जब–जब सरकारले बजेट ल्याउँछ, तब–तब विपक्षीले आरोप लगाउने गर्छ– यो झुरै बजेट हो । यसले केही पनि गर्दैन ।

वास्तवमा बजेटलाई त्यसरी झुरै भन्नुजस्तो झुर कमेन्ट अरु केही भएजस्तो लाग्दैन । बजेट आएपछि केही नहुने होइन । बरु धेरै थोक हुन्छ । बजेटको प्रभाव त बडो भयंकर पो हुन्छ । त्यसैले सबै सरकारले आफ्नो बजेटलाई प्रभावकारी बजेट भनेर तारिफ गर्न छुटाउँदैनन् ।

बजेटको सबैभन्दा ठूलो र सीधा प्रभाव भनेको बजारमा पर्छ । बजेट आउनेबित्तिकै बजारभाउ बढ्न सुरु भइहाल्छ । बजेटले बढाएको वस्तु मात्र होइन, नबढाएको वस्तुको भाउसमेत टुइाटुइा उक्लिन थाल्छ । अझ यसपालि त बजेट नआउँदै बजारभाउ उक्लिसकेको थियो । बजेटको गन्ध मात्रै पायो भने पनि बजार भाउ उक्लिसक्छ । यस्तो प्रभाव हुन्छ बजेटको । त्यसैले यदि बजेट पेस गर्ने बेला अर्थमन्त्रीले आफ्नो बजेटलाई ‘प्रभावकारी बजेट’ भन्छन् भने त्यसलाई सहर्ष स्वीकार्नैपर्छ किनभने बजेटको प्रभावकारिता हामी बजारमा देखिहाल्छौँ । बजारलाई यति प्रभाव पार्न सक्ने बजेटलाई प्रभावकारी बजेट भन्न किन हच्किनुपर्‍यो ?