गुदीमा भन्दा गातामा ध्यान [फिल्म समीक्षा : इन्टु मिन्टु लन्डनमा]
कथा र प्रस्तुतिमा अन्य नेपाली प्रेमकथानक फिल्मभन्दा माथि उठ्न सकेको छैन, इन्टु मिन्टु लन्डनमा । तर, तल पनि छैन । हेर्ने/नहेर्ने आफ्नै मर्जी । अँ, धीरज मगरका प्रशंसकले चाहिँ नछुटाउँदा हुन्छ ।
कुनै जमानाका सुपरहिट निर्देशक तुलसी घिमिरे भन्छन्, “फिल्मको प्रविधि र लगानीमा प्रगति भयो । तर, सोच जहाँको तहीँ छ ।” नयाँ फिल्मकर्मीप्रतिको यो कटाक्ष/व्यंग्य कतिपयलाई घिमिरेको कुण्ठाजस्तो लाग्न सक्छ । तर, गहिरिएर नियाल्ने हो भने घिमिरे–कथनमा सत्यकै पल्ला भारी छ । किनभने, फिल्मको लगानी बढेको छ । तर, कथा र कलात्मक पक्षमा उल्लेखनीय उपलब्धि छैन । आत्मालाई बेवास्ता गर्दै निर्देशकहरु आवरणमा रमाउन थालेका छन् । पछिल्लो उदाहरण हो, इन्टु मिन्टु लन्डनमा ।
भव्य सेट छ, आकर्षक लोकेसन छ, सुन्दर हिरो–हिरोइन छन्, महँगा पहिरन छन्, सुमधुर गीत छ । अर्थात्, यसको गाता चम्किलो छ । तर, गाथा अर्थात् कथा र कथनपद्धतिचाहिँ फितलो । फलत: पर्दामा अभिव्यक्त संवेदना दर्शकसम्म प्रवाह हुन्न । कोरियोग्राफरका रुपमा एक दशक अनुभव संगालेपछि रेनशा वान्तवा राईले फिल्म निर्देशनको ‘कमाण्ड’ सम्हालिन् । फिल्म हेरिरहँदा लाग्छ, निर्माण पक्षबाट उनलाई नपुग्दो केही थिएन । तैपनि, अपेक्षाकृत निर्देशन कौशल देखाउन चुकिन् । उही आवरणमै अल्झिन् उनी पनि ।
नेपालबाट लन्डन गएकी छन्, मीरा (साम्राज्ञीराज्यलक्ष्मी शाह) । त्यहाँ उनको भेट इशान (धीरज मगर) सँग हुन्छ । बिस्तारै नजिक हुन्छन्, माया बस्छ । तर, यो सम्बन्ध मिराका बाबुलाई पटक्कै पाच्य हुन्न । बाबुले मीराको विवाह सैनिक अधिकृत आकाश (सारुक ताम्राकार) सँग तय गरिदिन्छन् र छोरीलाई लिएर नेपाल आउँछन् । इशान र मीराको मायाको डोरो यहीँ चुडिएला त ? सन् ९० को दशकका हिन्दी फिल्मका दर्शकले यसको कथानक विकास सहजै अन्दाज लगाउन सक्छन् ।
माया बस्नु, केही अवरोध आइलागेर छुट्टिनु अनि फेरि माया गाँसिनु वा विछोड हुनु, संसारभर बन्ने प्रेमकथानक फिल्म यही पेरिफेरीमा हुन्छन् । मायालाई मन छुने ढंगले स्थापित गरिएको छ भने मात्र विछोड हुँदा दर्शकको मन भतभती पोल्छ । इन्टु मिन्टु लन्डनमाको आधारभूत समस्या भनेकै इशान र मीराको माया परिपक्वसँग पस्कन नसक्नु हो । उनीहरुलाई बारम्बार भेटेको देखाइन्छ । तर, उतिविघ्न मायाको आभास हुन्न । प्रेम पस्कने शैली पनि नौलो छैन । त्यसमाथि मध्यान्तरअगाडि उस्तै लाग्ने दृश्य बारम्बार दोहोरिन्छन् । पटकथा छरितो नहुनुको परिणाम हो यो । यस्ता अनावश्यक दृश्य सम्पादन गर्ने मौका रेनशाले सदुपयोग गरेकी छैनन् । जबकि, पटकथासमेत रेनशाले अभिमन्यु दीक्षितसँग मिलेर लेखेकी हुन् । कतिसम्म भने कतिपय घटनाहरु ‘फ्ल्यासब्याक’ हो कि वर्तमान, छुट्याउन मुस्किल पर्छ । एवंरीतले लटरपटर गर्दागर्दै मध्यान्तर हुन्छ । तर, यहीँसम्म पनि लन्डनका मनमोहक लोकेसन र साम्राज्ञी–धीरजको ‘केमेस्ट्री’ ले राहतचाहिँ हल्काफुल्का दिइरहन्छ ।
