नेपाली कांग्रेस अथवा नेपाल प्रहरीले अभिवादन गर्दा छाती तन्काएर बोल्ने ‘जय नेपाल’ वास्तवमा कुनै कामको रहेनछ भन्ने एक पटक फेरि पुष्टि भएको छ किनभने कांग्रेस र प्रहरीले जो देखे पनि ‘जय नेपाल’ भन्न थालेको त दशकौँ भइसक्यो । तर यो ‘जय नेपाल’ ले आजसम्म अरु नेपालको त कुरै छाडौँ, माधव नेपालसम्मको पनि जय गर्न सकेको छैन । पार्टीभित्र माधवको हालत के भयो, त्यो हालै पनि देखिहालियो ।

एक्लो परेका छन् विचरा ।

मर्यादाक्रमबाटै झर्नुपर्‍यो । अब भन्नुस्, जुन जय नेपालले जाबो एउटा माधवको त जय गरेन भने पूरा नेपालको जय गर्ला भनेर कसरी विश्वास गर्ने ? यो ‘जय नेपाल’ मा साँच्चै कुनै दम भएको भए कमसेकम माधव नेपालको त जय गराइदिनुपर्ने हो नि । खोइ ?

कम्युनिस्ट पार्टीमा कमरेड माधवको अवस्था आज जति त कहिल्यै पनि खस्केको छैन होला । कुनै बेला यस्तो पनि थियो कि पार्टीमा सानोभन्दा सानो कामका लागि पनि माधवको सुझाव र सल्लाह आवश्यक पर्ने गर्थ्यो । अब त्यो कुनै आवश्यक परेन । आवश्यक परेन मात्र होइन, उनी आफैँ गएर दिए पनि पार्टीले त्यो लिनेवाला छैन । अरु के कुरा, उनले दिएको स्वास्थ्यको शुभकामना त पार्टीले लिएन भने पछि अब सल्लाह, सुझाव, गुनासो, टिप्पणी, आलोचना ग्रहण गर्ने, लिने त धेरै टाढाको कुरा भयो ।

वास्तवमा कमरेड नेपालको जय भन्नेहरु त अब कांग्रेसमै मात्र बाँकी रहेछन् । नेकपामा त एउटै छैन ।