जो बलिउडमा उदाए
सप्तरीको भारदहबाट काठमाडौँ हुँदै मुम्बई पुगेका उदीतनारायण झा बलिउडका चर्चित गायकमध्येमा पर्छन् ।
उदीतनारायण झा, भारत
सप्तरीको भारदहबाट काठमाडौँ हुँदै मुम्बई पुगेका उदीतनारायण झा बलिउडका चर्चित गायकमध्येमा पर्छन् । उनले झन्डै तीन दशक हिन्दी फिल्मका हिट गीत गाए । २ सय ६० हिन्दीसहित नेपाली, मैथिली, नेपाल भाषा, उर्दू, तमिल, तेलगु, मलायालम, कन्नड, उडिया, आसामी र सिन्धी भाषाका सयौँ चलचित्रमा पाश्र्वगायन गरे । ३० भाषामा १५ हजारभन्दा धेरै गीत रेकर्ड गराएका उदीतलाई नेपाल र भारत सरकारले उच्च सम्मान प्रदान गरिसकेका छन् ।
१ डिसेम्बर १९५५ मा बुबा किसन र आमा भुवनेश्वरीबाट जन्मिएका उनले राजविराजको पीबी हाईस्कुलमा प्राथमिक शिक्षा हासिल गरेका हुन् । एसएलसीपछि उनी राजधानी काठमाडौँ आए र रेडियो नेपालमा स्वर परीक्षा उत्तीर्ण भएपछि नेपाली र मैथिली गीत रेकर्ड गराउन थाले । उनले चलचित्र सिन्दूरबाट पाश्र्वगायन आरम्भ गरेयता कहिल्यै पछाडि फर्किनुपरेको छैन । नेपाली चलचित्रमा उदीत गायक मात्र हैनन्, निर्माता र अभिनेतासमेत हुन् ।
नेपालमा स्थापित भइसकेका उदीत सन् १९७८ तिर संगीतको थप अध्ययनका लागि भारतको मुम्बई पुगे । झन्डै तीन वर्षपछि उन्नीस–बीसबाट हिन्दी फिल्मको पाश्र्वगायन थालेका उनले प्रारम्भमा संघर्ष गर्नुपरे पनि केही वर्षमै लोकप्रिय भए । ‘बडे दिलवाला’, ‘तन–बदन’ बाट उकालो लागेको उनको संगीत यात्रा कहिल्यै ओरालो लाग्नुपरेन । सुपरहिट फिल्म ‘कयामत से कयामत तक’ ले उनलाई लोकप्रियताको शिखरमा चढायो । त्यसको एउटा गीत ‘पापा कहते है, बडा नाम करेगा...’ सुपरहिट भयो । सोही गीतका लागि उनले सर्वश्रेष्ठ पाश्र्वगायन फिल्ममेकर अवार्डसमेत प्राप्त गरे ।
संगीत क्षेत्रका प्रशंसकहरू उदीतको स्वरलाई जादूमयी मान्थे । त्यसैले छिमेकबाट मुम्बई नगरी पुगेका उनले छोटो समयमै चर्चित संगीतकार एआर रहमान, आरडी बर्मन, जगदीश सिंह र विशाल भारद्वाजको साथ पाए । तिनका संगीतमा गाइएका अधिकांश गीत हिट भएपछि उदीत सधैँ चर्चामा रहे । त्यसले उनलाई थप सफलताको शिखरमा पुर्याइदियो । खासगरी, ‘दिलवाले दुल्हनिया ले जायंगे’, ‘राजा हिन्दूस्तानी’, ‘हम दिल दे चुके सनम’, ‘लगान’ फिल्म हिट हुँदा भारतीय गीत–संगीत क्षेत्रमा उदीतको उचाइ निकै अग्लो भइसकेको थियो ।
उदीतले नेपाली र भारतीयको माया पाए । हिन्दी र नेपाली गीतका श्रोताले मन पराए । त्यसैले दुवै देशका प्रतिष्ठित पुरस्कार पाउन कुनै अवरोध भएन । उदीतले सन् २००१ मा नेपालको प्रबल गोर्खा दक्षिणबाहु प्राप्त गरे भने सन् २००९ मा भारतको उच्च सम्मान पद्मश्री पुरस्कार प्राप्त गरे । उनका दुई पत्नी रञ्जना र दीपा छन् । रन्जना सप्तरीमै बस्छिन् भने उनी दीपा र छोरा आदित्यनारायणसँग मुम्बईमा बस्छन् । आदित्यनारायण पनि गीतसंगीतकै क्षेत्रमा छन् । भन्छन्, “अब म छोरा आदित्यको करिअर उँचो भएको हेर्न चाहन्छु ।”
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...