मोहनापारिका गुमनाम बस्ती
राज्यको केही पनि सुविधा नपुर्याएपछि भारतमै निर्भर
भारतको दुदुवा नेसनल पार्कसँग जोडिएको छ, हौसलपुर गाउँ । मोहनापारिको नेपालको करिब ४०/५० हेक्टर क्षेत्रफलमा रहेको यो कुनाको बस्ती वर्षौंदेखि गुमनामजस्तै छ ।
नेपाल–भारतको सिमानामा बग्ने मोहनापारिको हौसलपुर कैलारी गाउँपालिका वडा नं ७ मा पर्छ । यहाँ बस्ने २८ घरपरिवार थारुको नेपाल सम्बन्ध सरकारी कामकाजसँग मात्रै जोडिएको छ । अझ भन्नु पर्दा, नेपाली नागरिकता बनाउनका लागि मात्रै जिल्ला सदरमुकाम धनगढी पुग्छन् । राजधानी काठमाडौँ देखेको त कोही पनि छैन ।
यहाँको रहनसहन, बोलीभाषा र संस्कृतिमा पनि भारतीय प्रभाव छ । यहाँका अधिकांशले नेपाली भाषा बोल्न जान्दैनन् । यिनीहरूसँगको सम्पर्क मातृभाषा थारु र हिन्दी मात्रै हो । भारतीय बस्तीसँग ऐँचोपैँचोको सम्बन्ध जोडिएको छ । भारतको बेलापुरसुवा बस्तीसँग यो गाउँ साँध खेतको आली मात्रै छ ।
घाँसदाउराका लागि दुदुवा नेसनल निकुञ्जभित्रै पस्छन् । खेतको सिँचाइ गर्न कुलो पनि निकुञ्जभित्रैको तालको पानी प्रयोग गर्छन् । निकुञ्जका वनकर्मी तथा कर्मचारीको दयामाया नभए उनीहरूको खेत सिञ्चितसम्म हुँदैन । उनीहरूको गाउँ नियम–कानुन र बस्ने काइदा निकुञ्जले तोकिदिएको छ ।
पुरुषहरूलाई निकुञ्जभित्र प्रवेश निषेध छ । महिला मात्रै घाँसदाउरा र गाईगोरु बाख्रा चराउन जान पाउँछन् । कहिलेकाहीँ महिलामाथिको दुर्व्यवहार पनि सहेर बस्नुपर्ने बाध्यता छ ।
उनीहरूको गाउँदेखि सहरको सम्बन्ध भारत नै हो । त्यसैले उनीहरूले चलाउने सवारी साधनदेखि खेत जोत्ने ट्याक्टरसम्म भारतीय नम्बर प्लेटका छन् । उब्जेको अनाज बिक्री र दैनिक उपभोग्य वस्तुको किनमेल पनि भारतीय बजारमै हुन्छ । गाउँका मुखिया रवेन्द्र चौधरी भन्छन्, “हामी नेपालको भूमिमा बसेका मात्रै हौँ, सवै सम्बन्ध भारतसँगै राख्नु परिरहेको छ ।” चोरडाँकादेखि बर्खामा मोहनाको बाढीबाट बच्न भारतीय सुरक्षाकर्मीसँग उद्धारका लागि याचना गर्नुपर्ने स्थिति छ ।
मोहना नदीमा पुल बनाएपछि मात्रै नेपालसँगको सम्बन्ध जोडिने मुखिया चौधरी सुनाउँछन् । तर पाँच दशकअघि मात्रै बसेको यो बस्तीलाई नेपालको नक्सामा जंगल जनाइएको छ । गाउँका एक्ला बृद्ध रामबहादुर चौधरी, ६०, सुनाउँछन्, “अहिलेसम्म यो गाउँ लालपुर्जाविहीन छ ।” सीमामा बस्ने नेपालीको अस्तित्व बचाउन र बलियो बनाउन नेपाल सरकारको उपस्थिति देखिन आवश्यक रहेको औल्याउँछन्, मिखराम चौधरी, ३२, । भन्छन्, “गाउँको लालपुर्जा दिनु पर्यो, स्कुल, स्वास्थ्यचौकी, सीमा प्रहरीचौकी राख्नुपर्यो ।”
बालबालिका भारतीय स्कुलमा
मिखरामका अनुसार यहाँका बालबालिकाको प्रारम्भिक शिक्षा नै भारतको बेलापरसुवाको सरस्वती शिक्षा मन्दिरमा हुन्छ । त्यहाँ शिशुदेखि ८ कक्षासम्म ४५ जना विद्यार्थी पढ्न जान्छन् ।
“जनगण मन अधिनायक जय हे, भारत भाग्य विधाता...भारतको राष्ट्रिय गीत स्कुले बालबालिकालाई कठस्थ छ,” उनी भन्छन्, “भारतको इतिहास र भूगोलको ज्ञान भएका बालबालिकालाई नेपालको नक्सा कस्तो छ भन्नेसम्म थाहा छैन ।”
यहाँका किशोरकिशोरी हाईस्कुल र उच्च शिक्षाका लागि पनि लखिमपुर जान्छन् । लखिमपुरको गान्धी इन्टर कलेजमा गाउँका २०/२५ विद्यार्थी पढ्दै छन् । मिखरोमले लखिमपुर गान्धी कलेजबाटै अर्थशास्त्रमा डिग्री गरेका छन् । उनी लखिमपुरको एक प्राइभेट कम्पनीमा काम गर्छन् ।
तिरो भारतलाई
