सञ्चारको पासो
ल हेर्नुस् माननीयज्यू, सञ्चार माध्यमको पासोमा हामी मान्छे त के स्वयं भगवान् पनि पर्न थाले ।
सञ्चार माध्यमहरूले सांसदविरुद्ध पासो थापेर, गोप्यता बाहिर निकालिदिएर प्रचारप्रसार गरेर बद्नाम गरेकामा एक जना सांसद महोदयले आपत्ति प्रकट गर्नुभयो । सांसदज्यूलाई मात्र होइन, सञ्चार माध्यमले त सबै वरिष्ठहरुलाई सधैँ पासोमा पार्न खोजिरहेकै हुन्छन् भन्ने उहाँलाई थाहा हुनुपर्ने हो । यसले नेताहरुलाई, मन्त्रीहरुलाई, प्रशासकहरुलाई, ठूलाठूला व्यापारी वा उद्योगपतिहरु, जसलाई पनि मौका पायो कि पासोमा पारिहाल्छन् । सरकारलाई पनि यसले पासोमा अल्झाइरहन्छ, स्थिर भएर काम गर्न दिँदैन ।
यसले पासो नथापेको भए कुन कर्मचारी वा मन्त्रीले कति घुस ज्यूनार गरिरहनुभएको छ, कुन माननीय वा सम्माननीयले राख्दै नराखेको भान्से, अर्दली र ड्राइभरको कति तलब खल्तीमा हाल्नुहुन्छ, पत्तै हुँदैनथ्यो । घर भईभई घरभाडा खाने माननीयज्यूको अनुहार कस्तो हुन्छ भन्ने पनि दुनियाँलाई थाहा हुँदैनथ्यो । कुन न्यायमूर्तिले कति घुस खाएर कति पटक कति जनामाथि अन्याय गर्नुभयो, उहाँका कति वटा जन्ममिति छन्, न्यायमूर्तिको कुर्सीमा बसेर उहाँहरु कस्ताकस्ता चलखेल गर्नुहुन्छ, हामी बाहिरियाहरुलाई पत्तो हुँदैनथ्यो । कुन सन्त वा गुरुले कुन आश्रममा कति जना चेलीको चीरहरण गरे भन्ने पनि सुन्नु पर्दैनथ्यो । कति सन्चो हुन्थ्यो हामीलाई !
थाहा पाउनुभयो नि माननीयज्यू, यिनै सञ्चार माध्यमहरु हुन् समाजमा अशान्ति फैलाउने ! एउटा घटना उचाल्यो, त्यो सेलाउन नपाउँदै अर्को घटना खोजेर ल्याएर झ् याप्प बजारमा बिस्कुन लगाइदिन्छन् । यिनीहरुले पासो नथापेको भए कञ्चनपुरको निर्मला पन्त प्रकरण यसबेलासम्म उहिल्यै रहस्यमय हत्याकाण्डमा परिणत भएर सामसुम भइसक्थ्यो । वायु सेवा निगमको वाइडबडी खरिदमा पासो थापेर गडबडी नगरिदिएको भए सबै कुरा भित्रभित्रै मिलिसक्थ्यो । त्यो कुम्भकर्णे जहाज आएर एयरपोर्टमा लम्पसार परिसकेकै थियो । त्यसको साहूले पाउनुपर्ने भुक्तानी पाइसकेकै थियो । चले चल्थ्यो, नचले सुगतर त्नजीहरुको के जान्थ्यो ? लौ अब हेर त, हाकिम, कर्मचारी, मन्त्री, पूर्वमन्त्री, सचिव कोको पर्ने हुन् पासोमा, खतरा बढेर गएन त ? यी सञ्चारकर्मीहरु न्यारोबडीमै बसेर भए पनि यसो विदेशसिदेश घुमेर चुपचाप बसिदिया भए कसलाई थाहा हुन्थ्यो, यसको खरिदारीमा सुन्दै रिंगटा लागेर पुक्लुक्कै ढल्ने परिमाणको रकम हिनामिना भएको छ भनेर !
पछिल्लो एक रात अलिक सन्चले सुतिएको थियो । बिहान उठ्दा ‘बुद्ध भगवान्’ पासोमा परेको समाचार छ्याप्छ्याप्ती भइसकेछ । बालकैदेखि जंगल पसेर वर्षौंदेखि उतै बसेर हजारौँ भक्तजन पछि लगाएर मस्तले गरी खाँदै आएका रामबहादुर बम्जनका बहादुरीहरु कताकताबाट खोजेर ल्याएर एउटा पत्रिकाले दनादन समाचार छापेपछि हामी फेरि उद्विग्न भइहाल्यौँ । ल हेर्नुस् माननीयज्यू, सञ्चार माध्यमको पासोमा हामी मान्छे त के स्वयं भगवान् पनि पर्न थाले ।
यिनीहरुले यसरी अनेक समाचारका पासोहरु नथापिदिने भए तपाईं–हामीले सधैँ छटपटीमा बाँच्नुपर्ने थिएन । जे हुन्थ्यो, भित्रभित्रै हुन्थ्यो । हामी खानेकुरामा नाममा विष खाँदैछौँ कि, तेलका नाममा सवारी साधनमा हावा भर्दैछौँ कि, दूधका घुट्कासँगै दिसामा पाइने जीवाणु सेवन गर्दैछौँ कि, हामीलाई केही थाहा हुने थिएन । त्यस्ता कुरा थाहा नपाउन पाएको भए हाम्रो प्रेसर बढ्ने थिएन । स्वास्थ्य ठीक हुने थियो । मनमा शान्ति हुने थियो । नेपाल समृद्ध नभए पनि हामी यसै सुखी हुने थियौँ । यी सञ्चार माध्यमले थापेका पासोमा परेर हामी सबैको जिन्दगी धरापमा पर्यो । सकिन्छ भने यिनीहरुलाई अंकुशे लगाउने विधेयक ल्याऊँ है माननीयज्यू !
सम्बन्धित
अब हामी त्यता वरपर गस्ती गर्छौं । ढुंगाहरूमा लठ्ठीले हानेर आवाजहरू निकाल्छौँ, सुसेल्छौँ । ...
सुत्न दे इन्डिया !
स्रोतले कति पटक बिहान माधव नेपाललाई र दिउँसो प्रचण्डलाई प्रधानमन्त्री बनाइसक्यो । साँझमा प...
यस्ता अद्भुत समाचार मित्रहरूले कहाँबाट ल्याउँछन् ?
हामीले पूरा नहुने आशा गरेर आफ्नो स्वास्थ्य बिगार्नुभन्दा पूरा हुने सम्भावना भएका अपेक्षा ग...
नयाँ वर्ष नयाँ आइडिया
नेपालमा भने कोरोना नियन्त्रणको जिम्मा स्वास्थ्य मन्त्रालयले होइन, गृह मन्त्रालयले लिएजस्तो...
प्रहरी लगाऊ, कोरोना भगाऊ !
यो समय त नाकमा मास्क, आँखामा कालो चस्मा र कानमा ठेडी लगाएर चुपचाप घरमा बस्ने समय हो ।...
त्यत्तिकै भ्रष्टाचार भयो भन्ने ?
बाइकवालाले फुऽ गरेको त मापसे पोजिटिभ देखियो । ट्राफिकले समाइहाले । तर बाइकवालाले भने, ‘माप...