फिल्मी फन्डा
रातारात हिट हुने होडमा प्रायोजित प्रेम र लफडाको लहरोले कलाकारको साख खस्कँदो
बर्षा राउत र वर्षा शिवाकोटीले सँगसँगै करिअर सुरु गरे, एकअर्कासँग मिल्थे पनि । तर एकाएक छेडखानी गर्न थाले । दुई समकक्षी हिरोइनबीच दुस्मनी भएपछि मिडियालाई मसला भइहाल्यो । दूरी बढ्दै गयो । संयोग पनि कस्तो, राउतको जाक्रै जात्रा र शिवाकोटीको वीरवित्रम २ एकै दिन प्रदर्शन भयो,३ जेठमा । ‘दुई वर्षाको भिडन्त’ मार्काका समाचार छ्यापछ्याप्ती आउन थाले । यही मौकामा शिवाकोटीले फेसबुकमा राउतलाई सम्बोधन गर्दै आफूहरु मिल्ने साथी भएको, तर मिडियाले दुस्मन भनेर प्रचार गरेको भन्दै सहानुभूति बटुल्न खोजिन् । फेरि भटाभट गसिप आए । जसरी भए पनि प्रचार भयो, वर्षाद्वयको ।
दुई वर्षाको मिलन–विछोडको चर्चा यहीँ सेलाएन । फिल्मरिलिजपछि एकअर्कालाई व्यंग्य गर्दै स्टाटस लेखिरहे । त्यति मात्र होइन, हलमा सँगै फिल्म हेरेर फोटोसेसनसमेत गराए । अर्थात्, फिल्म प्रदर्शन अवधिभर समाचारमा छाइरहे । तर उनीहरुलाई नजिकबाट चिन्नेहरुको दाबी छ, अहिले पनि सम्बन्ध सुमधुर छैन । फिल्म चलेका बेला फन्डा मात्र गरेका हुन् । वर्षाको तर्क छ, “मैले प्रचारका लागि स्टाटस लेखेकी होइन । सही समयमा मेरो कुरा बाहिर ल्याएकी हुँ । तर यसबाट चर्चा भएर फाइदा पुग्छ भने के गर्न सक्छु र ?” भलै वीरविक्रम २ बक्स अफिसमा फेल भयो ।
निर्माता छविराज ओझालाई फन्डा गर्न कसले भ्याउने ? लज्जाबाट सुरु भएको उनी र शिल्पाको अफेयरको हल्ला मंगलम्सम्म आइपुग्यो । शिल्पाले कहिले छविसँगको सम्बन्धबारे समाचार आउँदा आफू व्यक्तिगत रुपमा तनावमा फसेको भन्दै सहानुभूति बटुलिन् । कहिले आफूहरु साँच्चै प्रेममा रहेको अभिव्यक्ति दिइन् । कहिले फिल्म प्रचारकै लागि प्रेमसम्बन्धको ‘कन्ट्रोभर्सी’ सिर्जना गरेको स्वीकारिन् । जब उनीहरुको फिल्म रिलिज नजिकिन्थ्यो, तब प्रेमको हल्ला चलाउँथे । शिल्पालाई अभिनयभन्दा छविसँगको सम्बन्धले ज्यादा चर्चा दिलाएको छ । यस्तै हथकण्डाले छविको छवि नै बिग्रियो ।
निर्माता माधव वाग्ले नक्कली मुद्रा अपचलनको आरोपमा समातिए । एक हिरोइनले अनौपचारिक कुराकानीमा ‘चंगाचेटको प्रमोसनका लागि फन्डा गरेको’ भनेर हल्का प्रतिक्रिया दिइन् । फिल्म चलाउन व्यक्तिगत छविमा आँच आउने यस्तो हर्कत कसैले गर्ला भन्ने प्रश्नमा उनले हाँस्दै जवाफ फर्काइन्, “किन नगर्नु, हाम्ले त के–के गर्यौँ ।”
एउटा भनाइ छ, ‘नाम होस् या बद्नाम, तर गुमनाम नहोस् ।’ अधिकांश फिल्मकर्मी यसैलाई शिरोधार्य गर्न तँछाडमछाड गर्छन्, जसलाई चर्चामा आउन पाए पुग्छ, सकारात्मक वा नकारात्मक भन्ने छैन । अझ कति त ठाडै भन्छन्, ग्ल्यामर क्षेत्र हो, प्रमोसन चाहिन्छ, त्यसैले नकारात्मक हल्लाले पनि फाइदै पुग्छ ।
