देशमा नेताहरूको कुनै कमी छैन । तर त्यसो हुँदाहुँदै पनि अब फेरि नेता नै उत्पादन गर्ने एउटा रियालिटी शो यतिबेला चर्चामा छ । देशका लागि नेता उत्पादन गर्ने कारखाना... क्षमा गर्नुहोला, कार्यक्रम चलाउन उक्त शो आयोजना हुन लागेको रहेछ ।

शोबारे चर्चा चल्नेबित्तिकै मुंग्रेले मलाई सम्पर्क गरे । ‘दाइ, म पनि यो नेता बनाउने शोमा जाऊँ कि जस्तो लागिरहेको छ । कसो होला ?’

त्यसो त मुंग्रे आफैँ नेता गुण भएका केटा हुन् । देशमा चुनाव आउनेबित्तिकै मुंग्रे सक्रिय भइहाल्छन् । तर उनी चुनावमा कसको पक्षमा लाग्छन् भन्ने कुराको कुनै ठेगान हुादैन । जसले पहिले क्यास बुझाउँछ, उसैका पक्षमा मुंग्रे लाग्छन् । मुंग्रे लागेपछि त्यो उम्मेदवारले जित्छ पनि ।

अब कति अर्काको पछि लागौँ, अब त आफैँ नेता बनौँ भनेर मुंग्रेले सोचेको हुनुपर्छ । 

मैले सोधेँ, ‘जानु त राम्रै हो तर तिमीलाई अहिल्यै नेता हुनचाहिँ किन हतार नि ? देश बनाउने समय त तिमीसँग अझै बाँकी छ ।’

मुंग्रेले भने, ‘कहाँ देश बनाउने कुरा गर्नुभा’ दाइले । म देश बनाउन नेता बन्न जान लाग्या होइन ।’

‘अनि किन नेता बन्न जान लाग्या नि ?’

‘कुरो प्रस्टै छ नि दाइ,’ मुंग्रेले घााटी कन्याए, ‘जित्नेलाई त घर र कार पुरस्कार दिने भन्या छ नि । त्यही पाउन नेता बनूँ कि जस्तो लाग्या हो । हुन्न र दाइ ?’

अब के भन्ने ? मुंग्रेको प्रश्नको जवाफ त उही रियालिटी शोवालाले देलान्, मैले के दिनू ।