नजर नाकातिर
भारत र चीनसँग जोडिएका चिवाभन्ज्याङ र ओलाङचुङगोला नाका खुल्ने आशामा स्थानीय
ताप्लेजुङ– नयाँ शक्ति पार्टीका संयोजक बाबुराम भट्टराईले १४ माघमा मेची महाकाली यात्रा सुरु गर्दा पाँचथरको याङवरक गाउँपालिकाले भव्य स्वागत गर्यो । आफ्नै पार्टीका कार्यकर्ताबाट खादा पनि नलगाउने नीति लिएका भट्टराईको टोलीलाई गाउँपालिकाले गलाभरि खादा र माला थमाइदियो । विद्यार्थीले सडकमा निस्किएर स्वागत गरे । थर्पुस्थित गाउँपालिका भवनअगाडि स्वागतद्वार बनाएको गाउँपालिकाले पूर्वको चर्चित च्याब्रुङ बाजासहित सम्मान गर्यो ।
७० जनाको भट्टराई टोलीलाई थर्पुमा खाजा, च्याङथापुमा खसी मासुसहितको खाना र बस्ने व्यवस्थापन जिम्मा स्थानीय तहले नै मिलाइदियो । फर्कंदा पनि खाना खुवायो । भट्टराईलाई नेकपामा आबद्ध गाउँपालिका अध्यक्ष, उपाध्यक्ष, वडाध्यक्ष, वडासदस्य सबैले अभियान सुरु गर्ने सिमानाका चिवाभन्ज्याङसम्मै पुगेर साथ दिए ।
आफ्नो पार्टीका नगन्य कार्यकर्ता भएको स्थानमा बाबुरामले यति सम्मान पाए कि ताप्लेजुङ र पाँचथरका डेढ सयभन्दा बढी त हिउँ जमेको सिमानासम्मै पुगे । चार वर्षअघि ओलाङचुङगोला नाका खोल्ने भन्दै आएका तत्कालीन माओवादी नेता/कार्यकर्तालाई ताप्लेजुङले यसरी नै साथ दिएको थियो । तत्कालीन प्रमुख जिल्ला अधिकारी चक्रपाणि पाण्डे आफैँ सडकमा निस्किएर सम्मान गरेका थिए । जनप्रतिनिधि नभएको त्यो समयमा हरेक राजनीतिक दलले साथ दिए । ओलाङचुङगोला नाका खुलाउन सरकारलाई दबाब दिन आएको टोलीले सदरमुकाम फुङलिङको केन्द्र वीरेन्द्रचोकमा स्वागत पायो । स्थानीय लिटल बुद्ध आवासीय माविका बालबालिकाले स्वागत नृत्य र नगर परिक्रमासहित बिदाइ गरे । टोली सीमा छेउसम्म पुगेर फर्कियो ।
दुवै भ्रमण राजनीतिक उद्देश्य–प्रेरित देखिए पनि स्थानीयको चासो र आशा भने सीमानाका सञ्चालन थियो । सीमानाकामा सडकको ट्रयाक खुलेसँगै आशा बढेको छ । जसले गरे पनि त्यसमा राजनीति नमिसाएर आफ्नो क्षेत्रको सुन्दर भविष्यका रूपमा लिएको याङवरक गाउँपालिका पाँचथरका अध्यक्ष लेखनाथ घिमिरे बताउँछन् । “जनताको चासो, दबाब र हाम्रो सफलता यही नाकामा छ,” घिमिरे भन्छन्, “जब भारतको सिक्किमबाट गाडी चल्न थाल्छ, तब हाम्रो समृद्धि सुरु हुन्छ ।”
चिवाभन्ज्याङ र ओलाङचुङगोला छिमेकी भारत र चीनसँग जोडिएका सीमा नाका हुन् । दुवै देशसँग सीमा जोडिए पनि ताप्लेजुङको भारततर्फ सडकले जोडिने सम्भावना कम छ । तिम्बुङ पोखरी, कालिखोलालगायतका सीमा जोडिएका क्षेत्र विकट छन् । तर पाँचथरको चिवाभन्ज्याङ ताप्लेजुङको कालीखोलासँगै जोडिएको छ भने याङवरक गाउँपालिकाको उत्तरतर्फको भाग पूरै ताप्लेजुङसँग जोडिएको छ । यी दुई सीमा जोडिएका जिल्ला हुन् । इन्द्रावती र कावेली नदीले सीमा छुट्याएको छ ।
