कोरोनाको त्रासबाट बच्‍न भारतबाट अनेकौँ सास्ती खेप्दै स्वदेश फर्किन लागेका १ सय ८१ नेपाली नेपालगन्जको जमुनाहा नाकामा तीन दिनदेखि अलपत्र छन् । दशगजामा अलपत्र परेकाहरु बाँके, बर्दिया, दाङ, सुर्खेत, रोल्पा, सल्यान, रुकुम, जुम्ला ,अछाम, मुगुदेखि झापासम्मका गरी २५ जिल्लाका छन् । उनीहरू खुला आकाशमुनि कष्टपूर्ण अवस्थामा छन् ।

नेपालमा रहेका भारतीय यतै र भारतमा रहेका नेपाली लकडाउनभरि उतै बस्‍नुपर्ने गरी लकडाउन भएपछि सीमामा आइसकेका नेपाली रोकिनुपर्‍यो। दशगजासम्म आइसकेका नेपालीलाई भारततर्फै क्‍वारेन्टाइनमा बस्‍ने व्यवस्था मिलाउन भारतीय सुरक्षा अधिकारी तयार थिए । तर नेपालीले स्वदेशमै फर्केर क्‍वारेन्टाइनमा बस्‍ने अड्डी लिए ।

४०/५० किलोमिटर पैदलै हिँडेर भोकै प्यासै नेपाल प्रवेश गरेका उनीहरुलाई भारततर्फ फर्काइएपछि स्थिति केही तनावपूर्ण बनेको थियो । उनीहरुले घर फर्किन नपाएकोमा आक्रोश पोखेका थिए ।

नेपालगन्ज उपमहानगरपालिका उनीहरुलाई क्‍वारेन्टाइनमा राख्‍न तयार भए पनि जिल्ला प्रशासन कार्यालयले सरकारी निर्णयविपरीत प्रवेश गर्न दिएन । २० चैतदेखि भने दशगजा नजिकै टेन्टमा क्‍वारेन्टाइन व्यवस्था गर्न लागिएको सरकारी अधिकारीहरूको भनाइ छ ।