गाउने भनेपछि हुरुक्कै हुन्थिन्, त्रिशाला गुरुङ । परिवारलाई भने उनले गाएको फिटिक्कै मन नपर्ने । परिवार चाहन्थ्यो, नेपाल मेडिकल कलेजमा एमबीबीएस गरिरहेकी छोरीको सबै ध्यान पढाइमै होस् । त्रिशालालाई भने जसरी हुन्छ, गाउनु थियो । तर, गाएको भिडियो रेकर्ड गरेर फेसबुकमा राखुँ भने सबैले थाहा पाउने । भएभरका आफन्त फेसबुकमा ।

त्यही बेला इन्स्टाग्राम आयो, मोबाइलले रेकर्ड गर्दै स–साना क्लिप्स राख्न थालिन् । जुन गीत मन पर्‍यो, गायो, रेकर्ड गर्‍यो अनि विनासम्पादन अपलोड गर्‍यो । एमबीबीएस चौथो वर्षमा अध्ययनरत त्रिशालाले खुसी हुँदै सुनाइन्, “मेरो ‘प्यासन’ मात्र थियो । तर, फलोअर्स ह्वात्तै बढ्यो । अनि त, गाउने लत लागिहाल्यो ।”

यो दुई वर्षमा त्रिशालालाई १ लाख ४० हजारले इन्स्टाग्राममा पछ्याएका छन् । अहिले पनि बेला–मौकामा गीत राख्छिन् । तर, उनको क्रेज यसमा मात्र सीमित छैन । राजधानीका रेष्टुराँमा बरोबर प्रस्तुति दिइरहिन्छन् । युट्युबमा उनको अफिसियल च्यानललाई ६३ हजार ५ सयले सब्सक्राइब गरेका छन् ।

पछिल्लो कभर गीत ‘सपना भई...’ ले युट्युबमा ३६ लाख भ्युज पाएको छ । नेपाल ट्रेन्डिङमै छायो । कन्सर्ट–अफरको ओइरो लागेको छ । भन्छिन्, “यति हिट भइएला भनेर सोचेकै थिइनँ । इन्स्टाग्राम वरदान पो भयो ।”