‘सिङ्लामा स्वर्गको आभास’
वी विल राइज फाउन्डेसनको ‘मेरो गाउँ मेरो ठाउँ’ भिडियो च्यालेन्ज प्रतियोगितामा जर्नी टु सिङ्ला सर्वोत्कृष्ट ठहरिएसँगै नृत्य निर्देशक सुकबहादुर तामाङ, ३०, को परिचयमा डकुमेन्ट्री निर्देशकको फुँदा जोडिएको छ ।
वी विल राइज फाउन्डेसनको ‘मेरो गाउँ मेरो ठाउँ’ भिडियो च्यालेन्ज प्रतियोगितामा जर्नी टु सिङ्ला सर्वोत्कृष्ट ठहरिएसँगै नृत्य निर्देशक सुकबहादुर तामाङ, ३०, को परिचयमा डकुमेन्ट्री निर्देशकको फुँदा जोडिएको छ । १ सय ३२ प्रतिस्पर्धीलाई उछिनेर पहिलो बनेका निर्देशक तामाङसँगको कुराकानी :
अब कोरियोग्राफीबाट डकुमेन्ट्री निर्देशनतिर फड्को मार्ने हो ?
कोरियाग्राफी निकै पहिलेदेखि गरियो । बीचमा दुइटा तामाङ भाषाका फिल्म निर्देशन पनि गरेँ । एउटै काम गरिरहनुभन्दा फरक अनुभव लिऔँ भनेर सर्ट डकुमेन्ट्रीमा हात हालेको हो । तीनै विधामा समानान्तर रुपमा काम गर्छु ।
यो क्षेत्रलाई डकुमेन्ट्रीमा उतार्नुपर्ने आवश्यकता किन देख्नुभयो ?
धादिङको खनियाबास गाउँपालिका र रुबी भ्यालीको सिमानामा पर्छ, सिङ्ला । यहाँ हरेक जनैपूर्णिमामा मेला लाग्छ । उक्त मेलामा एक पटक म पनि पुगेँ । मेरो जन्मथलोबाट नजिकै यति राम्रो ठाउँ देखेर चकित परेँ । यति सुन्दर ठाउँको प्रचार हुन सके पर्यटकीय गन्तव्यका रुपमा विकसित गर्न सकिन्छ भन्ने लाग्यो ।
त्यस्तो विशेष के भेट्नुभयो ?
यहाँको दृश्य र संस्कृति । सिङ्ला जाँदा जति पनि ठाउँ भेटिन्छन्, त्यसका छुट्टाछुट्टै विशेषता छन् । त्यो मलाई मौलिक लाग्यो । गणेश हिमाललगायत ६/७ वटा हिमशृंखला आँखैअगाडि सर्लक्कै देख्दा स्वर्गकै आभास हुन्छ । तामाङ र गुरुङ जातिको म्हेन्दो माया, साइखोले, मानेदोरा भाकाका गीत गाइन्छ, जुन मौलिक छ ।
यो क्षेत्रमा पर्यटक फिटिक्कै जाँदैनन् ?
काठमाडौँबाट नजिकै भएर पनि फाट्टफुट्ट मात्र आन्तरिक पर्यटक पुग्ने रहेछन् । सुटिङका क्रममा १०/१५ दिन बस्यौँ । पर्यटक कोही भेटिएनन् । मुस्किलले मानिस त्यहाँ पुग्ने रहेछन् ।
पर्यटक पुग्नलाई त पूर्वाधार हुनुपर्यो ? खाना–बस्नको सुविधा रहेछ ?
धेरै पर्यटकका लागि बन्दोबस्त गर्न गाह्रो छ । नुवाकोटको गोंगभञ्ज्याङमा फाट्टफुट्ट होटल भेटिन्छन् तर स्तरीय छैनन् । पूर्वाधार बन्ने हो भने यो गज्जबको गन्तव्य हुनेछ ।
डकुमेन्ट्री बनाउँदाको स्मरणीय क्षण केही छ ?
गत वर्ष भदौमा उक्त क्षेत्र पुगेका थियौँ । जुकाले धेरै टोक्यो । झरनाको फोटो खिच्दाखिच्दै ड्रोन क्यामेरा खस्यो । सबै मिहिनेत खेर गयो भनेर अत्तालिएका थियौँ । निकै बेर खोजेपछि धन्न रुखमा अड्किएको अवस्थामा भेटियो । अतिरिक्त पंखा लगेकाले फेरि खिचियो ।
स्थानीय निकायले पर्यटकीय रुट बनाउन केही गरेको छैन ?
गाउँपालिकाले पर्यटकीय थलो बनाउन पहल गरिरहेको छ भन्ने सुन्छु । ठोस काम केही गरेको छैन । प्रकृतिको देन उपयोग गर्न नसकेको देख्दा दुःख लाग्छ ।
यहाँबाट पदमार्गको रुट कहाँ–कहाँ निस्कन्छ ?
काठमाडौँबाट नुवाकोटको भाल्चे गाउँसम्म गाडीमा पुगिन्छ । गोंगभञ्ज्याङमा खाने–बस्ने ठाउँ भेटिन्छ । त्यसपछि रुप्चेमा गोठाले जीवन देख्न सकिन्छ । त्यसपछि सिङ्ला आउँछ । सिङ्लादेखि माथि पङसङ हुँदै रसुवा निस्कन सकिन्छ । अर्कोचाहिँ रुबी भ्याली पनि जोडिन्छ ।
कोरियोग्राफी, फिल्म, डकुमेन्ट्रीमध्ये कुनमा बढी आनन्द लाग्यो ?
केमा आनन्द आयो भन्नुभन्दा पनि सबैको आफ्नै महफ्व छ । डकुमेन्ट्रीमा अझ चुनौती रहेछ ।
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...