जमाना विज्ञापनको छ । पनौती पर्यटन विकास केन्द्रले आफ्नो स्थानको विज्ञापन गर्न फोटो प्रदर्शनीको सहारा लिएको छ । स्थानीय इन्द्रेश्वर महादेव मन्दिर परिसरमा चलिरहेको प्रदर्शनीमा पनौतीको जीवनशैली, सांस्कृतिक, धार्मिक, ऐतिहासिक मन्दिर, मनोरम दृश्य, वातावरण, रहनसहनलगायत १ सय ६० भन्दा बढी तस्बिर राखिएको छ । 

विशेषगरी दिउँसो घाम लागेका बेला फोटोपारखी प्रदर्शनी स्थलमा झुम्मिएका हुन्छन् । आफ्नै नगरभित्र कहिल्यै नपुगेका वा हेक्का नराखेका ठाउँको दृश्य हेर्न पाउँदा स्थानीयको मुहारमा बेग्लै चमक देखिन्छ । पनौतीको अवस्थाबारे जानकारी दिन हवाईजहाज र ड्रोनबाट खिचिएका तस्बिरसमेत प्रदर्शनीमा छन् ।

प्रदर्शनीमा फोटो पत्रकार प्रशान्त श्रेष्ठ, अक्षय मधुकर्मी, पदम तामाङ, पुरुषोत्तम अधिकारी, राजकुमार श्रेष्ठ, राजेन्द्र महाजु, अनीष श्रेष्ठलगायतले खिचेका तस्बिर छन् ।