अहिले दुई तिहाइवाला सरकार चलाइरहेको  देशकै सबैभन्दा ठूलो पार्टीको नाम हो, नेपाल कम्युनिस्ट पार्टी (नेकपा) । अर्थात्, यसलाई छोटकरीमा  ‘नेकपा (नेकपा)’ भन्ने चलन पनि छ । एउटै नाममा दुइटा नेकपा भएकाले कोही–कोही यसलाई ‘डबल नेकपा’ पनि भन्ने गर्छन् । एउटा कोष्ठकभित्रको नेकपा, अर्को कोष्ठकबाहिरको नेकपा । कुल मिलाएर दुइटा नेकपा । पार्टी एउटै हो तर नेकपाचाहिँ दुइटा । अर्थात्, एउटै पार्टीभित्र दुइटा नेकपा । एउटा नेकपाको नेतृत्व कमरेड खड्गप्रसाद ओली गर्छन् । अर्को नेकपाको नेतृत्व कमरेड पुष्पकमल दाहाल । नेकपा (नेकपा) गठन हुादा त्यहाँ दुइटा अध्यक्ष किन राखियो भन्ने कुरो अब त सबैलाई थाहा भयो होला । पार्टीभित्र नेकपै दुइटा भएपछि अध्यक्ष पनि त दुइटै चाहियो नि, होइन ?

नेपालमा नेकपाहरु धेरै छन् । सबै नेकपाका आ–आफ्नै हैसियत र अस्तित्व छन् । नेकपा (नेकपा) मात्रै त्यस्तो नेकपा हो, जसमा एउटै नेकपाभित्र दुइटा नेकपा छन् । दुइटा नेकपाका लागि त्यहाँ दुइटा अध्यक्ष छन् । दुइटा कार्यालय छन् । दुइटा विचार छन् । दुइटा सिद्धान्त छन् । अनौठो यही छ कि सबै दुइटा भएर पनि गत साता राजनीतिक प्रतिवेदनचाहिँ एउटा मात्र पेस भयो । दुइटा अध्यक्षको एउटै प्रतिवेदन । तर प्रतिवेदन एउटै भए पनि त्यहाँ प्रस्टै संकेत गरिएको छ, नेकपाभित्र दुइटा नेकपा छन् । त्यो पनि प्रस्टै रुपमा एउटा कोष्ठकभित्र, अर्को कोष्ठकबाहिर । अब यो कोष्ठक नहटेसम्म त कसरी नेकपाभित्र नेकपा मात्र रहन्छ होला र ?