पदयात्रा
तिमीलाई पछ्याउँदा पछ्याउँदैपैतालाबाट यस्तरी रगत बगेकोपत्तै पाइनछु मैलेकाँडा बिझेछ
उकालो
ओह्रालो
घुम्ती
पच्याङ
खोँच
जंगल
भीर
खोला
फेरि उकालो
फेरि ओह्रालो
फेरि अर्को पहाड...
उफ !
अब सक्दिनँ म हिँड्न
तिमीलाई पछ्याउँदा पछ्याउँदै
पैतालाबाट यस्तरी रगत बगेको
पत्तै पाइनछु मैले
काँडा बिझेछ
कैँडा लागेछ
दम्को परेछ
अहिले यतिखेर
अप्ठ्यारोमा आइपुगेपछि पो थाहा भो मलाई
कि, यो यात्रा
मात्र तिम्रो हो
म त खै कुन मोहले तानिएछु त्यसै
बतासले बादल तानेझैँ
तारा खस्दा उज्यालो तानिएझैँ
ए सुन त !
तिम्रो कुमबाट छिरेको घामको किरणले
यहाँ मेरो आँखाको बाटो छेक्यो
र पहिलोपल्ट थाहा पाएँ मैले–
सहयात्रा भ्रम हो
मानिसको जीवन
एक्लो छ
त्यसैले बिन्ती छ मेरो
त्यहाँ त्यसरी नपर्ख मलाई
मलाई यत्तिकै यहीँ छाडेर जाऊ तिमी
तिम्रो बाँकी कथा
कुनै दिन
मेघझैँ गर्जिएला, म त्यो सुनूँला
वा आकाशमा
झिलिक्क चम्किएला, म त्यो हेरुँला
कि तिम्रो जीउमा अल्झेको कुरो
कतै झरेर उम्रेपछि
फेरि यो यात्रामा आउनेलाई
उसको गोडामा अल्झेर
त्यसले सुनाउला
कि त्यो रुख,
जसको काखमा तिमी भरै बास बस्नेछौ
त्यसको फल खाएर उडेको चराले अर्को रुखमा बिस्ट्याउला
उम्रेला त्यो फेरि
र त्यसले प्रत्येक याममा
ऋतु गीतझैँ गाउला
खै कहाँ हो कहाँ पुगूँला भनेर
हात समाएको थिएँ तिम्रो
यो बीच बाटोमा आइपुगेपछि पो
अचानक थाहा पाएँ मैले–
कसैको हात
कमजोरले मात्र समाउँछ
लौ, मैले त
फर्किने गोरेटो नै भुलेछु
अब म
जसोतसो
बामे सर्दै
उ... त्यो गाउँमा पुग्छु
पानी माग्छु
गुन्द्री माग्छु, सुस्ताउन
र फर्फराइरहेको त्यो लुङ्दर हेर्दै
निदाउँछु
ब्युँझेपछि
मलाई हेर्न भेला भएका तारालाई
भन्नेछु–
कि एउटा मानिस
कुनै पनि बेला आइपुग्नेछ यहाँ
तर म
अस्ताउनै लागेको जूनलाई पिठ्युँमा बोकेर
शीताम्मे झुलिरहेको गहुँबारीको बीचैबीच
गइसकेको हुनेछु
सायद मलाई
त्यो गाउँको कुनै दुब्लो कुकुरले
पछ्याउनेछ निकै परसम्म
जसरी तिमीलाई
पछ्याएको थिएँ मैले ।
सम्बन्धित
भोको बिहान बोकेर, सँधै सँधै उदाइरहने, मेरा हत्केलाका ठेलाहरू हेर, लेख्न सक्छौ तिमी, मेरा अ...
पोस्टमार्टम स्थलबाट सूर्यबहादुर तामाङको आग्रह
जुत्ताको तलुवामुनि, सदियौँदेखि कुल्चिएका छौ तिमीले - मेरो अस्तित्व । (कविता)...
म निसास्सिइरहेको छु
मैले तिमीलाई गाउँ गाउँ अनि दलित, गरिबका बस्ती बस्तीमा आउ भनेको थिएँ । तर तिमी त सहर-बजारका...
गणतन्त्र
गाउँभरि युवाहरूको अभावमा खेत बाँझो देख्न नसकी, घरका हल गोरुसँगै, आफ्नो पनि हत्या गर्ने वृद...
एक बौद्धिकलाई प्रश्न
मेरो अन्त्यको अर्थहीन विलम्बबीच म सोचमग्न छु- अविलम्ब जागृत हुनुपर्ने मानिस कहाँ छ ? (कवित...
सृष्टिमा अन्तिम सेतो जिराफ
सत्तालाई सबैभन्दा बढी झोँक चल्छ, जब चिच्चाउन थाल्छ कोही नाङ्गो मानिस... ...