अविश्वसनीय तर सन्देशमूलक [फिल्म समीक्षा : फन्ने खान]
कथामा भावनात्मक रंग दिनुको सट्टा प्रसंगबेगरका कमेडीमा रमाउनु दु:खद पक्ष हो
छोरी घरभित्रै खुम्चनुपर्छ, कलाकारितामा लाग्नैहुन्न भन्ने साँघुरो सोचलाई चिर्न लागिपरेको छ, बलिउड । यस्ता सिनेमाले महिला सशक्तीकरणमा कहीँ न कहीँ योगदान पुर्याउँछन् । प्रचुर गायन भएर पनि बाबुको कारण बाहिर निस्कन नसकेकी छोरीको संघर्ष देखाइएको सेक्रेट सुपरस्टारले काफी प्रशंसा बटुल्यो । यतिबेला छोरीलाई गायिका बनाउन मरिहत्ते गर्ने बाबुको कथा समेटिएको फिल्म प्रदर्शित छ, फन्ने खान । अतुल मान्जरेकर निर्देशित फिल्ममा अनिल कपुर, ऐश्वर्या राय बच्चन, राजकुमार रावको मुख्य भूमिका छ । फन्ने खान बेल्जियन फिल्म एभ्रिबडिज् फेमसको रिमेक हो । कथा र पात्र बलिया भए पनि अविश्वसनीय र नाटकीय प्रस्तुतिले फिल्मलाई अब्बल हुनबाट रोकेको छ ।
आफू मोहम्मद रफी बन्न नसके पनि छोरी लता शर्मा (पिहु सन्द) लाई लता मंगेशकर बनाउने सपना बुनेका छन्, प्रशान्त शर्मा (अनिल) ले । कुनै समयका आर्केस्ट्रा गायक प्रशान्त आºना साथीभाइमाझ फन्ने खानका रुपमा परिचित छन् । स्वर मीठै भए पनि मोटी भएकै कारण लतालाई स्टेजमा मजाकका रुपमा उडाइन्छ । गायिका बन्ने सपनाबाट हार खान्छिन् । त्यही बेला प्रशान्तले आफ्ना साथी अधीर (राजकुमार) सँग मिलेर चर्चित गायिका बेबी सिंह (ऐश्वर्या) लाई अपहरण गर्छन् । उद्देश्य उही, बेबीलाई प्रयोग गरेर छोरीलाई हिट बनाउने । तर, लप्पनछप्पन नजान्ने प्रशान्तको चाह पूरा होला कि अरु तनाव आइलाग्छ ? यसकै वरपर घुमेको छ फिल्म ।
गायिकालाई चाहिने प्रधान गुण हो, श्रुतिमधुर आवाज । तर, स्वर मात्र होइन, शरीर पनि आकर्षक हुनुपर्ने अपेक्षा राख्छ समाज । त्यसैले त, मोटो ज्यान लताको गायन करिअरका लागि अवरोध बनिदिन्छ । हीनताबोध पलाउँछ तर उनका बाबु प्रशान्तचाहिँ छोरीको गायन प्रतिभाप्रति विश्वस्त छन् । आफैँ एकल एल्बम निकालिदिने धोको छ उनको । बाबुछोरीको यही प्रेमिल रसायन फन्ने खानको ‘ब्युटी’ हो । तर, बेबी सिंहको अपहरण भएसँगै फिल्मको लय बिथोलिन्छ । कथावस्तु र पात्र अनुसार यथार्थपरक ढंगले कथा अगाडि बढाउनुको सट्टा नाटकीय बनाइन्छ । प्रशान्तले बेबीको म्यानेजरले टेप रेकर्ड दिएको, प्रशान्त र बेबीको भेट, म्यानेजर र लतासँगको सम्बन्ध, रियालिटी सोमा अपहरणको प्रत्यक्ष प्रसारणलगायतका दृश्यमा निर्देशक मान्जरेकरको परिपक्वता झल्कँदैन । कथामा भावनात्मक रंग लेपन गर्नुको सट्टा प्रसंगबेगरका कमेडीमा रमाउनु दु:खद पक्ष हो ।
साना बजेट र स्टारसँग फिल्म खेल्दाखेल्दै ऐश्वर्याको प्रेमीको भूमिकामा देखिनु राजकुमार रावको छलाङ हो । अनिल कपुर र ऐश्वर्याजस्ता ख्याति कमाएका कलाकारबीच पनि उनी आफूलाई ‘मार्क’ गराउन सफल छन् । ऐश्वर्यासँगको अन्तिम दृश्य ज्यादै प्रेमिल छ । चुलबुले बाबुको भूमिकामा अनिल प्रिय लाग्छन् । आफ्नो उमेर सुहाउँदो शक्तिशाली भूमिकामा ढाल्दै लगेका छन् उनले । चरित्र अनुरुप ऐश्वर्याको सौन्दर्य र आनीबानीले दर्शकको ध्यान तानिरहन्छ । डेब्यु फिल्ममै जीवन्त अभिनय पस्किएकी छन् पिहु सन्दले । आफ्नो शारीरिक बनोटसँग हीनताबोध गर्ने युवतीका लागि उनी आत्मविश्वासको स्रोत बन्न सक्छिन् । खासमा चारै मुख्य चरित्र आ–आफ्नो कोणबाट उम्दा छन् । तर, पटकथा बुन्ने क्रममा कमजोरी भएको छ । त्यसैले मध्यान्तरपछि फिल्म त्यति चोटिलो लाग्दैन । यद्यपि, ‘मोहब्बत...’, ‘हल्का–हल्का...’, ‘अच्छे दिन...’ लगायतका गीतलाई कथावाचनकै रुपमा प्रयोग गरिएको छ ।
प्रभावकारी ‘ट्रिटमेन्ट’ नभएकाले फन्ने खान दर्शकको अपेक्षा पूरा गर्न असमर्थ छ । कताकता कथा नै अलपत्र परेको भान हुन्छ । तर, अनिल, ऐश्वर्या र राजकुमारका लागि मात्र हेर्दा भने निराश हुनुपर्दैन ।
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...