विमानस्थलमा बीपीलाई देख्दा
बीपी काठमाडौँ उत्रिनुअगावै नेता कृष्णप्रसाद भट्टराई, दमननाथ ढुंगाना, नेविसंघ अध्यक्ष विपिन कोइरालालगायत हजारौँ कार्यकर्तालाई पञ्चायती प्रशासनले बिहानै ७ बजे पक्रिएर हनुमानढोका हुँदै नख्खु जेल पुर्यायो । कांग्रेस समर्थक नेता/कार्यकर्तालाई ठाउँका ठाउँ पक्रियो, बीपीको स्वागतमा जनलहरको उभार आउने आशंकामा ।
स्कुले जीवनमै कांग्रेस समर्थक रहे पनि पार्टीका वरिष्ठ नेताहरुसँग ०३३ पछि मात्रै भेटघाटको अवसर जुर्यो । त्यसअघि बीपी कोइराला, गणेशमान सिंह, शैलजा आचार्यलगायतका कांग्रेस नेताहरुबारे सुनिन्थ्यो मात्र । उनीहरु प्रवासमा थिए । बीपीलगायतका नेताले बिनाकसुर ८ वर्षसम्म पञ्चायती शासनको बन्दी जीवन बिताएपछि ०२५ मा स्वेच्छिक निर्वासन रोजे । तर निर्वासनमै रहेका बेला भारतमा प्रधानमन्त्री इन्दिरा गान्धीले संकटकाल घोषणा गरिन् । नेपालको पूर्वी क्षेत्र नजिकको सानो राष्ट्र सिक्किमलाई भारतले आफूमा विलय गरायो । प्रवासमा भएका यी दुई घटनाले बीपीमा नेपालको सार्वभौमसत्ताबारे चिन्ता थपिदियो । त्यसकारण बीपी, गणेशमानलगायत निर्वासन त्याग्ने निर्णय गर्दै १६ पुस ०३३ मा नेपाल फर्किए ।
त्यसताका म पद्मकन्या क्याम्पसमा बीए अध्ययनरत थिएँ । १६ पुस दिउँसो ११ बजे बीपीको जहाज त्रिभुवन अन्तर्राष्ट्रिय विमानस्थलमा उत्रने समय निर्धारण गरिएको थियो । तर बीपी काठमाडौँ उत्रिनुअगावै नेता कृष्णप्रसाद भट्टराई, दमननाथ ढुंगाना, नेविसंघ अध्यक्ष विपिन कोइरालालगायत हजारौँ कार्यकर्तालाई पञ्चायती प्रशासनले बिहानै ७ बजे पक्रिएर हनुमानढोका हुँदै नख्खु जेल पुर्यायो । कांग्रेस समर्थक नेता/कार्यकर्तालाई ठाउँका ठाउँ पक्रियो, बीपीको स्वागतमा जनलहरको उभार आउने आशंकामा ।
बीपीलगायतका नेताहरु बिहान ११ बजे विमानस्थलमा उत्रिए । उनीहरुलाई स्वागत गर्न त्यहाँ उपस्थित हामीहरुमाथि पनि प्रहरीले अन्धाधुन्ध लाठी बर्सायो/धरपकड गर्यो । गृहमन्त्री जोगमेहर श्रेष्ठ नेतृत्वको पञ्चायती शासनका कर्ताधर्ताले कांग्रेस समर्थक नेता/कार्यकर्ता र शुभेच्छुक सबैमाथि बीपी स्वागत/सत्कारमा आएको भन्दै अमानवीय व्यवहार गरे । बीपीलाई स्वागत गर्न रामचन्द्र पौडेल, लीला कोइराला, बिना कोइरालालगायतका सयौँ कांग्रेस समर्थक नेता/कार्यकर्ता विमानस्थल गएका थियौँ ।
विमानस्थलमा प्रहरी र पञ्च समर्थकको लाठीमुंग्री चलिरहेका बेला बहालवाला गृहमन्त्री श्रेष्ठले हामीलाई अपशब्द बोले । विद्यार्थी नेतृ बिनाले जोगमेहरको कठालो समातिन् । बिनालाई प्रहरीले पक्रियो । महिलामाथि अशिष्ट व्यवहार र बोलीका कारण कठालो समाउँदा अंगरक्षक र प्रहरीले नै सुरक्षा दिएर श्रेष्ठलाई भीडबाट छुटाउनुपरेको थियो । त्यतिबेला बिना साझा स्वास्थ्य संस्थामा जागिरे थिइन् । बीपीको स्वागतमा सहभागिता जनाएकै आरोपमा उनको जागिरसमेत खोसियो ।