फिल्म रिलिजताका मिडिया र सामाजिक सन्जालमा छाउन सस्ता हथकण्डाको सहारा लिनेको कमी छैन । तर यस्तै कन्टेन्टबाट समाजमा आफ्नो छवि निर्माण गर्ने तथ्य ख्याल गर्दैनन् । बरु बरोबर गुनासो गरिरहन्छन्, ‘हामी फिल्मकर्मीले सम्मान नै पाउँदैनौँ ।’
जति आधुनिक भनिए पनि सिनेकर्मीलाई हेर्ने सामाजिक दृष्टिकोण अझै संकुचित छ । “समाजमा थिएटर वा चित्रकलाका कलाकारझैँ फिल्मका कलाकारको प्रतिष्ठा छैन । यसमा हामी सबै जिम्मेवार छौँ,” अभिनेत्री केकी अधिकारी भन्छिन्, “हामी सार्वजनिक मञ्चमा कसरी प्रस्तुत भइरहेका छौँ, आफैँलाई नियालौँ । कारण थाहा भइहाल्छ ।”
केकीकै कुरा गरौँ । डेढ वर्षअघि चलचित्र पत्रकारलाई इमेल आयो– ‘केकी र आर्जन पाण्डे प्रेम सम्बन्धमा छन् ।’ लगत्तै त्यो खबर भाइरल भयो । त्यसअघि खासै नाम नसुनिएका आर्जन केकीसँग नाम जोडिएपछि लगातार समाचारमा छाए । त्यसयता केकीका फिल्म होइन, यही अफेयरको बढी चर्चा हुन थालेको छ । भन्छिन्, “हामीबीच प्रेमसम्बन्ध छैन, तर कतिपयले यस्तै अफेयरलाई माध्यम बनाएर चर्चा कमाउन खोज्छन् । त्यसैले होइन भन्दा पनि पत्याउने अवस्था छैन । समाजले सामान्यीकरण गरेर हेरिदिन्छ ।” उनले भनेजस्तै नितान्त व्यक्तिगत मानिने प्रेमलाई सार्वजनिक गरेर ‘लाइमलाइट’ मा आउन खोज्नेको जमात सानो छैन ।
हिम्मतवाली रिलिजताका रेखा थापा र दुवै हात नभएका हिरो सुदर्शन गौतम मिडियासामु प्रेमीप्रेमिकाझैँ प्रस्तुत भए । हलबाट फिल्म उत्रियो, सम्बन्ध सकियो । अहिले सुदर्शनलाई मानव तस्करी अभियोगमा प्रहरीले खोजिरहेको छ । फिल्म प्रमोसनकै लागि हिरोसँग लभ परेको हल्ला चलाउने आरोप लाग्ने गरेको छ, अभिनेत्री/निर्मात्री पूजा शर्मालाई पनि ।
ए मेरो हजुर ३ चलिरहँदा झरना थापाले अनमोललाई ‘ज्वाइँ’ भनेको चर्चा चल्यो । फिल्ममा अनमोलका साथ झरनाकी छोरी सुहानाले अभिनय गरेकी थिइन् । त्यसैले प्रमोसनकै खातिर यसो गरिएको थियो भनेर शंका उब्जिनु स्वाभाविक भइहाल्यो । जेरी चल्ने बेला अनमोलको नाम हिरोइन आना शर्मासँग जोडिएको थियो । आश्मा डिसी र संयम पुरीको प्रेम हटकेक भएको थियो, आभाष प्रदर्शनताका । लभसबको समय करिश्मा श्रेष्ठ र सलोन बस्नेत ‘लभ बर्ड’ को रुपमा प्रस्तुत भए । फिल्म फ्लप भयो, सम्बन्ध टुक्रियो ।
फूलैफूलको मौसम तिमीलाई हलमा लाग्ने बेला नीता ढुंगाना र आमेश भण्डारीको प्रेम फेसबुकमै पोखियो । सार्वजनिक कार्यक्रममै चुम्बन गरे, एकअर्कार्लाई ‘माई लभ’ भने । फिल्मको प्रमोसनमा मात्र फाइदा भएन, नवनायक आमेश यही अफेयरका कारण चर्चामा आइरहे । नीतालाई पनि मिडियाले पछ्याइरहे । तर जब फूलैफूलको मौसम तिमीलाई फ्लप भयो, उनीहरुको सम्बन्ध पनि खलास । त्यसपछि आमेश ओझेल परे, नीता पनि । दुई वर्षको अन्तरालपछि हालै यो जोडीले म्युजिक भिडियोमा सँगै मोडलिङ गरेको छ, तर चर्चा कुनै फिल्म खेलेभन्दा धेरै भइरहेको छ । दुवैले आफ्नो सम्बन्धबारे अन्तर्वार्ता दिइरहेका छन् । सवाल नउठोस् कसरी, प्रचारकै खातिर प्रेमको प्रयोग हुन्छ !
