सार्थक सिक्वेल (फिल्म समीक्षा : जात्रै जात्रा)
सुन तस्करीमात्र होइन, वर्गीय विभेद, घरेलु हिंसा, आडम्बर, धार्मिक अन्धता, चोरबाटोबाट धनी बन्नेजस्ता वर्तमान समाजका प्रवृत्तिमाथि कटाक्ष गरिएको छ । पार्श्वध्वनि अलि ककर्श लाग्छ । खिचाइ र सम्पादन प्रशंसनीय छ ।
बेतुक र बेप्रसंगका दृश्य/संवादमार्फत हँसाउन खोजिने तथाकथित कमेडी फिल्मको महामारी छ हामीकहाँ । हँसाउनकै खातिर छाडापनको सहारा लिइन्छ । सिक्वेल फिल्मको लहर उस्तै छ । तर कथाको मागभन्दा हिट फिल्मको ब्याज खान सिक्वेल बनाइन्छ । कतिले त सिरिजलाई पनि सिक्वेल भनेरै प्रचार गर्छन् । दर्शक रनझुल्ल ! यी संक्रमणबाट मुत्त छ, जात्रै जात्रा । यो पूरापूर कमेडी फिल्म हो, तर गति छाडिएको छैन । सिक्वेल हो तर ‘ब्रान्ड भ्यालु’ बेच्नेनियत मात्र छैन, कम्तीमा जात्राको ‘सिचुएसनल’ हास्यको विरासत थामेको छ । प्रशंसाको पहिलो हकदार हुन्, लेखक/निर्देशक प्रदीप भट्टराई । उनले कथा र कथ्य संरचनाको मर्म आत्मसात गर्दै हास्य सिर्जना गरेका छन् । विपिन कार्की, रविन्द्रसिंह बानियाँ, रवीन्द्र झा, दयाहाङ राईजस्ता कलाकार त उम्दा हुने भइहाले ।
नक्कली नोट कारोबारको आरोपमा तीन वर्ष जेल बसेर छुटेका छन्, फणिन्द्र (विपिन), जोयश (रविन्द्रसिंह) र मुन्ना (रवीन्द्र) । अदालतले उनीहरुलाई ‘क्लिन चिट’ दिए पनि समाजले अपराधीजस्तो व्यवहार गर्छ । पहिलेझैँ पैसाको संकटले पिरोल्छ, खानेबस्ने नै टुंगो हुन्न । फणिन्द्रको हालत अझ खराब छ, पत्नी सम्पदा (वर्षा राउत)ले सम्बन्धविच्छेद गर्दैछिन् । यही रापकाबीच फणिन्द्रले १० किलो सुन भेट्छ । मालामाल हुने सपना बुन्छ । यसमै मिसिन्छन्, जोयश र मुन्ना । तर दावा (दयाहाङ राई)को हिंस्रक ग्याङले उनीहरुलाई सुन पचाउन देला ? नक्कली सुनले पहिलेझैँ फसाउने पो कि ?यस्तै सवालमा रुमल्लिएको छ फिल्म । क्लाइमेक्स शानदार मात्र होइन, अनुमानसँग मेल खाँदैन पनि ।
जात्रा जहाँ सकिएको थियो, जात्रै जात्रा त्यहीँबाट सुरु हुन्छ । मुख्य पात्रको चालढाल र पीडारोदन उस्तै छ । थपिएका छन् त दावा र उनको अवैधानिक सुन । पुराना पात्रका दुःखका नयाँ शृंखला अनि नयाँ पात्रलाई स्थापित गर्न खर्चिएको सुरुआती २० मिनेट खुकुलो छ । एकपछि अर्को घटनामा फड्को मार्न हतारिएको भान हुन्छ । ‘भ्वाइस ओभर’ अनावश्यक लाग्छ । तर विस्तारै फिल्मले लय समात्छ । सुन लुकाउन फणिन्द्रहरुको माथापच्ची, दावाका साथी र बोसको व्यवहारले रोचकता थप्छ । सुन तस्करी शैली, समूहभित्रै एकअर्काप्रतिको अविश्वास, छद्मभेषी तस्कर हामीले देखे–सुनेझैँ लाग्छ । सुनवाला प्लट ३३ किलो सुनकाण्डबाट प्रभावित देखिन्छ । भलै निर्देशकले चलाखीपूर्वक आफ्नो केन्द्रीय कथासँग जोडेका छन् ।
