क्रिकेट विश्वकप लिग २ को तीन वर्षे चरण घरेलु मैदानबाट सुरु गर्न पाउँदा नेपाली टोली उत्साही हुनु स्वाभाविकै थियो । नेपालको प्लेइङ कन्डिसनमा खेल्न पाहुना टोलीलाई निकै गाह्रो हुने गर्छ । त्यसमाथि १२ औँ खेलाडीका रूपमा रहेका घरेलु समर्थकको साथको त कुरै गर्नु परेन । त्यसैले पनि ओमान र अमेरिका सम्मिलित त्रिकोणात्मक सिरिजमा ८ अंक बटुल्ने लक्ष्य नेपालको थियो ।

कप्तान ज्ञानेन्द्र मल्ल पनि त्यही भन्थे तर नतिजा ठीक विपरीत आइदियो । पहिलो खेलमा ओमानलाई १८ रन अन्तरको संघर्षपूर्ण नतिजा सुम्पिएको नेपालले रोमाञ्‍चक खेलमा अमेरिकालाई ३५ रनले पराजित गर्‍यो । तर वान डे क्रिकेटमै अहिलेसम्मकै ठूलो स्कोर गर्दै २ सय ५० रनको लक्ष्य दिएको नेपाल ओमानसँग तेस्रो खेलमा ८ विकेटले पराजित भयो ।

सान्‍त्वना जित दर्ता गर्ने क्रममा नेपालले चौथो खेलमा अमेरिकामाथि कीर्तिमानी जित निकाल्यो । अमेरिकालाई २ पटक हराएको नेपालले ४ अंक जोड्‌न भ्यायो । ओमानले सबै ४ खेल जित्दै आफूलाई लिग २ को शीर्ष स्थानमा उकाल्ने क्रममा १६ अंक पुर्‍यायो । ओमानभन्दा २ खेल बढी खेलेको अमेरिका १२ अंकमा तालिकाको दोस्रो स्थानमा चिप्लियो । ७ राष्ट्र सम्मिलित लिग २ मा ४ अंकसहित नेपाल खाता नै नखोलेको पपुवा न्युगिनीभन्दा १ स्थान माथि अर्थात् छैटौँमा छ ।

लिग २ मा नेपालको प्रदर्शन औसत रह्यो । शीर्ष ३ मा अटाएर विश्वकप छनोट खेल्नका लागि नेपाली टोलीले धेरै सुधार गर्नुपर्ने खाँचो छ । यस्तोमा घरेलु मैदानमा भएको सिरिजमा नेपालले ८ अंक बटुल्न सकेको भए राम्रै भरथेग हुन्थ्यो । तर ओमानसँगको खेलमा बलिङ र ब्याटिङ दुवैमा नेपालले आत्मसमर्पण गरेजस्तो देखिन्थ्यो ।

कप्तान ज्ञानेन्द्र पनि ओमानसँगको खेलमा अपेक्षाअनुसारको प्रदर्शन हुन नसकेको स्वीकार्छन् । “पहिलो खेलमा बलिङ चल्दा ब्याटिङ चलेन । पछि ब्याटिङ राम्रो भयो । २ सय ५० रनको टार्गेट दिँदा पनि बलिङ चलेन र हार्नुपर्‍यो,” उनी सुनाउँछन् । तर सिरिजमा अझै धेरै खेल बाँकी रहेकाले अहिले नै केही भन्न नमिल्ने मल्लको भनाइ थियो ।

ड्रिम डेब्यु

कुनै पनि खेलाडीका लागि राष्ट्रिय टिमबाट डेब्यु गर्न पाउनु महत्त्वपूर्ण त हुन्छ नै । अझ डेब्यु म्याचमै राम्रो प्रदर्शन गर्न सकिए सुनमा सुगन्ध भइहाल्यो । लिग २ मा यस पटक राष्ट्रिय टोलीबाट ४ जनाको डेब्यु भयो । सुशन भारी, कुशल मल्ल, कमलसिंह ऐरी र अविनाश बोहरा । यीमध्ये कुशल र सुशनको डेब्यु यादगार भयो । भनौँ, ड्रिम डेब्यु गर्न पाए, यी दुई खेलाडीले ।

