एउटा स्वर्णिम अनुभूति (फिल्म समीक्षा : द लाइन किङ)
जोन फाभ्रेउ निर्देशित द लाइन किङ सन् १९९४ मा बनेको यही नामको एनिमेटेड फिल्मको रिमेक हो । जोनले यसअघि द जंगल बुकमार्फत प्रशस्त ख्याति कमाएका थिए । यसपटक उनले जंगलको राजा सिंहको आफ्नो राज्यप्रतिको प्रेम र त्यागको कथा रोजेका छन् ।
कलाका अन्य विधाभन्दा सिनेमासशक्त किन मानिन्छ भने निर्देशकले कल्पना गरेको संसार दृश्यभाषाबाट अभिव्यक्ति गर्न सक्छन् । एकदमै काल्पनिक कथालाई पनि वास्तविकझैँ भावनाको लेपमा पस्कने सकिने सामर्थ्य हुन्छ सिनेमामा । प्रविधिको तीव्र विकास यस्ता कथावाचनमा वरदान भइहाल्यो । त्यसो नहुँदो त, द लाइन किङजस्ता मनमोहक सिनेमाको साक्षी हुन पाइन्थ्यो र ? यो अंग्रेजी चलचित्रमा एउटै मान्छे छैनन्, सबै जनावर तर पात्र र तिनका भोगाइले यसरी बाँध्दै लान्छ कि पर्दाबाट आँखा अन्त जाँदैन । जोन फाभ्रेउ निर्देशित द लाइन किङ सन् १९९४ मा बनेको यही नामको एनिमेटेड फिल्मको रिमेक हो । जोनले यसअघि द जंगल बुकमार्फत प्रशस्त ख्याति कमाएका थिए । यसपटक उनले जंगलको राजा सिंहको आफ्नो राज्यप्रतिको प्रेम र त्यागको कथा रोजेका छन् ।
अफ्रिकाको एउटा जंगलमा मुफासाको राज्य छ । हरेकको रेखदेख गर्ने उदार राजा मुफासालोकप्रिय छ । उसको छोरो सिम्बालाई राजकुमार घोषणा गरिन्छ तर सिंहासन ताकिरहेको मुसाफाको भाइ स्कारलाई यो पाच्य हुन्न । स्कार हिस्रंक जनावरसँग मिलेर सत्ता हडप्ने खेलमा लाग्छन् । कतिसम्म भने, उनकै दाजु मुफासाको हत्या गरिदिन्छन् । तर अरुले पत्तै पाउँदैनन् । बरु आफूलाई बचाउन आउँदा बुबा मरेकोमा सिम्बालाई पश्चाताप हुन्छ । राज्य छोडेर अन्त कतै जान्छन् । उतै हुर्कन्छन् । बुबाले सिकाएको राज्यप्रतिको जिम्मेवारी भुलेर सिम्बा कहिल्यै नफर्केलान् ? स्कारसँग बदला लेलान् ?
पात्र, उनीहरुको आनीबानी र जीवनशैलीलाई विश्वसनीय ढंगबाट चिनाइएको छ । सोही कारण जनावर भएपनि तिनले दर्शकको संवेदना जित्छन् । हरेक पात्रमा मानवीय भावनाको लेप लगाउनु निर्देशक र पटकथाकारको खुबी हो । मुफासालाई सच्चा र बफादार राजाको रुपमा चित्रित गरिएको छ । गर्जनसाथ जनावरहरु एकसाथ भेला हुन्छन्, निर्णयहरु सबैका लागि घोषणा गरिन्छ । त्यस्तै, मुफासाले छोरा सिम्बालाई राज्य सञ्चालनका तौरतरिका र अन्य जनावरप्रति जिम्मेवारीबोध गराउने दृश्य पनि मजबुत छन् । स्कारको नियतचाहिँ सुरुबाटै खराब लाग्छ । विरोधी समूहसँग मिलेर आफ्नै परिवार नास गराउने स्कारको हर्कतले अनेकौँ वास्तविक घटनाको याद दिलाउँछ ।
द लाइन किङका हरेक जनावर वास्तविक लाग्छन् । पार्श्व संगीतले फिल्मको दुनियाँमा सयर गराउन अझ अहम् भूमिका खेल्छ । दृश्यको भाव र आवश्यकताअनुसार सिर्जना गरिएको साउन्ड–ट्र्याक कथावाचनमा कति अर्थपूर्ण हुन्छ भन्ने प्रमाण हो यो फिल्म । गीतहरुले पात्रको भावना व्यक्त गर्दै कथा अगाडि बढाउँछन् । जनावरबीचको भिडन्त, उनीहरुको आन्तरिक प्रेम र खिचातानीलाई पनि रोचक शैलीमा पर्दापण गरिएको छ । वास्तविक संसारमा राजाहरुको लोकप्रियता निमिट्यान्न हुँदै छ तर द लाइन किङको राजालेचाहिँ जो–कोहीको मन जित्छन् ।
जनावरलाई छोड्ने हो भने यस फिल्मको कथा नौलोचाहिँ होइन । दाइको राज्यमाथि भाइले आँखा गाड्ने र राज्यमा अनेकौँ संकट आइलाग्ने कथा सिनेमाका लागि सामान्य हुन् । हलिउडमै अनेक रुप र कोणमा हेरिसकिएको छ तर जनावरलाई जीवन्त ढंगले चित्रण गरिएकाले विशेष लाग्छ । सिम्बा आफ्नो राज्य फर्कने कारण र तरिका विश्वसनीय छैन । छट्टु र धोकेबाज स्कार अन्तिममा आफ्नै गुटको सिकार हुन्छ ।ज्याजु, पुम्बा, सराबी, राफिकीजस्ता अनेक रोचक चरित्रले फिल्मलाई सशक्त बनाउन भूमिका खेलेको छ । जनावर र चराको आवाजचाहिँ कलाकारले ‘डबिङ’ गरेका छन् । ओरिजिनल फिल्ममाडोनाल्ड ग्लोभरले सिम्बाका लागि आवाज दिएका छन् । यसको हिन्दी भर्सनमा मुसाफाको आवाज शाहरुख खान र सिम्बाको उनका छोरा आर्यन खानले ‘डबिङ’ गरेका हुन् ।
एनिमेटेड मात्र होइन, सुन्दर र सरल कथा हेर्न चाहने हरेक उमेर समूहका दर्शकका लागि हो, द लाइन किङ ।
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...