स्थानीय तहको राहतमा राजनीति
निमुखा र विपन्न परिवारको राहतमा वडाध्यक्ष, सदस्यका आफन्त र पार्टी कार्यकर्ताहरूको हालीमुहाली
लकडाउनका कारण खाद्य संकट भोगिरहेका समुदाय र परिवारलाई स्थानीय तहले राहत प्याकेज वितरण सुरु गरेको छ । तर वितरण प्रक्रियामा जनगुनासो बढेको छ ।
गत शुक्रबार लकडाउन तोड्दै केही जनताले धनगढी नगरपालिका कार्यालयमा नाराबाजी गर्दै विरोधसमेत प्रदर्शन गरे । उनीहरूले राहत वितरण प्रक्रियामा असन्तुष्टि व्यक्त गरे । नगरपालिकाका कर्मचारी, वडाका अध्यक्ष, सदस्य र राजनीतिक कार्यकर्ताले मात्रै राहत पाउन लागेको बताएका छन् ।
धनगढी ५ का दिनेश चटौतले छाक टार्न समस्या भएका परिवार र समुदायलाई स्थानीय सरकारले खाद्यान्न उपलब्ध गराउन नसकेको बताउँछन् । “जनप्रतिनिधिले केही आफन्त र कार्यकर्तालाई मात्रै राहत वितरण गर्न लागेको सुन्नमा आएको छ,” उनी भन्छन्, “घरमा अनाज भएकाहरूले यो बेला राहत लिनु र त्यस्ता व्यक्तिलाई दिनु अपराध हो । यसरी वितरण गर्ने वडाध्यक्ष र सदस्यलाई समेत कारवाहीको दायरामा ल्याउनु पर्छ ।”
धनगढी उपमहानगरपालिकाका प्रवक्ता तथा वडा नं १ का सन्तोष मुडभरीले राहत वितरण खुला रूपमा गरिने भएकाले कसले पाए, कसले पाएन भन्ने सबैलाई थाहा हुने बताउँछन् । उनका अनुसार विभिन्न संघसस्थाबाट संकलित खाद्यान्नसहितको राहतलाई उपमहानगरका सबै वडाका विपन्न परिवारलाई वडा कार्यालयद्वारा वितरण गरिएको छ । नगरपालिकामा विभिन्न संस्थाबाट हालसम्म २२ हजार किलो चामल संकलन भएको बताउँछन्, मुडभरी ।
वडा कार्यालयबाट मतदाताका आधारमा राहत वितरण भएकाले नगरमा विभिन्न जिल्ला, स्थानीय तहबाट मजदुरी, रोजगारी र अध्ययनमा आएकाहरूले पनि राहत नपाएको गुनासो सुनिन्छ ।
“सुदूरपश्चिमको प्रमुख सहर धनगढीमा देशका विभिन्न भागबाट काम गर्न र अध्ययनका लागि आएका छन्,” धनगढीमा डेरा गरी बस्दै आएका प्रेमराज भट्टले भन्छन्, “स्थानीय तहले आफ्नो मतदातालाई मात्रै राहत दिन लागेका छन् । अन्यले पाउन सकेका छैनन् ।”
धनगढी बजारमा पाँच हजारभन्दा बढी रिक्सा, अटोरिक्सा, ठेला चलाउने मजदुर छन् । सुदूरपश्चिम प्रदेशका विभिन्न जिल्लाबाट रोजगारी र अध्ययन गर्न आउनेको संख्या दस हजारभन्दा बढी छ ।
कैलालीकै अर्काे ठूलो नगरपालिका गोदावरीमा वितरण भइरहेको राहतमा पनि निमुखा र विपन्न परिवारले भन्दा वडाध्यक्ष, सदस्यका आफन्त र पार्टी कार्यकर्ताहरूले पाइरहेको बताइन्छ । गोदावरी बल्मीबाट भीमबहादुर थापाले टेलिफोनमा राहत वितरणमा भइरहेको पक्षपातको समाचार संकलनको लागि आइदिन अनुरोध गर्दै भन्छन्, “राहत कसले पाइरहेका छन्, कसले पाउन सकेका छैनन्, पत्रकारहरू फिल्डमा आइदिनु पर्यो ।”
वडाध्यक्ष र सदस्यहरूका आफन्तजनले वडा कार्यालयबाट रासन लिएर गएकाले त्यहाँ पुगेका विपन्न परिवारले रासन पाउन नसकेको थापा बताउँछन् । कैलाली जिल्लामा १३ स्थानीय तह छन् । सबै स्थानीय तहले लकडाउनमा खाद्य संकटमा परेकालाई राहत वितरण गरिरहेको छ । कहीँबाट पनि स्थानीय तहको राहत वितरण ठीक प्रकारले हुन नसकेको गुनासो आएको छ ।
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...