कुशलले रोहितकुमार पौडेलको स्थानमा डेब्यु गरेका थिए । गजबको संयोग त के भने रोहितको स्थानमा खेल्दै उनले रोहितकै विश्‍व कीर्तिमान तोडे । अमेरिकाविरुद्ध एक दिवसीय अन्तर्राष्ट्रियमा डेब्यु गरेका कुशलले कीर्तिमानी अर्धशतक बनाए । कुशलले ४९ बलमा ४ चौका र ३ छक्का प्रहार गरे । उनी एक दिवसीय अन्तर्राष्ट्रियमा अर्धशतक प्रहार गर्ने सर्वाधिक कम उमेरका खेलाडी बने । कुशलले १५ वर्ष ३ सय ४० दिनमा अर्धशतक बनाएका हुन् ।

यसअघि रोहितले १६ वर्ष १ सय ४६ दिनको उमेरको कीर्तिमान बनाएका थिए । ४९ रन बनाउँदा ५ विकेट गुमेको नेपालका लागि छैटौँ स्थानमा ब्याटिङ गर्न आएका कुशलले विनोद भण्डारीसँग उत्कृष्ट साझेदारी गर्दै नेपालको इनिङ उकासेका थिए । उनले आफ्नो दोस्रो खेलमा ओमानविरुद्ध समेत राम्रो प्रदर्शन गरे । सिरिजमा कुशलले नेपालका लागि तेस्रो सर्वाधिक रन जोडे । ३ खेलमा ७८ रन बनाएका उनको १ सय ४ को स्ट्राइक रेट छ । लिगमा ६५ रनभन्दा माथि बनाउने खेलाडीको स्ट्राइक रेटमध्ये कुशल दोस्रो स्थानमा छन्।

त्यस्तै, बायाँ हाते स्पिनर सुशन भारीको डेब्यु पनि उत्कृष्ट भयो । सिरिजअघि धेरैले अनुभवी स्पिनर वसन्त रेग्मीलाई नेपाली टोलीले मिस गर्ने लख काटेका थिए । तर सिरिजपछि अवस्था बदलियो र अब धेरैले सुशनलाई सम्झिन थालेका छन् । ओमानविरुद्धको पहिलो खेलमा डेब्यु गरेका सुशनले सिरिजमा तारिफयोग्य प्रदर्शन गरे । उनले डेब्यु खेलमै ३ विकेट हात पारेका थिए । सुशनले डेब्यु बलमै ओमानको विकेट लिएका थिए । आफ्नो पहिलो ओभरमा जसन मसुद र सुरार कुमारलाई आउट गर्दै सुशनले ओमानको इनिङ धरापमा पारेका थिए ।

अमेरिकाविरुद्ध पनि आफ्नो स्पेलको पहिलो बलमा सुशनले विकेट लिए । लिग २ को ४ खेलमा उनले ११ विकेटमा आफ्नो नाम लेखाए । उनी नेपालका लागि सर्वाधिक विकेट लिने खेलाडी पनि बने । त्यस्तै, ४ खेल मात्रै खेल्दा सुशन लिग २ को सर्वाधिक विकेट लिने खेलाडीको शीर्ष १० भित्र परिसकेका छन् । यसैबाट उनले खेलकौशल स्तरको परिचय दिइसकेका छन् । डेब्यु सिरिजमै यस्तो प्रदर्शन गर्ने सौभाग्य धेरै कम खेलाडीको मात्रै हुन्छ ।

सन्दीपको त्यो स्पेल

नेपाली क्रिकेटका ग्लोबल आइकन बनेका सन्दीप लामिछानेले लिग २ अघि घोषणा गरे– सिरिजमा लिने प्रत्येक विकेटबापत चितवनमा बन्‍ने क्रिकेट रंगशालालाई ८ हजार ८ सय ४८ रुपैयाँ सहयोग गर्छु । तर ओमानविरुद्धको पहिलो खेलमा विकेटविहीन भए, सन्दीप । दोस्रो खेलमा उनले अमेरिकाविरुद्ध २ विकेट लिए पनि ओमानसँगको खेलमा फेरि विकेटविहीन भए । तर अन्तिम खेलमा अमेरिकालाई जम्मा ३५ रनमा अलआउट गर्ने क्रममा नेपालले १२ ओभर मात्र बलिङ गर्दा सन्दीपले ६ तथा सुशनले ४ विकेट लिए । नेपालका लागि एक दिवसीय अन्तर्राष्ट्रियमा ५ विकेट लिने दोस्रो खेलाडी बन्दै हालसम्मकै उत्कृष्ट बलिङ प्रदर्शन गरेका सन्दीप खेलको म्यान अफ द म्याच भए ।