नायिका केकीका अनुसार कहिलेकाहीँ फिल्म युनिटबाटै ‘लभ परेको, फलानोसँग डेटिङ गरेको’ जस्ता समाचार दिन दबाब आउँछ । निःशुल्क प्रमोसनका लागि हिरोइनको अफेयरको हल्ला चलाउन खोजिन्छ । ‘नाइँ’ भन्यो भने निर्मातासँग लफडा पर्यो भनेर अर्को गसिप आउँछ । केकी भन्छिन्, “तर मैले अस्वीकार गर्दै आएकी छु । फिल्म त आउँछ, जान्छ, तर कलाकार त सधैँ रहिरहन्छ । एक जनाले गल्ती गर्दा त्यसको असर सबैले भोग्नुपर्छ ।” मिडियामा मसला बन्ने भएकाले पनि प्रेमसम्बन्धी कुरा बाहिर ल्याउन फिल्मकर्मी आतुर हुन्छन् । यस्तै प्रवृत्ति नियालेका निर्देशक नवीन सुब्बाले कुनै समय भनेका थिए, ‘अझ पनि कसरी राम्रो फिल्म बनाउनेभन्दा कस्ता फन्डाले फिल्म चल्छन् भन्नेतिर निर्माताको ध्यान हुन्छ । अनि कसरी उँभो लागिन्छ ?’
नियतवश विवाद सिर्जना गरेर अरुको ध्यान खिच्नुपर्ने बाध्यता पनि रहेको दुखेसो पोख्छिन्, हिरोइन वर्षा शिवाकोटी । उनको भनाइमा कलाकार, अझ हिरोइनको अभिनय करिअर अनिश्चित हुन्छ, लामो समय टिक्न मुस्किल पर्छ । भन्छिन्, “सबैले बलेको आगो ताप्ने हुन् । कन्ट्रोभर्सी पनि सकारात्मक भए राम्रै हुन्छ । अभिनयमार्फत मात्र अगाडि बढ्न गाह्रो छ ।” आफूले चाहिँ कहिल्यै प्रचारका लागि स्क्यान्डलको सहारा नलिएको दाबी उनको छ । अभिनेत्री रेखा थापा क्षणिक लाभ भए पनि कालान्तरमा फन्डा घातक हुने बताउँछिन् । रेखा भन्छिन्, “फिल्मबाहिर पनि जीवन हुन्छ, कन्ट्रोभर्सीले समाजमा साख धुमिलिन्छ, भोलि आफैँलाई ‘ब्याक फायर’ गर्छ ।”
रेखाको दाबी छ, कलाकारप्रतिको सम्मान हिजोभन्दा आज अझ खस्किएको छ । यसमा कलाकारकै आनीबानी र मिडियामा प्रस्तुत हुने शैलीको भूमिका छ । “फिल्मको पोखरीबाट बाहिर निस्किएपछि बल्ल थाहा पाउँदै छु, कलाकारप्रति समाजको नजरिया । खासमा हामीसँग संस्कार नहुनुकै परिणाम हो यो,” हाल सामाजिक र राजनीतिक गतिविधिमा सक्रिय रेखा भन्छिन्, “आम मान्छेको कलाकारप्रतिको दृष्टिकोण कस्तो भनेर बुझ्नुपर्छ । आत्मरतिमा रमाएर र सम्मान पाइएन भनेर गुनासो गरेर मात्र हुन्न ।”
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...