आठ हजार हेक्टर जंगल खोइ ?
वनको स्वामित्वमा रहेको जमिनमा सरकारले उपलब्ध गराउने सबै भौतिक पूर्वाधारका सुविधा
र
नापी कार्यालयको तथ्यांकमा ३२ हजार हेक्टर जंगल छ रुपन्देहीमा । तर, फिल्डमा भने मुस्किलले २४ हजार हेक्टर मात्रै जंगल छ । बाँकी आठ हजार हेक्टर क्षेत्रफल जंगल कता गयो त ?
नापी कार्यालयको नक्सामा रुपन्देहीको जंगल क्षेत्र भनेर छुट्याइएका धेरै स्थानमा स–साना घरदेखि पाँचतलेसम्म आधुनिक भवन बनेका छन् । जंगल भनिएको क्षेत्रमा सार्वजनिक विद्यालय, क्याम्पस, संस्थागत विद्यालय, खेल मैदान, जातीय संघसंस्थाका भवन, मठमन्दिर, बिहार मात्र नभएर गाविस भवन, स्वास्थ्य चौकी, सेनाको ब्यारेक, प्रहरी चौकीलगायतका सरकारी भवन ठडिएका छन् ।
“जंगल भनेर नक्सामा छुट्टिएको आठ हजार हेक्टरमा ठूलठूला भवनदेखि स्कुल, क्याम्पस, खेल्ने मैदान, मन्दिर, सरकारी कार्यालय बनेका छन्,” रुपन्देहीका जिल्ला वन अधिकृत इन्द्रबहादुर पछाई भन्छन्, “वन अतिक्रमणको विकराल स्थिति छ । राज्यका निकायहरूबीचमै अतिक्रमण हटाउन सहयोगी भूमिका छैन ।”
अनौठो त के भने बिनालालपुर्जाका जमिनमा बनेका विद्यालय, क्याम्पसले मान्यता प्राप्त गरेका छन् र शिक्षक दरबन्दी उपलब्ध छन् । अझ बिनालालपुर्जाका जमिनमा निर्मित भवनमा समेत बिजुली, टेलिफोन, खानेपानीजस्ता सरकारी सुविधा उपलब्ध हुने गरेको छ । लालपुर्जा भएका बस्ती र नभएका बस्तीमा समान रूपमै सरकारी सुविधा, बजेट र अनुदान गइरहेकै छ ।
वन कार्यालयका अनुसार बुटवल उपमहानगरपालिकाका अतरिक्त देवदह, सैनामैना र तिलोत्तमा नगरपालिका एवं रुद्रपुर, सालझन्डी, विष्णुपुरा क्षेत्रमा बढी अतिक्रमण भएको छ । अतिक्रमण भएका मुर्गिया, सालझन्डी, बाँसगढी, खैरेनी सहरमा परिणत भइसकेका छन् । अन्य सहरोन्मुख छन् ।
अतिक्रमण भएको स्थान नछुट्याइदिनाले करिब चार दशकअघि सरकारले खोलेको पुन:वास कम्पनीकै पालामा आएर जोतभोग गरी बसोवास गर्दै आएका बासिन्दा पनि समस्यामा परेका छन् । सरकारले बस्ती बसाल्नका लागि बोलाएपछि पसिना बगाउँदै बन्जर जमिन खेतीयोग्य बनाएकाले पुस्तौँ बित्न लाग्दा पनि लालपुर्जा पाउन सकेका छैनन् ।
देवदह नगरपालिका क्षेत्रमा झन्डै साढे नौ हजार घरधुरीमध्ये ९० प्रतिशत ऐलानी (लालपुर्जा नभएको) जमिन छ । नगरपालिकाका कार्यकारी अधिकृत गणेश घिमिरे बहुसंख्यक बासिन्दा र घरधुरी भएकाले १०/१२ वर्षअघिदेखि नै बिजुली, टेलिफोन, खानेपानीजस्ता सेवासुविधा प्रदान गर्दै आएको बताउँछन् । “ऐलानी र लालपुर्जा जग्गाबीच कुनै फरक छैन,” घिमिरे भन्छन् ।
गत वर्ष अतिक्रमण हुन लागेको करिब दुई सय बिघा ऐलानी जमिन नगरपालिकाले जोगाएर राखेको थियो । जिविसलगायतका सरकारी निकायले बजेट विनियोजन गरेपछि नगरपालिकाले पनि सामान्य अभिलेख राखेर सेवा प्रदान दिनुपर्ने स्थिति आएको घिमिरे बताउँछन् ।
जंगल क्षेत्रमा विकासका पूर्वाधार तयार हुन थालेपछि लालपुर्जा नभए पनि भित्रभित्रै घरजग्गाको खरिदबिक्री दिन प्रतिदिन बढिरहेको छ । यति मात्रै होइन, जंगल क्षेत्रमा निर्मित बस्तीलाई समेट्दै धमाधम नगरपालिका र उपमहानगरपालिका समेत घोषणा हुँदै जान थालेका छन् ।
वन मन्त्रालयले दुई वर्षभित्र अतिक्रमणको लगत लिने र अतिक्रमण हटाउने भनी ‘वन अतिक्रमण रणनीति, २०६८’ लागू गरेको छ । तर, कार्यान्वयन पक्ष प्रभावकारी छैन । वन अतिक्रमण हटाउन वन अतिक्रमण नियन्त्रण जिल्ला स्तरीय कार्यदल गठन गरी प्रमुख जिल्ला अधिकारीलाई संयोजक तोके पनि अहिलेसम्म बैठकसमेत बसेको छैन ।
प्रमुख जिल्ला अधिकारी विष्णुप्रसाद ढकाल संविधान निर्माणको प्राथमिकता र मधेस आन्दोलनका कारण यसका लागि समय अनुकूल हुन नसकेको बताउँछन् । वन कार्यालयले अतिक्रमण हटाउन वा कारबाही गर्न खोजेमा सबैभन्दा पहिला नहटाउन र कारबाही नगर्न राजनीतिक दल र नेताले दवाब दिने गरेका छन् ।
“जंगल क्षेत्रमा निर्माण गरेर संघसंस्था र सरकारी निकायबाटै भएको अतिक्रमण हटाउने जिम्मेवारी वन कार्यालयको मात्रै होइन,” वन अधिकृत पछाई भन्छन्, “कानुन र नियमको पालना सबै निकायले गरिदिने हो भने अतिक्रमण हटाउन गाह्रो छैन ।”
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...