स्याबास भन्न सकिएन (फिल्म समीक्षा : ए मेरो हजुर ३)
कथा र प्रस्तुतिमा सिर्जनशीलता खोज्नेलाई ए मेरो हजुर ३ झेल्न सकस पर्छ । यस्ता फिल्म आउँछन्, जान्छन्, अरु योगदान हुँदैन । मसलेदार फिल्मका पारखीलाई भने प्रिय लाग्न सक्छ ।
सुकिलामुकिला हिरो-हिरोइन, कमेडी, रोनाधोना, रोमान्स, एक्सन अनि हिमालका आकर्षक दृश्य कैद गरिएका गीत । नेपाली लभस्टोरी सिनेमामा यस्ता मसला छुट्दैनन् । छुट्छ त केवल, प्रेम । सोही कारण दर्शकको पनि मनजित्दैनन्, यस्ता फिल्मले । झरना थापा निर्देशित ए मेरो हजुर ३ सालाखाला यही कोटिमा पर्छ ।
बलिउड र कैयौँ नेपाली फिल्ममै देखिएको पुरानो कथालाई नयाँ रंगमा ढाल्ने प्रयास मात्र छ उनको । स्वघोषित 'मेगास्टार' अनमोल केसीको अभिनय र चरित्र पनि निराशाको निरन्तरता मात्र हो । डेब्यु हिरोइन सुहाना थापाचाहिँ 'सरप्राइज' लाग्छ ।
गायक प्रेम (अनमोल) को क्रेज लोभलाग्दो छ । लाखौँ फ्यानमध्ये एक हुन्, आर्या (सुहाना) ।उनी प्रेमलाई असाध्यै मन पराउँछिन् तर त्यत्रा स्टारसँग भेट्न कहाँ पाउनु ! बरु प्रेमीझैँ देखिने घनश्यामसँग भेट भइरहन्छ । घनश्यामलाईघृणा गर्छिन् । संयोगले उनको प्रेमसँग चिनजान हुन्छ, सान्निध्य बढ्छ । तर प्रेमलाई आफ्नो बनाउने उनको चाह पूरा होला ? यसकै वरपर घुम्छ, फिल्म । क्लाइमेक्ससमेत परम्परागत ढर्राभन्दा माथि उठ्न सकेको छैन ।
निर्देशक सर्जक हो । नयाँ सिर्जना दृश्यभाषामार्फत व्यक्त गर्नु निर्देशकको जिम्मेवारी । झरनालेचाहिँ नवीनता पस्कने प्रयासै गरेकी छैनन् । उनी हिरोइन हुँदाताकाकै कथालाई उल्टाइपल्टाई मात्र गरेकी छन् । यद्यपि अचेल बनिरहेका अन्य लभस्टोरी सिनेमाका निर्देशकले जस्तै लत्तो छाडेकीछैनन् । आइडिया रोचक नभएपनि खिच्ने मामलामा सजगता देखिन्छ । तर समस्या उही, चरित्रचित्रण, कथाको परिवेश, विकासक्रममा ताजापन छैन । आँत भरिन्न । मध्यान्तरअघिसम्म हँसाउन जबर्जस्ती तन्काइएको छ, क्लाइमेक्सतिर रुवाउन । मुख्य मात्र होइन, सहायक पात्रसमेत बासी मानसिकताकै उपज हुन् ।
मध्यान्तरसम्म कथामा कुनै प्रगति हुन्न । लाग्छ, आर्याको जीवनको उद्देश्य, प्रेमलाई पाउनुभन्दा अर्को छैन । प्रेमको हालत पनि उस्तै । आर्याका साथीहरुको काम कमेडी गर्ने मात्र हो,मूलकथामा योगदान छैन । उनीहरुका अश्लील मजाक र त्यस्ता दृश्यको लम्बाइले निर्देशकको नियतमाथि प्रश्न उठाएको छ ।आमफिल्मझैँ मध्यान्तरपछि फिल्म एकाएक रोनाधोनातिर मोडिन्छ । मुख्य पात्रका जीवनमा यावत् झमेला आइलाग्छन्। तर तिनलाई यति सतही र हतारिएर देखाइन्छ कि त्यो पीडा आत्मसात गर्न सकिन्न । हँसाउनकै खातिर लामा र अनावश्यक दृश्य खर्चिएकी निर्देशकले पात्रभित्रको उकुसमुकस पोख्नचाहिँ संवादकै भर परेकी छन् । यसले पनि पात्र र दर्शकको दूरी बढ्दै जान्छ ।
चार जनाले पटकथा लेखेको भए पनि सिर्जनशील र मनछुने दृश्यको खडेरी छ । पहिल्यै हेरिसकिएका घटनाको जोडजाडजस्तो मात्र लाग्छ । कलाकार नयाँ लिने, कथाचाहिँ पुरानैमा अल्झने प्रवृत्तिले प्रगति कसरी होला ? लोकेसन, पात्र पहिरन, साजसज्जाजस्ता पक्षमार्फत दृश्य 'रिच' बनाउन भने कुनै कसर बाँकी राखिएको छैन ।
काठमाडौँबाट सुरु कथा पोखरा हुँदै अमेरिकासम्म पुग्छ । दृश्यको भावअनुकूलको खिचाइ फिल्मको प्रशंसनीय पक्ष हो । तर पाश्र्वध्वनिचाहिँ सुरुदेखि अन्त्यसम्म 'लाउड' छ । कतै-कतै त पाश्र्वध्वनिकै कारण पर्दाप्रति विरक्ति पैदा हुन्छ । गीत श्रुतिमधुर छन् । भलै, कथावाचन प्रभावकारी बनाउन अपेक्षाकृत ढंगले सदुपयोग गरिएको छैन ।
गितार झुन्डाउँदैमा गायक र वरपर 'मुस्तन्डे' बडीगार्ड राख्दैमा सुपरस्टार हुँदैन भनेर निर्देशक र अनमोलले बुझ्नुपर्छ । सुरुआतको कन्सर्टबाटै अनमोलको उपस्थिति नीरस लाग्छ । आफ्नो पात्रप्रति स्नेह पैदा हुने अभिनय पस्किएका छैनन् । उनको काममा निखार आउनुको सट्टा थप बनावटी हुँदै जानु करिअरकै लागि घातक हो । उनले आत्मरति र प्रायोजित प्रशंसाको घेराबाट बाहिर निस्केर आत्ममूल्यांकन गर्ने बेला घर्किसकेको छ । जसरी ड्रिम्समा साम्राज्ञीराज्यलक्ष्मी शाहको छायामा परेका थिए, यसपटक उसैगरी सुहानाको ।
अनमोलको तुलनामा सुहानाको 'स्क्रिन -टाइम' बढी छ । पात्रको आन्तरिक भोगाइलाई उनले धेरैहदसम्म आत्मसात गरेकी छन् । उतिविघ्न प्रभावकारी भूमिका नभए पनि सलोन बस्नेतले 'रिफ्रेस' गराइरहन्छन् । अर्पण थापा र रवीन्द्र झाको चरित्र 'क्लिसे' र अभिनय 'लाउड' लाग्छ । बासी कथा र शैलीमा मग्न भएकाले निर्देशक झरनालाई स्याबासी भन्न सकिन्न ।
कथा र प्रस्तुतिमा सिर्जनशीलता खोज्नेलाई ए मेरो हजुर ३ झेल्न सकस पर्छ । यस्ता फिल्म आउँछन्, जान्छन्, अरु योगदान हुँदैन । मसलेदार फिल्मका पारखीलाई भने प्रिय लाग्न सक्छ ।
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...