बीपी, गणेशमान विमानबाट ओर्लिन नपाउँदै प्रहरीले जीपमा हुल्यो । दुवै जनालाई महाराजगन्ज पुलिस प्रशिक्षण केन्द्रमा लगियो । हामी 'प्रजातन्त्र जिन्दावाद, गृहमन्त्री मुर्दावाद, पञ्चायती व्यवस्था मुर्दावाद' भन्दै नारा लगाइरहेका थियौँ । विमानस्थलको अन्यत्र बाटो प्रयोग गरी नेता बीपी र गणेशमानलाई प्रहरीले महाराजगन्ज पुर्याएछ ।
पञ्च कार्यकर्तासहित विमानस्थल पुगेका गृहमन्त्री श्रेष्ठले समेत बीपी, गणेशमान र कांग्रेसलाई राष्ट्रघाती, देशद्रोही करार कर्दै नारा लगाइरहे । देशको राष्ट्रियता संकटमा परेको भन्दै स्वदेश फर्किएका बीपीलाई राजतन्त्र समर्थकले राष्ट्रद्रोही र फाँसीको सजायसमेत माग गरे । बीपी भने राजासँग सुलह गरेर प्रजातान्त्रिक व्यवस्था ल्याउने अभियानमा अगाडि बढिरहे । बन्दी अवस्थामै रहेका बेला बीपी बिरामी परे । ०३४ भदौमा राजा वीरेन्द्रले उपचारका लागि अमेरिका जान स्वीकृति दिए । अमेरिकामा उपचार गराएर १५ कात्तिक ०३४ मा स्वदेश फर्किए ।
राजासँग सम्झौता गरेर देशमा प्रजातन्त्र ल्याउने बीपीको मनसाय थियो । उनीमाथि लागेका ७ वटा मुद्दा खारेज हुँदै गए । अन्तर्राष्ट्रिय दबाबका कारण उनीमाथि थोपरिएका मुद्दा खारेजीका लागि पञ्चायती शासनले अञ्चल अदालत हेटौँडाका न्यायाधीश जनकमान श्रेष्ठ अध्यक्षताको इजलास तोक्यो । उनको इजलासमा पेस भएका सबै मुद्दा क्रमशः खारेजी प्रक्रियामा गए । बीपी पक्षबाट मुद्दा हेर्ने जिम्माचाहिँ गणेशराज शर्माले लिएका थिए । ०३५ वैशाखमा बीपीमाथिका सबै मुद्दा खारेज भए । त्यसपछि विद्यार्थी आन्दोलन सुरु भइहाल्यो । त्यो आन्दोलनले देशलाई जनमतसंग्रहको बाटोमा पुर्यायो । जनमतसंग्रह घोषणापछि काठमाडौँमा भएका जनसभामा बीपीसँगै मैले पनि बोल्ने अवसर पाएँ ।
प्रस्तुति : गोकुल अर्याल
सम्बन्धित
कम्युनिस्ट पार्टीको गुपचुप गतिविधि गरिरहेका नरबहादुर कम्मर र छाती दुवैतिर जापानी, भारु, ने...
थैले काण्डमा पक्राउ पुर्जी
नारदमुनि स्वयंले अंग्रेजी पढाउँथे । ब्रिटिस फौजको जमदार भएका र त्यति धेरै नपढेका उनले हाम...
नारदमुनि थुलुङको सम्झना
हुन त कतिपयले ममा भारतीय कलाकार मकबुल फिदा हुसैनको प्रभाव परेको भन्ठान्छन् । तर भक्तपुरमा ...
यस कारण घोडाचित्र
राजा वीरेन्द्रले आफ्ना निजी सचिव चेतबहादुर कुँवरमार्फत ६० हजार रुपैयाँ पठाइदिए । त्यही पै...
राजाले दिएको टिकटमा अमेरिका
सरकारी स्वामित्वको अखबार भएको हुँदा व्यवस्थाको विरोध गरेर गोरखापत्रमा व्यंग्यचित्र बनाउन प...
अखबारमा कार्टुनकारिता
जापानको फुकुओका आर्ट म्युजियममा पहिलोपल्ट आयोजित एसियाली कला प्रदर्शनीमा दस अवतार सिर्जना ...