पुरानै धङधङी [फिल्म समीक्षा : नाईं नभन्नु ल ५]
अघिल्ला संस्करण रुचाएकालाई नाईं नभन्नु ल ५ ले निराश नपार्ला । तर, कथा र प्रस्तुतिमा नयाँपन खोज्नेचाहिँ निराश हुनेछन् ।
नेपाली सिनेमामा दुई प्रवृत्ति हावी छन्– कि हँसाउनै पर्ने कि रुवाउनै पर्ने । छक्कापञ्जा मार्का फिल्ममा जसरी पनि हँसाइ छाड्ने ध्येय राखिन्छ, नाईं नभन्नु ल सिरिजमा जबर्जस्ती रुवाउने । यस्ता फिल्ममा कथा र प्रस्तुति सधैँ ओझेलमा पर्छन् । ताजापन खोजिन्न, उही म्याद गुज्रेको घिसिपिटी शैलीलाई निरन्तरता दिइन्छ । नाईं नभन्नु ल ५ पनि अनुमान गरिएजस्तै छ ।
निर्देशक विकास आचार्य प्रभावकारी कथा भन्न होइन, दर्शकलाई रुवाउन तल्लीन देखिन्छन् । तर, उनले बुनेको केन्द्रीय कथा र प्रस्तुति बासी लाग्छन् । पात्रलाई रुवाउँदै वा क्यान्सरग्रस्त बनाउँदैमा दर्शक पनि सँगै रुन्छन् भन्ने भ्रमले फिल्मको वजन घटाएको छ । आचार्य र सामीप्यराज तिमिल्सिना मिलेर लेखेको पटकथामा पनि खास जादू छैन । संगीत, सिनेमाटोग्राफी, कलाकारको अभिनय र क्लाइमेक्सतिरका दृश्यले साख जोगाएको छ । अघिल्लो संस्करणसँग यो फिल्मको कथाको केही साइनो छैन ।
स्कुल बिदा बनाउन नीर (अनुभव रेग्मी) दिदीको घर इलाम गएका छन् । त्यहाँ अञ्जना (सेड्रिना शर्मा) सँग भेट हुन्छ । छोटै समयमा एकअर्कालाई औधि माया गर्छन् । नीर वयस्क भइन्जेलको कथा देख्न पाइन्छ, जसको मनमा अझै अञ्जनाको अथाह प्रेम छ । उनीहरुको सम्बन्ध र पारिवारिक उतारचढावमै केन्द्रित छ नाई नभन्नु ल ५ । यद्यपि, क्लाइमेक्समा ठूलो नीर (अभिषेक नेपाल) मा लुकेको रहस्यबाहेक अघिल्ला संस्करण हेरेका दर्शकले सबथोक अनुमान लगाउन सक्छन् ।
फुच्चे नीरको आफ्नै उमेरकी केटीसँग माया बस्ने तर केही विघ्न बाधा आइलाग्ने, उनको अभिभावकबीच मनमुटाव हुने घटनाक्रमले यस पटक पनि निरन्तरता पाएको छ । पात्र ‘सेटअप’ मा खर्चिएको सुरुआती आधा घन्टा पट्यारलाग्दो छ । ‘फ्ल्यासब्याक’ र अहिलेको कथालाई सँगै अगाडि बढाउन खोज्दा पटक–पटक किरकिर भएको छ । निरुता सिंहको प्रवेशपछि बल्ल कौतूहल थपिन्छ । बच्चाबच्चीको प्रेम अभिभावक र परिवारसम्म विस्तार हुन्छ । अञ्जना र आमा (प्रियंका कार्की) को सम्बन्ध र अञ्जनाको खुसीका लागि नीरको भूमिकाले जोकोहीको मन जित्छ । तर, निर्देशक पात्रलाई क्यान्सरबाट ग्रसित बनाएर दर्शकको संवेदना जित्ने पुरानै सूत्रबाट प्रताडित हुनुचाहिँ विडम्बना हो ।
नाईं नभन्नु ल सिरिजलाई एउटा संगीन आरोप लाग्ने गरेको छ, बच्चाबच्चीलाई लभ गर्न सिकाएको । ‘अन्डरएज लभ’ सुहाउँदो मानिन्न पनि । तर, यसपटक निर्देशकले यो अस्त्रलाई अझ धारिलो बनाउने प्रयास गरेका छन् । फुच्चे नीर र अञ्जना यति गहिरा संवाद बोल्छन् कि हिजोआजका वयस्कले समेत बुझ्न मुस्किल पर्छ । उमेर नसुहाउँदो संवाद खड्कने अर्को पक्ष हो । पात्रमाथि लेखक हाबी हुादा यस्तै हुन्छ । बरु अभिषेक नेपाल र स्वस्तिमा खड्काको जोडी क्लाइमेक्स नजिकै पुग्दा मर्मस्पर्शी लाग्छ । पात्र धेरै भए पनि बिस्कुनझैँ छरिएका छैनन् । पात्रमाथि निर्देशकको एक खालको नियन्त्रण देखिन्छ । तर, समस्या उही, निर्देशकको मूल ध्याउन्नै रुवाउने छ, त्यो पनि पात्रलाई कमजोर बनाएर । जुन कथानकका हिसाबले आफैँमा विश्वसनीय र मर्मस्पर्शी लाग्दैन ।
यस फिल्मको सबैभन्दा प्रशंसनीय पाटो हो, कलाकारको अभिनय । आकर्षणको केन्द्रमा छिन्, सेड्रिना शर्मा । १२ वर्षीया सेड्रिनाले पात्रलाई पूरापूर आत्मसात् गरेकी छन् । सेड्रिना नेपाली फिल्मका लागि नाईं नभन्नु ल ५ को सुन्दर उपहार हुन सक्छिन् । यही सिरिजबाट चम्किएका बालकलाकार अनुभव रेग्मीको अभिनय सदाझैँ जीवन्त छ । स्वस्तिमा, अभिषेक, प्रियंका, केकी अधिकारी, दिलीप रायमाझीले पनि आफूले पाएको भूमिकामा न्याय गरेका छन् । निरुता सिंहलाई छोटो–मीठो चरित्रमा देख्न पाइन्छ ।
वसन्त सापकोटाद्वारा संगीतबद्ध ‘तिम्रो आँखामा...’ र ‘बालापनको उमेर...’ श्रुतिमधुर छन् । यसले फिल्मको आभा थपेको छ । नाईं नभन्नु ल सिरिजकै पुराना गीतको पटक–पटक प्रयोगले झिंजो लगाउन सक्छ । पुरुषोत्तम प्रधानले इलामको मनोरम दृश्यलाई कैद गर्न कुनै कसर बाँकी राखेका छैनन् । पाश्र्व संगीत ठीकठाक भए पनि कलरिङमा ठाउँ–ठाउँमा समस्या छ । फिल्म थपिएसँगै निर्देशन शिल्पमा देखिनुपर्ने परिपक्वता पटक्कै छैन, निर्देशक आचार्यसँग । सर्जकका रुपमा उनले नाईं नभन्नु ल को धङधङीबाट छुटकारा पाएकै जाती ।
अघिल्ला संस्करण रुचाएकालाई नाईं नभन्नु ल ५ ले निराश नपार्ला । तर, कथा र प्रस्तुतिमा नयाँपन खोज्नेचाहिँ निराश हुनेछन् । खालि बासी सूत्र र संरचनाको हालीमुहाली ।
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...