अनिँदो भई...
सहरिया युवाले सुन्ने भनिँदै आएको पप म्युजिकलाई लोकप्रिय बनाउन उनको भूमिका अब्बल छ ।
नवीन के भट्टराईको पछिल्लो चर्चित गीतमध्ये पर्छ, ‘यदि मैले गिटार नसमाएको भए ।’ आजसम्मको उनको सदाबहार संगीत उचाइ हेर्दा लाग्छ, यदि उनले जीवन्त शब्दहरु नछानेको भए ! अनि यदि उनले राम्रो मेलोडी नपछ्याएको भए !
सामान्य शब्दैले काम चलाउन लागेको भए पनि उनका आवाजले सरदर आयु पाइहाल्थे होलान् । तर, दुई दशकअघि सुरु नवीन यात्रा अनवरत चल्नुमा शब्द, संगीतप्रति उनको छनोटले पनि काम गरेको देखिन्छ । सहरिया युवाले सुन्ने भनिँदै आएको पप म्युजिकलाई लोकप्रिय बनाउन उनको भूमिका अब्बल छ । यिनै स्टार गायकको नयाँ गीत आएको छ, ‘ अनिँदो भई...’ । शब्द र संगीत दुवै गायककै ।
अचेल डिजिटल रेकर्डिङ चल्तीमा छ । ट्रयाक बनायो, गायो । स्थायी लाइन कपीपेस्ट गर्यो । उस्तै परे स्वर पनि कम्प्युटरबाट मिलायो । तर, ‘अनिँदो भई...’ लाइभ रेकर्डिङ गरिएको हो । अर्थात्, हरेक वाद्यवादन एकसाथ बजाएर नवीनले गाए, सिंगल टेकमा । भन्छन्, “लाइभ गाउँदाको मज्जै बेग्लै हुन्छ ।”
‘आँखामा तिमीलाई...’ पछि लाइभ रेकर्डिङ गरिएको नवीनको दोस्रो गीत हो यो । पेनड्राइभमा ट्रयाक हालेर स्वदेशका महोत्सवदेखि विदेशका कन्सर्टसम्म दौडने चलन छ । यो दौडमा नवीन पर्दैनन् । ब्यान्डबेगर उनको कन्सर्ट हुन्न । भन्छन्, “ट्रयाकमा गाउँदा निरस र कृत्रिम हुन्छ । न मेरो चित्त बुझ्छ, न त दर्शकको । त्यसैले थोरै होस्, तर लाइभ ब्यान्डसँगै मात्र गाउने गर्छु ।”
सयौँ सांगीतिक प्रस्तुति दिइसके । दर्जनौँ गीत रेकर्ड गरे । तैपनि, हरेक दिन साधना गर्छन् । अझ कन्सर्टका लागि त घनघोर अभ्यास नै गर्छन्, ब्यान्डसँगै । मानौँ, उनी पहिलो कन्सर्टको तयारी गर्दैछन् । परिणाम, हरेक सोमा दर्शकलाई मन्त्रमुग्ध पार्छन् । नयाँ एल्बम ननिकालेको तीन वर्ष बित्यो । यद्यपि, केही महिनाको अन्तरालमा नयाँ गीत युट्युबबाट सार्वजनिक गरिरहन्छन् । न उनलाई धेरै गीत निकाल्ने लोभ छ, न त ट्रयाक बोक्दै देश–विदेश दौडने हतारो नै ।
डलर खर्चेर भ्युज कमाउन नसकिने होइन । र, पनि युट्युबको भ्युजका आधारमा कलाकारको लोकप्रियता मापन गरिन्छ । कतिपय त एउटै गीतबाट देशदेशावर चहार्छन् । भलै तीमध्ये अधिकांश साउने भेलजस्तै सुकिहाल्छन् पनि । तर, नवीनको गति उस्तै छ । न कहिल्यै उर्लिएर आउँछन्, न त कहिल्यै हराउँछन् । हिट होइन, स्तरीय संगीत उनको रोजाइ हो । जुन सुन्दा ‘आहा !’ लागोस् । श्रोताको मानसपटलमा सुनौलो संसार निर्माण होस् । उनको बुझाइमा गीतमा त्यो तागत हुनैपर्छ । यस्तै गीत सिर्जनामा तल्लीन हुन्छन् । कारण, संगीत नवीनका लागि सोख होइन, साधना हो । भन्छन्, “संगीतलाई सोख मान्ने र प्रचारमा रमाउँलान् । मेरो लागि साधना हो । त्यसैले संगीतमा जीवन खोज्छु ।”
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...