दुवै नाका सञ्चालनमा आए पूर्वी नेपालको समृद्धि यसैमा रहेको चीनसँग सीमा जोडिएको फक्तालुङ गाउँपालिका अध्यक्ष सरोज एभेङ बताउँछन् । त्यसैले चीनसँगको सिमाना टिप्तालाभन्ज्याङबाट ओलाङचुङगोलाको बस्तीसम्म नियमित सडक सञ्चालन गर्न गाउँपालिकाले ४५ लाख रुपैयाँ छुट्याएको छ । यही बजेट खर्चेर चीनबाट स्काभेटर ल्याएर सडक चौडा बनाउने गाउँपालिकाको योजना छ । रातो किताबबाटै हटाइएको दोभान–सुकेटार–लेलेप–ओलाङचुङगोला र तमोर करिडोरलाई केन्द्र सरकारअन्तर्गत राख्ने निर्णय मन्त्रिपरिषद्ले गरेको छ । यी योजना रातो किताबबाटै हटाएपछि ताप्लेजुङबाट निर्वाचित सांसद योगेश भट्टराई आलोचित भएका थिए ।
यी दुवै सडक जोडिए आर्थिक उन्नति हुने र समृद्धि भित्रिने आशा स्थानीयको छ । उत्तर–दक्षिण लोकमार्ग आयोजनाका पूर्वप्रमुख इन्जिनियर कुवेर नेपाली तमोर करिडोर बनेपछि नेपाल र चीनको सीमानाका टिप्तालादेखि प्रदेश १ को हालको राजधानी विराटनगर रानीभन्सारको दूरी २ सय ५१ किलोमिटर मात्रै हुने बताउँछन् । “यो नेपाल, भारत र चीन त्रिदेशीय भन्सार जोड्ने सबैभन्दा छोटो दूरीको सडक हुनेछ”, उनी भन्छन् ।
तमोर नदी चीनतर्फको सीमा टिप्तालादेखि सुरु भई सुनसरीको चतरा छेउसम्म पुग्छ । चिवाभन्ज्याङदेखि मेची राजमार्ग गणेशचोकसम्मको दूरी ३० किलोमिटर छ । मध्यपहाडी यो राजमार्ग गणेशचोकबाट पाँचथर सदरमुकाम फिदिमको जोरसाल हुँदै तेह्रथुमतर्फ लाग्छ भने ताप्लेजुङ सदरमुकाम फुङलिङ जोडिन्छ । फुङलिङबाट तमोर करिडोरको दोभान १७ किलोमिटर मात्रै छ ।
तमोर करिडोरले ताप्लेजुङ, पाँचथर, तेह्रथुम, धनकुटा हुँदै तराईका जिल्ला जोड्छ । यसले दोभानबाट छुट्टिएर मदन भण्डारी राजमार्ग हुँदै संखुवासभा, तेह्रथुम, धनकुटा भएर सुनसरीको धरान जोड्छ । चीनले सीमा नजिकको रिउ बजारलाई विस्तार गर्दै लगेकाले नेपालका लागि सामान आयात–निर्यातको मुख्य केन्द्र हुने चीनसँग जोडिएको फक्तालुङ गाउँपालिका–७ ओलाङचुङगोलाका वडाध्यक्ष छेतेन वालुङ बताउँछन् ।
वालुङका अनुसार यो सडक जोडिन अब ३९ किलोमिटर मात्रै छ । सदरमुकाम फुङलिङबाट सुकेटार हुँदै लेलेपको टाँसीगाउँसम्म सडकको ट्रयाक खोलिसकिएको छ । तिब्बतबाट गोलाको बस्तीसम्म स्थानीय आफैँले लगानी गरेर २४ किलोमिटर ट्रयाक खोलेका छन् । गाउँपालिकाले स्तरोन्नतिमा बजेट छुट्याएको छ भने ट्रयाक खोल्ने काम एलाइट निर्माण प्रालिले गरिरहेको छ । कम्पनीका अनुसार ३९ करोडको ठेक्कामा ५ करोड हाराहारी बजेट सकिएको छ ।
मध्यपहाडी लोकमार्गमा पर्ने थर्पुबजार | तस्बिरहरू : आनन्द गौतम
गाउँपालिका, निर्वाचन क्षेत्र विकास कार्यक्रम र सानिमा हाइड्रो पावरले फुङलिङ नगरपालिकाको हान्दुङदेखि फक्तालुङ गाउँपालिकाको सिस्ने हुँदै गाउँपालिका केन्द्र तापेथोकसम्मको सडक विस्तार तथा स्तरोन्नतिको काम गरिरहेका छन् ।