आकाशको प्रवेशसँगै केही समय कथाले गति लिन्छ । उनको चरित्र चित्रणले ध्यान खिच्छ । उनी र इशानको द्वन्द्व खिच्दा निर्देशकले ढंग पुर्याएको आभास हुन्छ । बरु मीराकै चरित्र कमजोर लाग्छ । आधुनिक युवतीको मनोविज्ञान र आकांक्षा समेट्न सकिएको छैन । उनी के गर्छिन्, के पढेकी हुन् भन्नेसम्म भेउ पाइन्न । राजदूत बाबुको छोरीको खुसीमाथिको एकोहोरो हस्तक्षेप पनि उति विश्वसनीय लाग्दैन । बरु लन्डनका नेपालीको जीवनशैली, व्यवहार र लवज स्वाभाविक लाग्छ । अधिकांश संवाद साहित्यिक छन् । सुन्दा गहकिला तर पात्रसँग असुहाउँदो । यस्ता पक्षलाई नजरअन्दाज पनि गर्न सकिन्थ्यो, यदि कथा र समाख्यान सशक्त हुँदो हो त । तर, त्यस्तो अवसर पाइन्न । कारण उही, निर्देशकको जोड ‘हार्डवेयर’ मा छ, ‘सफ्टवेयर’ मा होइन ।
विवाह, इन्गेजमेन्ट वा कुनै जमघट झाराटराइ शैलीमा देखाइएको छैन । धेरै हदसम्म यथार्थपरक ढंगले मिहिनेत गरेर खिचिएको छ । यो फिल्मको सुन्दर पक्ष हो । सबै गीत एकसेएक राम्रा छन् । कोरियोग्राफीले आँखा शीतल बनाउँछ । शैलेन्द्रध्वज कार्कीको खिचाइ फिल्मको अर्को प्रशंसनीय पक्ष हो । तर, डबिङ धेरै ठाउँमा खट्किन्छ । पाश्र्व संगीत दृश्यको भाव अनुकूल छ । इन्टु मिन्टु लन्डनमाको ढोकाबाट प्रवेश गरेको उज्यालो अनुहार हुन्, धीरज मगर । चकलेटी हिरोहरुका तुलनामा उनको काम अब्बल छ । उनी अनमोल केसी, प्रदीप खड्काहरुलाई ‘थ्रेट’ हुन् । अभिनयमा अझ निखार ल्याउन जरुरी त छँदैछ ।
साम्राज्ञीको हकमा चाहिँ शून्य प्रगति । अनुहारको भावभंगीमा र संवाद बोल्ने शैली बनावटी छ । यही स्तरको अभिनय र फिल्म छनोटले उनको आभामय भविष्यको सुनिश्चितता दिलाउँदैन । यसअघि मुख्य भूमिकामा देखिएर पनि जम्न नसकेका सारुकका लागि यो फिल्म प्रीतिकर हुन सक्छ । विवेक लिम्बूले थोरबहुत हसाउँछन् । निर्माताको लगानी अनुरुप निर्देशकका रुपमा रेनशाले प्रतिफल दिन नसकेको तीतो–सत्य हो । आशा छ, आगामी दिनमा गाताजस्तै गुदीमा पनि ध्यान दिनेछिन् ।
कथा र प्रस्तुतिमा अन्य नेपाली प्रेमकथानक फिल्मभन्दा माथि उठ्न सकेको छैन, इन्टु मिन्टु लन्डनमा । तर, तल पनि छैन । हेर्ने/नहेर्ने आफ्नै मर्जी । अँ, धीरज मगरका प्रशंसकले चाहिँ नछुटाउँदा हुन्छ ।
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...