दुदुवा नेसनल पार्कसँग जोडिएका मोहनापारिका दुई बस्ती भारतलाई तिरो बुझाउँछन् । नागबेलीजस्तै घुमेको सीमानदी मोहनापारि कैलारी गाउँपालिकाको वडा नं ३ मा पर्ने मोहनपुर र शिवरत्न बस्ती पनि पर्छन् । यी दुई बस्ती हौसलपुरजति नेपालबाट टाढिएको छैन । यहाँ प्राथमिक तहसम्मको स्कुल छ । उच्च शिक्षाका लागि विद्यार्थी बर्खामा डुंगा र हिउँदमा काठको पुलबाट नेपाल पढ्न आउँछन् ।
स्थानीयले विद्यार्थीलाई बर्खामा नदी वारपार गर्न डुंगा चलाउँछन् भने हिउँदमा काठेपुल हाल्छन् । तर रोजगारी र रासनपानीका लागि भने सीमावर्ती चन्दनचौकी बजार नगई हुँदैन । वनजंगल आफ्नो नभएर दुदुवा नेसनल निकुञ्जमै निर्भर छन् ।
निकुञ्जबाट सुविधा लिएवापत यहाँका बासिन्दा हरेक माघीमा निकुन्ज प्रशासनलाई वार्षिक तिरो तिर्छन् । “तिरो बुझाएबापत निकुञ्जछेउको जंगलबाट घाँसदाउरा गर्न र बाख्रा चराउने सुविधा पाएका छौँ,” शिवरत्नपुरका रूपलाल चौधरी भन्छन्, “तिरो नगद र जिन्सी दुवैमा तिर्ने गरेका छौँ ।”
मोहनपुरका ६१ घर परिवारले हरेक माघीमा चन्दन चौकी वन पोस्टमा १० किलो चामल र ५ किलो बेसार बुझाउने गरेका छन् । शिवरत्नपुरका ८४ घर परिवारले वार्षिक प्रतिघर ३ सय रुपैयाँ निकुञ्ज प्रशासनलाई बुझाउने गरेका छन् । “मालपोतजस्तै वार्षिक तिरो बुझाएर निकुञ्ज प्रशासनलाई खुसी पार्नुपर्ने हाम्रो बाध्यता छ,” गाउँका दधिराम चौधरी भन्छन्, “निकुञ्जबाट घाँसदाउरा र गाईगोरु चराउने सुविधा लिन र बस्तीको सुरक्षार्थ यति गर्नैपर्छ ।”
निकुञ्जका वनकर्मी र भारतीय सीमा सुरक्षा बल एसएसबीसँगको सम्बन्धमै सामाजिक सुरक्षा निर्भर रहने स्थानीय फुलराम चौधरीको भनाइ छ । “सम्वन्ध कुनै कारणले चिसिएको बेला बाटो, जंगल प्रयोग गर्न नपाएर घेराबन्दीमा पर्छौं,” उनी सुनाउँछन्, “रोजगारी र रासनपानीका लागि दुदुवाको जंगल भएर चन्दन चौकी जाने बाटो छेकिदिन्छन् भन्ने डर सधैँ हुन्छ ।”
वडासदस्य पार्वती विक स्वयं आफनो वडामा पर्ने मोहनपुर र शिवरत्नपुरको समस्यालाई सम्बोधन गर्न सजिलो नभएको स्वीकार्छिन् । “मोहना नदीमा पुल नबनेसम्म यहाँका बासिन्दाको भारत निर्भर जिन्दगीबाट मुक्ति दिन सकिँदैन,” उनी भन्छिन्, “वडा तथा गाउँपालिकाको विकासका गतिविधिसँग जोड्न मोहना नदी बाधक छ । मोहनपुर र शिवरत्नपुरमा राज्यको विकासको पूर्वाधारमा एउटा प्राथमिक विद्यालयबाहेक केही छैन । यहाँका नेपालीले राज्यको कुनै सेवा पाएका छैनन् ।”
गाउँपालिका अध्यक्ष लाजुराम चौधरी भौगोलिक रूपमा टापुमा रहेका ऊक्त बस्तीमा विकासका सबै कार्यक्रम लैजान सजिलो नभएकाले मोहना नदीमा झुलुंगे पुल निर्माण र विद्युतीकरणका लागि पहल भइरहेको बताउँछन् ।
भोट बैंक मात्रै
मोहनपुरमा ०५२ मा एउटा प्राथमिक विद्यालय खुलेको थियो । हालसम्म प्राथमिक तह नै छ । बिजुली, पानी, शिक्षा, स्वास्थ्य, सुरक्षा पोस्ट केही नभएको यो गाउँ अन्धकारमै छ । तीनतिरबाट नदीले घेरेकाले वारपार गर्न झोलुंगे पुल बने बस्ती नेपालसँग जोडिन सक्ने स्थानीय कुलप्रसाद चौधरीको भनाइ छ । भन्छन्, “यी गाउँ नेताको भोट बैंकजस्ता मात्र छन् ।”
मोहनपुरका गाउँका पाका सेन्धु चौधरीका अनुसार ०४९ को स्थानीय निर्वाचनमा यहाँका बासिन्दा पहिलो पटक मतदाता भएका थिए । “तत्कालीन हसुलिया गाउँ विकास समितिको वडा नं ४ अर्न्तगत यो गाउँ परेको थियो,” उनी भन्छन्, “पहिलो पटक वडाध्यक्ष उम्मेदवार सरकारी कर्मचारी लिएर मतदाता नामवली संकलन गर्न आएका थिए । त्यसको केही समयपछिको निर्वाचनमा यहाँका करिब ५०/६० जनाले भोट हाल्यौँ ।” उनका अनुसार बस्तीका धेरैको नागरिकता पनि त्यसपछि बनेको हो ।
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...