भारतसँगको सिमाना चिवाभन्ज्याङदेखि बैतडीको झुलाघाट जोड्ने मध्यपहाडी लोकमार्गले देशको राजधानी काठमाडौँलाई पनि छुन्छ । मध्यपहाडी भएर पूर्व पश्चिम जोड्ने लोकमार्गसँगै राजधानी जोड्ने ट्रयाक खुलिसकेको छ । अबको दुई वर्षमा यही लोकमार्ग भएर काठमाडौँ पुग्न सकिने मध्यपहाडी लोकमार्ग आयोजनाफिदिम पाँचथर कार्यालयका प्रमुख अभिमान मुल्मी बताउँछन् । भन्छन्, “दुई वर्षपछि कालोपत्रे सडकमा पूर्वबाट पहाडै पहाड भएर काठमाडौँ पुग्न सक्छौँ ।”
पूर्वी नाका पाँचथरको याङवरक गाउँपालिका केन्द्र थर्पु बजारदेखि तेह्रथुम जोड्ने फिदिम नगरपालिकाको माझीटारसम्म कालोपत्रे भएको छ । थर्पुदेखि चिवाभन्ज्याङसम्म स्तरोन्नति चलिरहेको छ । च्याङथापुदेखि मेची राजमार्ग गणेशचोकसम्मको सडकमा पुल बनिसकेकाले बर्खामा पनि अवरोध हुँदैन । भोजपुरसम्मको सडक हेर्न फिदिममा आयोजना कार्यालय स्थापना भएको छ ।
यो सडकको सुरुआती बिन्दु चिवाभन्ज्याङदेखि झुलाघाटसम्मको दूरी १७ सय ७६ किलोमिटर छ । चिवाभन्ज्याङदेखि करिब ७ सय ९० किलोमिटरमा काठमाडौँ पुगिने पूर्वभौतिक योजना तथा निर्माणमन्त्री हिसिला यमी बताउँछिन् । चिवाभन्ज्याङदेखि खुर्कोटसम्म मध्यपहाडी लोकमार्ग पर्छ । खुर्कोटदेखि काठमाडौँ बीपी राजमार्ग भएर पुगिन्छ । खुर्कोटबाट रामेछाप हुँदै धुलिखेलसम्म लोकमार्ग लैजान ट्रयाक खोल्ने काम भइरहेको छ ।
प्रदेश १ को पाँचथर, तेह्रथुम, भोजपुर, धनकुटा, खोटाङ, ओखलढुंगा, उदयपुर र सिन्धुली जिल्लालाई यो सडकले छोएको छ । सडकले नछोएका हिमाली जिल्ला ताप्लेजुङ, संखुवासभा, सोलुखुम्बुलाई पनि अप्रत्यक्ष लाभ हुनेछ ।
ओलाङचुङगोला र चिवाभन्ज्याङ दुवै नाकामा सशस्त्र प्रहरीको बेसक्याम्प सीमानजिकैको मौवाटारमा राख्ने तयारी छ । अहिलेसम्म चीनतर्फ एक दिनको पैदलमा रहेको गोलाको बस्तीमा मात्रै नेपाल प्रहरीको सीमा प्रहरी चौकी थियो । तत्कालका लागि ओलाङचुङगोलाकै केक्यापको कार्यालय भवनमा राख्ने र संरचना निर्माणपछि माथि सार्ने तयारी भइरहेको प्रमुख जिल्ला अधिकारी अनुज भण्डारी बताउँछन् ।
चिवाभन्ज्याङ छेउमा पनि तत्काल सशस्त्रको क्याम्प बस्ने जानकारी पाएको याङवरक गाउँपालिका अध्यक्ष घिमिरे बताउँछन् । प्रहरी बसे एकअर्को देशमा आवतजावत गर्ने नागरिकदेखि वन्यजन्तु तथा वनस्पति चोरीसिकारी पनि नियन्त्रण हुने अपेक्षा छ ।
चीनले जोड्यो, भारतको बाँकी
सीमा नाकामा चीनले नेपालसँगको सडक जोडेको छ । तिब्बत सरकारले नेपाल सरकारको अनुरोधमा स्काभेटर पनि भाडामा दिएको छ । त्यसैको सहयोगमा स्थानीयले बस्तीसम्म सडकको ट्रयाक खोलेका छन् । सिक्किमले भने चिवाभन्ज्याङसम्म अझै सडकले जोडेको छैन । करिब १७ किलोमिटर ट्रयाक खोल्न बाँकी रहेको चिवाभन्ज्याङका भारतीय सुरक्षा अधिकारी बताउँछन् ।
अहिले चीनका गाडी नेपालको उत्तरतर्फको नाका भएर बस्तीसम्म आउन सक्छन् । तर सिक्किमतर्फ सडक नजोडिएकाले सिमानादेखि बस्तीसम्म हिँड्नुपर्छ ।
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...