मलाई याद छ, म सानो छँदा प्राय: मानिस रेडियो नेपालको समाचारको समयसँग आआफ्नो घडी मिलाउँथे । त्यसताका सरकारीस्तरको एउटै रेडियो भएकाले सायद त्यो सम्भव भएको थियो । तर, अहिले सयौँको संख्यामा खुलेका एफएम  र छिटो र ताजा समाचार पस्किने प्रतिस्पर्धा र समयअगाडि नै 'ब्रेेकिङ न्युज' पस्कने होडका कारण्ा रेडियोको समाचार बज्ने समयसँग घडी मिलाउनु निरर्थक बनिसकेको छ ।

विदेशमा नापतौल र अन्य परिमाणको मानक वा स्थानीयकरण गर्ने संस्थाले देशको समयको पनि गणना र मापन गरी राष्ट्रिय समयको सूचना दिने गर्छ । चीनमा अध्ययनरत रहँदा मलाई याद भएको अर्को कुरा के भने त्यहाँ राष्ट्रिय  समयका लागि एउटा छुट्टै निकाय कार्यरत थियो । कुनै पनि फोनमार्फत ११७ डायल गरेपछि स्थानीय समयको जानकारी गराइन्थ्यो । इन्टरनेटमै पनि केही यस्ता साइट छन्, जसले आआफ्नो देशको सही समयांकन गर्छन् । सुनिन्छ, केही  दशकअघिसम्म काठमाडाँैवासी घन्टाघरको घडी अनुसार आफ्नो नाडी घडी मिलाउँथे । तर, अचेल घन्टाघरका चारतिरका घडीले नै चारथरी समयको संकेत गरिरहेका हुन्छन् ।

एउटा यस्तो काम छ, जुन नेपालमा ठ्याक्क समयमै हुने गर्छ । यदाकदा घन्टाघर, रेडियो वा टेलिभिजनको समयमा शंका रहँदा म त्यसैका आधारमा आफ्नो घडी मिलाउने गर्छु । त्यो हो, लोडसेडिङ । नेपालमा आधिकारिक समयको  सूचना दिने निकाय सक्रिय नरहुन्जेल तपाईं पनि बत्ती निभ्ने समयलाई नै आधिकारिक समय मान्न सक्नुहुन्छ । चिरकालसम्म जारी रहने भएकाले कमसेकम हाम्रो पुस्ता यसमा आजीवन भर पर्न सक्छ ।

दिलीप आचार्य