बम्बईदेखि मुम्बईसम्मको बाँकी कथा (फिल्म : सेक्रेड गेम्स २)
नेटफ्लिक्सले अघिल्लो वर्ष वेब सिरिज नै निर्माण गर्यो, सेक्रेड गेम्स । आठ सिरिजको यस सिरिज हिन्दीभाषीमात्र होइन, नेटफ्लिक्सफैलिएकोकरिब दुई सय देशकै प्रयोगकर्तामाझ प्रिय बन्यो
सवा अर्ब जनसंख्या भएको भारत र संसारभर छरिएका हिन्दीभाषीमाझ आधिपत्य जमाउन बलिउड फिल्म भण्डार गरेर मात्र सम्भव नहुने भएपछि भिडियो स्ट्रिमिङ साइट नेटफ्लिक्सले अघिल्लो वर्ष वेब सिरिज नै निर्माण गर्यो, सेक्रेड गेम्स । आठ सिरिजको यस सिरिज हिन्दीभाषीमात्र होइन, नेटफ्लिक्सफैलिएकोकरिब दुई सय देशकै प्रयोगकर्तामाझ प्रिय बन्यो । नवाजुद्दिन सिद्दिकी र सैफअली खानले अन्तर्राष्ट्रिय प्रसिद्धि कमाए, निर्देशकद्वय अनुराग कश्यप र विक्रमादित्य मोट्वानीको भारतीय कथावाचन शैलीलाई नयाँ उचाइ दिलाए ।
बम्बई कसरी मुम्बई हुँदै गयो भन्ने इतिवृत्तान्त हो–सेक्रेड गेम्स, जसका लागि खुंखार ग्याङस्टर र प्रहरी अधिकृतलाई मुख्य पात्रका रुपमा उभ्याइएको छ । रहस्य र रोचक घटनाक्रमले भरिपूर्ण पहिलो सिरिज सार्वजनिक हुनासाथ दोस्रो सिजनको माग हुन थाल्यो । व्यापार त हो, डेढ वर्ष नबित्दै नेटफ्लिक्सले आठ भागकै अर्को सिरिज देखाइदियो ।
करिब सात घन्टा खर्चिएर हेरेपछि छर्लंग भइन्छ, हतारोले सिर्जनशीलतामा कति ह्रास हुन्छ ? पहिलो सिजनका हरेक पात्र, घटना, संवाद र परिस्थितिले बाँध्थ्यो । बम्बईको खाँटीपनलाई हुबहु उतारिएको थियो । तर यसपटक प्रस्तुति फितलो र छिरोलिएको छ,जबकि यो पूरापूर पहिलो सिजनकै निरन्तरता हो । ‘ओपन इन्डिङ’ ले यो सिजनको कथा उठानमा सहयोग गरेको छ । विक्रम चन्द्रको यही नामको उपन्यासलाई सिरिजमा ‘एडप्ट’ गरिएको हो । निर्देशनमा अनुरागको भूमिका फेरिएको छैन भने विक्रमादित्यलाई नीरज घयवानले विस्थापित गरेका छन् ।
१६ वर्षदेखि गायब बम्बईका ग्याङस्टर गणेश गाईतोन्डे (नवाजुद्दिन) एक्कासि प्रहरी अधिकृत सरताज सिंहलाई फोनमा धम्की दिन्छ, ‘मुम्बई २५ दिनमा ध्वस्त हुँदै छ । सक्छौ भने बचाऊ ।’ सरताजको जागिर धरापमा छ, न पत्नीसँग सम्बन्ध नै सुखद छ । तैपनि सहर जोगाउन लागिपर्छन् । सन् असी र नब्बेको दशकमा बम्बईमा मौलाएको अपराधकर्म र धार्मिक द्वेषको पटाक्षेप हुँदै जान्छ, गाइतोन्डेको चरित्र चिनाउने क्रममा । गरिब ब्राह्मण परिवारमा हुर्किएको गाईतोन्डे हिंस्रक छ तर आफूलाई असली ‘भगवान्’ घोषणा गर्छ । यो सिजनमाचाहिँ गाईतोन्डे उत्तिकै शक्तिशाली लाग्दैनन् । गुरुजी (पंकज त्रिपाठी)को उदय जो भएको छ । धार्मिक आवरणमा हिंसा मच्चाएर कलियुगबाट सत्ययुगमा फर्काउने ‘मास्टर प्लान’ छ उनीसँग । यही योजनालाई मूर्तरुप दिन गाईतोन्डेलाई मोहरा बनाइएको छ । गाईतोन्डे घरि भारतीय खुफिया एजेन्सी ‘रअ’ की कुसुमदेवी यादव (अमृता सुवास)को इसारामा नाच्न बाध्य हुन्छ, घरि गुरुजी । बेला–बेला सन्कन्छ तर फेरि औकातमा आइहाल्छ ।
