख दिने र व्यापारीलाई सिन्डिकेट दिने षडयन्त्रकारी नीति हो । सबैखाले सिन्डिकेट समाप्त पार्छु भन्ने गृहमन्त्रीले यसरी सिन्डिकेटलाई प्रोत्साहन गर्दा मन्त्रीको नियतमाथि नै शंका उत्पन्न हुनेछ ।
नयाँ नियममा मदिरा किन्नेले तीनपुस्ते लेखाउने प्रणाली लागू गर्न खोजिएको पनि सुनिएको छ । सरकारको काम जनताको अपमान गर्ने होइन । त्यसभन्दा पनि महत्त्वपूर्ण कुरा भारतले लागू गरेकै नियम ल्याएर यस्तो राष्ट्रवादी सरकारले लम्पसारवादी भएको पटक्कै सुहाउँदैन । अत: मदिरामाथि नियन्त्रण गर्ने राष्ट्रघाती कानुन बनाउने सोच तुरुन्त त्याग्न हामी गृहमन्त्रीज्यूलाई अनुरोध गर्दछौँ । अन्यथा त्यस्ता कानुनविरुद्ध हामी मदिरा उत्पादक, बिक्रेता, थोक तथा खुद्रा सेवनकर्तालगायत प्रत्यक्ष तथा परोक्ष सम्बन्धित सबै स्टेक होल्डर मिलेर महासंघ गठन गरी संघर्षमा उत्रने चेतावनी दिन चाहन्छौँ । आगे गृहमन्त्रीजीको जो विचार !
सम्बन्धित
अब हामी त्यता वरपर गस्ती गर्छौं । ढुंगाहरूमा लठ्ठीले हानेर आवाजहरू निकाल्छौँ, सुसेल्छौँ । ...
सुत्न दे इन्डिया !
स्रोतले कति पटक बिहान माधव नेपाललाई र दिउँसो प्रचण्डलाई प्रधानमन्त्री बनाइसक्यो । साँझमा प...
यस्ता अद्भुत समाचार मित्रहरूले कहाँबाट ल्याउँछन् ?
हामीले पूरा नहुने आशा गरेर आफ्नो स्वास्थ्य बिगार्नुभन्दा पूरा हुने सम्भावना भएका अपेक्षा ग...
नयाँ वर्ष नयाँ आइडिया
नेपालमा भने कोरोना नियन्त्रणको जिम्मा स्वास्थ्य मन्त्रालयले होइन, गृह मन्त्रालयले लिएजस्तो...
प्रहरी लगाऊ, कोरोना भगाऊ !
यो समय त नाकमा मास्क, आँखामा कालो चस्मा र कानमा ठेडी लगाएर चुपचाप घरमा बस्ने समय हो ।...
त्यत्तिकै भ्रष्टाचार भयो भन्ने ?
बाइकवालाले फुऽ गरेको त मापसे पोजिटिभ देखियो । ट्राफिकले समाइहाले । तर बाइकवालाले भने, ‘माप...