असनको गल्ली वरपर घुमेको थियो, जात्रा । पात्र र कथा मौलिक थिए । उनीहरुको भोगाइमा काठमाडौँका ‘आउटसाइडर’हरुले आफूलाई पाउँथे । यी गुण जात्रै जात्रामा पनि निरन्तर छन् । तर असनको गल्ली नाघेर बौद्ध क्षेत्रदेखि पोखरासम्म पुगेको छ, फिल्म । सिक्वेलको बिझाउने पक्ष भनेकै पात्र र संरचना दोहोरिन्छन् । नयाँ माहोलअनुभूत गर्न पाइन्न । सर्जकका लागि यो आफैँमा घातक हो । सीमित दायरामा खुम्चनुपर्छ । यहाँ यस्तै भएको छ । जात्राभन्दा यसपटक निर्देशक/निर्माताको लगाव बजारु तफ्वसँग अलिक बेसी छ । तर उही, जात्रा हिट भयो, अब जस्तो बनाएपनि चल्छ भन्ने मानसिकताबाट ग्रसित छैनन् । हरेक दृश्यलाई विश्वसनीय र आधिकारिक बनाउन यथासक्य मिहिनेत देखिन्छ ।जात्रामा गीत थिएन, यसमा दुई गीत छन् । तर कथा प्रवाहलाई बिथोल्ने गरी राखिएको छैन ।
जात्राको तुलनामा ‘प्रोक्डसन भ्यालु’ भव्य छ । पर्याप्त पन्चलाइन छन् । दोहोरो अर्थ दिने संवाद र दृश्य छन् । तर प्राकृतिक ढंगले पर्दामा आउने भएकाले कन्पारो तात्दैन, बरु रमाइलो लाग्छ । सुन तस्करीमात्र होइन, वर्गीय विभेद, घरेलु हिंसा, आडम्बर, धार्मिक अन्धता, चोरबाटोबाट धनी बन्नेजस्ता वर्तमान समाजका प्रवृत्तिमाथि कटाक्ष गरिएको छ । पार्श्वध्वनि अलि ककर्श लाग्छ । खिचाइ र सम्पादन प्रशंसनीय छ ।
जात्राझैँ जात्रै जात्राको केन्द्रमा विपिन नै छन् । उनको लबज, हाउभाउ र व्यवहार दर्शकलाई प्रिय लाग्छ । उनीजस्तै चरित्रलाई आत्मसात गर्ने कुशलताले भरिएका अभिनेताको खडेरी छ । यसबाट विपिनको लोकप्रियताको दायरा थप फराकिलो बनाउनेछ । निर्माता रविन्द्रसिंह बानियाँले अब्बलता पस्किएका छन् । पात्रलाई जीवन्त बनाउने मामलामा विचलित छैनन् । जात्राबाट चम्किएका रवीन्द्र झा सिक्वेलमा पनि प्रभावशाली छन् । उनको निर्दोषपनाले मन जित्छ । दयाहाङचाहिँ सिक्वेलको ‘बोनस’ हुन् । नकारात्मक भए पनि यो चरित्रले उनका फ्यान फुरुंग हुनेछन् । पुरुष कलाकारको भीडमा वर्षा हराएकी छैनन् । विपिन र उनको मौन प्रेमले आँखा रसाउँछ । शत्रुगतेमा हास्यसिनेमाको आधारभूत धर्मबाट विचलित भएका निर्देशक भट्टराई फेरि ‘ट्र्याक’मा आएका छन् । अब सिक्वेलभन्दा नवीन सिर्जना अपेक्षा छ, उनीबाट । सिर्जनशील निर्देशकको दायित्व पनि त्यही हो ।
विषयवस्तु सम्झनालायक छैन,न्यारेटिभ पनि पुरानै हो । तर कथा र पात्रअनुरुप पैदा गरिएको स्वाभाविक कमेडीले जात्रै जात्रालाई हेर्नलायक बनाएको छ । हाँस्दाहाँस्दै सवा दुई घन्टा बित्छ । यति सार्थक सिक्वेल हामीकहाँ असाध्यै कम बनेका छन् ।
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...