एसोसिएट राष्ट्रमध्ये यो दोस्रो उत्कृष्‍ट बलिङ प्रदर्शन हो । यसअघि अफगानिस्तानका राशिद खानले वेस्ट इन्डिजविरुद्ध एकै खेलमा ७ विकेट लिएका थिए । तर सन्दीपले त्यसबारे ठट्यौली पारामा भने, “राशिद टेस्ट खेलाडी भइसके । अब त मै नम्बर वान हो ।”

सिरिजमा राम्रो प्रदर्शन गर्न नसकिएको र विशेषत: ओमानविरुद्ध विकेट लिन नसकिएकामा उनलाई पछुतो छ । भन्छन्, “दुर्भाग्य भन्नुपर्छ, ओमानसँग विकेट लिन सकिएन । खेलाडीको जीवनमा यस्तो भइरहन्छ । ओमानसँग अट्याकिङ बलिङ सायद कसैले गर्न सक्दैन होला ।” ओमानविरुद्धको दोस्रो खेलमा नेपालले २ सय ४९ रन बनाए पनि पराजित भएको थियो । सोही खेलमा सन्दीपले १० ओभरमा बिना कुनै विकेट ६५ रन खर्चेका थिए ।

कीर्तिमानको ओइरो

लिग २ को अन्तिम खेलमा नेपालले अमेरिकालाई ३५ रनमै समेट्दै ८ विकेटको जित दर्ता गर्दा थुप्रै कीर्तिमान बन्यो । टस जितेर पहिले ब्याटिङ गरेको अमेरिकाले नेपाली स्पिनरसामु घुँडा टेक्यो । अमेरिका १२ ओभरमा ३५ रनमै अलआउट भयो । नेपालले अमेरिकालाई एक दिवसीय अन्तर्राष्ट्रियकै न्यून स्कोरमा समेटिदियो । श्रीलंकाले सन् २००४ मा जिम्बाबेलाई ३५ रनमै अलआउट गरेको थियो ।

सो खेलमा एक दिवसीय अन्तर्राष्ट्रियमा सबैभन्दा कम बल खेल्ने कीर्तिमान अमेरिकाको नाममा बन्यो । सन् २०१७ मा अफगानिस्तानसँग ५४ रनमा अलआउट हुँदा जिम्बाबेले १३ दशमलव ५ ओभर खेलेको थियो । नेपालसँग अमेरिका त्योभन्दा ११ बलअगावै अलआउट भयो । जवाफमा नेपालले ५ दशमलव २ ओभरमै जित हात पार्‍यो । ६ सय बलको खेलको नतिजा मात्रै १ सय ४ बलमै आयो ।

नेपालले एक दिवसीय अन्तर्राष्ट्रियमा तेस्रो चाँडो लक्ष्य पछ्याउने कीर्तिमान पनि सोही खेलमा बनायो । यसअघि श्रीलंकाले जिम्बाबेलाई २००१ मा कोलम्बोमा हराउँदा लक्ष्य ४ दशमलव २ ओभरमा हात पारेको थियो । सोही खेलमा ६ ओभरमा एक मेडन राख्दै ६ रन खर्चेर ६ विकेट लिएका सन्दीपले एक दिवसीय क्रिकेटमा नेपाली बलरमध्येबाट सर्वोत्कृष्‍ट प्रदर्शन गरे । सोमपाल कामीले गत वर्ष दुबईमा संयुक्त अरब इमिरेट‌्‌स युएईविरुद्ध ३३ रन खर्चेर ५ विकेट लिनु नेपाली बलरले यसअघि एक दिवसीयमा लिएको सर्वाधिक विकेट थियो ।