सरताजको हालत अझ भद्रगोल हुँदैछ । न परिवार साथमा छ, न त अफिस नै । तर गाईतोन्डेको ‘नेक्सस’ फेला पारेर सहर बचाउन अनि गुरुजीको आश्रमको भेद खोल्न मरिमेटेर लागिपर्दैछ । यही रस्साकस्सी सेक्रेड गेम्स २ को केन्द्रमा छ । यसपटक भने यौन र हिंसाको दृश्य कम छ । केन्याबाट कथा सुरु हुन्छ, क्रोयसिया, लाहोर, दुबईसम्म पुग्छ । मुम्बई त छँदैछ । छिनछिनमा कथा कहाँबाट कहाँ पुग्छ, परिपक्व नबनाई अर्को घटना थप्छन्, निर्देशकद्वय । त्यसमाथि यादव, वात्या, साहिद खानजस्ता नवचरित्रलाई खरो रुपमा स्थापित गरिएको छैन ।
बम्बई भन्नासाथ फिल्मीको रंगीन दुनियालाई बेवास्ता गर्न सकिँदैन । जहाँ विभेद हुन्छ, अन्डरवर्ल्डको अवैध लगानी हुन्छ, यौन कारोबार हुन्छ । यो सिरिजमा पनि गाईतोन्डे फिल्म निर्माण गर्छन्, आफ्नो निहित स्वार्थपूर्तिका लागि । तर असाध्यै कामचलाउढंगले खिचिएकाले यो प्लट फिस्स लाग्छ, न त रामजी बर्माको नाममा फिल्म निर्देशक रामगोपाल बर्मालाई उडाएको विश्वसनीय छ । पहिलो सिजनमा गाईतोन्डेको संवाद मात्र पृष्ठभूमिमा सुनिन्थ्यो, यसपटक गुरुजी पनि थपिएका छन् । दुवै बोलेकोबोल्यै गर्छन् । झर्को लाग्छ । तर भारतीय समाजमा मौलाइरहेको धार्मिक असहिष्णुता अनि त्यसलाई ढाल बनाएर आतंक मच्चाउन उद्यत समूहको चित्रणचाहिँ संवेदनशील छ । अंग्रेज उपनिवेशबाट मुक्त भएसँगै हिन्दु–मुसलमानको द्वन्द्व कसरी चर्कंदै गयो भन्ने फेहरिस्त समेटिएको छ । कथालाई वास्तविक घटनासँगै जोड्नु अर्को सकारात्मक पक्ष हो ।
निश्चय पनि पहिलो सिजनबाट पैदा भएको तिर्खा दोस्रो सिजनले मेट्दैन । र, पनि यो सिजन हेर्नलायकचाहिँ छ । त्यसका लागि पहिलो सिजन भने हेरेकै हुनुपर्नेछ । नवाजुद्दिन, सैफअलीले आफ्नो अभिनयकलाको चमत्कार जारी राखेका छन् । कुकु खुब मिस हुन्छ । बन्टी र कान्ता बाई पनि पहिलेझैँ बलिया छैनन् । जोजोको भूमिका फराकिलो भएको छ । गुरुजी र बात्याचाहिँ हाम्रो समाजसँग नजिक हुँदै गएका तर पर्दामा नअटाएका चरित्र हुन् । जो‘सुसंस्कृत’ समाज निर्माणका लागि घातक छन् ।
यो सिजनको अन्त्य पनि ‘ओपन’ नै छ । गाईतोन्डे र सरताजप्रतिको कौतूहल मेटिन्न । त्यसैले दुई सिजन हेरेकालाई तेस्रो सिजनको अपेक्षा भइहाल्छ । धन्न ! अहिलेसम्म नेटफ्लिक्सले घोषणा गरिसकेको छैन । सायद यो सिजनको पूर्णप्रतिक्रियाको पर्खाइ र कारोबारको लेखाजोखा हुँदैहोला । तर यत्तिचाहिँ हो, नेटफ्लिक्सको उत्कृष्टमध्ये सेक्रेड गेम्स पनि एक हो ।
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...