गाईजात्रा पर्वले विशेष महत्त्व राख्छ, नेपालीमाझ । यस दिन पितृको स्मरणसँगै गाईजात्रा मात्र होइन, सामाजिक विसंगति, विकृति, भ्रष्टाचारविरुद्ध व्यंग्य गरिन्छ । अर्को महत्वपूर्ण कुरा, गाईजात्राकै दिन एलजीबीटीआईक्यू समुदायले प्राइड परेड (गौरव र्‍याली) निकाल्छ । यौनिक र समानताका पक्षमा जोड दिँदै यस पटक पनि एलजीबीटीआईक्यू समुदायले प्राइड परेड निकालेका छन् । यस वर्ष दोस्रो पटक परेड भएको हो ।

सन् १९६९ मा स्टोनवाल, अमेरिकाको आन्दोलनको सम्झना गर्दै हरेक वर्ष जुन महिनामा एलजीबीटीआईक्यू समुदायले गौरव र्‍याली गर्दै आएको छ । नेपाली समलिंगीले पनि गाईजात्राका दिनमा सन् २००२ देखि मौलिक शैलीमा गौरव र्‍याली गर्दै आएका छन् ।

परेडमा समलिंगी, पारलिंगी लेखिएका प्लेकार्ड देखिन्थे । इन्द्रधनुषको जस्तो सप्तरंगी झन्डा फहर्‍याउँदै परेड ठमेलको सञ्चयकोष भवन अगाडिबाट सुरु भएर टुँडिखेलमा टुंगिएको थियो । ब्लु डाइमन्ड सोसाइटीले आयोजना गरेको कार्यक्रममा विभिन्न सांस्कृतिक पहिरनमा सहभागी सजिएका थिए ।