देशमा दुई तिहाइको सरकार छ । तर सरकार दुई तिहाइवाला भए पनि हाल यसको प्रभाव कम हुँदै गएको पो हो कि  ? अहिले सरकारलाई लामखुट्टेले समेत हेप्न थालेको छ । लामखुट्टेका कारण राजधानीमै डेंगु फैलिएपछि सरकार सतर्क भएको छ । तर सरकार सतर्क भएर के गर्नू, लामखुट्टे सतर्क भएको छैन । यी लामखुट्टेलाई भगाउन सरकारले के मात्रै गरेको छैन ? सिंहदरबारमा बैठकका बैठक बसेका छन् । दर्जनका दर्जन निर्णय गरेका छन् । ठाउँ-ठाउँमा मन्त्री गएर भाषण गरेका छन् । अस्पताल निरीक्षण गरेका छन् । पत्रिकामा अन्तर्वार्ता दिएकै छन् । रेडियोमा बोलेका छन् । के मात्रै गरेका छैनन् ! तर जे गरे पनि आजसम्म एउटा लामखुट्टेले सरकारलाई टेरेको देखिएन । के लामखुट्टेले पनि दुई तिहाइ सरकारलाई हेपेकै हो ?