सरकारले दूधको भाउमा थोरै वृद्धि गरेको छ । लिटरमा ६ रुपैयाँ । दूधले जति पोषण दिन्छ, त्यसको अगाडि बढेको मूल्य केही पनि होइन । तर मानिस यसको पनि विरोधमा लागेका छन् । सरकारले दूधको भाउ बढायो भनेर विरोध गरिरहेका छन् । सरकारले दूधमा मात्र होइन, रक्सीमा पनि भाउ बढाइरहेको छ । हरेक वर्ष बजेट आयो कि रक्सीको भाउ बढिहाल्छ । तर रक्सीमा जतिसुकै भाउ बढाए पनि आजसम्म कुनै जड्याँहाले सरकारको विरोध गरेको मैले देखेको छैन । रक्सीमा जति भाउ बढाए पनि जड्याँहाले केही भन्दैनन् । न टायर बाल्छन्, न त सडक जाम गर्छन् ।

तर यो दूध खानेहरुको ताल हेर्नुस् त, लिटरमा ६ रुपैयाँ के बढेको थियो, हल्ला मच्चाए । सरकारलाई सहयोग गर्ने भन्ने त भावनै छैन । बरु जड्याँहालाई हेर्नुस्, रक्सीमा जतिसुकै भाउ बढाए पनि कुनै विरोध नगरीकन सरकारलाई सहयोग गरिरहेका छन् । यसैबाट थाहा हुन्छ, सरकारलाई जड्याँबाट ठूलो सहयोग प्राप्त भइरहेको छ । एउटा जड्याँहाले जति पनि सभ्य मानिसले सरकारलाई बुझ्न नसक्नु बडो अफसोचको कुरा छ ।