एक जोडी पाउजेब

ससाना सुन्दर पयरमा

के तिमी सुनिरहेका छौ

पाउजेबको आवाज ?

हलुका–हलुका ध्वनि

छमछम–छमछम

छमछम–छमछम

सँगसँगै अस्फुट स्वर

केके, केके, केके...

अलिकति हाँसो मिश्रित

अनि चुराको बोली

छनछन–छनछन

छनछन–छनछन

एउटा अन्तरालमा सुनिन्छ

मन्द–मन्द पदचाप

थपथप–थपथप

थपथप–थपथप

र सुन

सुन फेरि

कलिलो पाउजेबलाई

छमछम–छमछम

छमछम–छमछम

हो, झन्डै एक दशकअघिको

यो पाउजेबको आवाज

छमछम–छमछम

छमछम–छमछम

कहाँ हराएको छ ?

छिमेकी हिन्दुस्तान र पाकिस्तानको

मुम्बईको कमाठीपुरामा

या लाहोरको हीरामण्डीमा ?

कहाँ–कहाँ हँ ?

अथवा केही परको

कुनै अरब नगरीमा ?

दुबईको गोल्डेन सैंड्स होटलमा

या दोहाको रेडलाइन क्लबमा ?

एक जन्मदाता पिता

र सहोदर दाजुभाइहरू हो

एक पटक आ–आफ्ना छातीमा

हात राखेर भन

अहिले कहाँ छ

हराएको छ कहाँ

छमछम–छमछम

छमछम–छमछम

सुन्दर पयरको एक जोडी

निर्दोष पाउजेबको

मर्मर ध्वनि ?