पूर्वी ढोकामा अवैध प्रवेश
काँकडभिट्टा नाकामा फितलो सुरक्षाका कारण बेरोकटोक भित्रिँदै विदेशी
अवैध रूपमा नेपाल छिरेका एक चिनियाँ नागरिक झापाको बिर्तामोडबाट पक्राउ परे चैत ०७३ मा । भोलिपल्टै एक अमेरिकी दक्षिण झापाको बनियानीबाट समातिए । त्यसअघि ३० असोज ०६८ मा गैरकानुनी रूपमा नेपाल छिरेका चार तिब्बती पूर्वी सीमा नाकाबाटै समातिएका थिए ।
अध्यागमन कार्यालय काँकडभिट्टाका अनुसार भीसा अवधि सकिएपछि पनि अवैध रूपमा नेपाल बस्दै आएका बुर्किनाफासोका नागरिक १६ वैशाख ०७४ मा काँकडभिट्टाबाट पक्राउ परेका थिए । “भिसा सकिए पनि अवैध ढंगले बसिरहेको अवस्थामा उनलाई समातिएको हो,” अध्यागमन प्रमुख पवन गुप्ता भन्छन्, “जरिवाना तिराएर छाडियो ।”
सन् १९५० को नेपाल–भारत मैत्री सन्धिको धारा ७ अनुसार नेपाली भारततिर र भारतीय नेपालतिर खुला रूपमा आउजाउ, व्यापार व्यवसाय र बसोबास गर्न पाउने प्रावधान छ । सोही प्रावधानका कारण भारतीयलाई वारि आउन र नेपालीलाई पारि जान अप्ठेरो पर्दैन । तर, खुला सीमाको फाइदा भने अन्य मुलुकका नागरिकले उठाउँदै आएका छन् ।
पूर्वी नाकाको फितलो सुरक्षाका कारण जुनसुकै विदेशी नागरिक पनि सहज रूपमा नेपाल प्रवेश गर्न सक्छन् । झापाका प्रमुख जिल्ला अधिकारी जनकराज दाहाल दाबी गर्छन्, “विदेशीको अवैध प्रवेश र अन्य अवाञ्छित गतिविधि नियन्त्रण गर्न नाकामा कडाइ थालेका छौँ ।”
बंगलादेशी, भुटानी, तिब्बती र श्रीलंकाली नागरिकको समेत यो नाकाबाट अवैधानिक आगमन हुने गरेको छ । भारतीय सीमा सुरक्षा बल (एसएसबी) ले स्वतन्त्रता दिवसको पूर्वसन्ध्यामा गत वर्ष अवैध रूपमा नेपाल प्रवेश गर्न लागेका पाँच श्रीलंकालीलाई सीमावर्ती सहर पानीटंकीबाट नियन्त्रणमा लिएपछि उनीहरूको अवैध आगमनको रहस्य खुलेको थियो ।
भारतीयसँग भाषा र रूपरंग मिल्दोजुल्दो हुने भएकाले सबभन्दा बढी बंगलादेशी अवैध रूपमा नेपाल छिर्ने गरेको पाइएको छ । उनीहरू भारत पनि अवैध बाटो भएर आउँछन् । यद्यपि, वैधानिक बाटोबाट नेपाल आउने र फर्किहाल्ने बंगलादेशीको संख्या पनि यो नाकामा उल्लेख्य छ ।
अध्यागमन कार्यालयका अनुसार चालू आर्थिक वर्षको पहिलो चौमासिकमा ६ सय ६६ बंगलादेशी नेपाल प्रवेश गरेका छन् । यस्तै, ३ श्रीलंकाली र ५ पाकिस्तानी पनि आएका छन् । तर, अध्यागमनसँग तिब्बतीको तथ्यांक छैन । उनीहरू अवैध रूपमा प्रवेश गर्ने भएकाले अध्यागमनको तथ्यांकमा नदेखिएको हुन सक्ने अनुमान कार्यालयको छ ।
मुम्बई बमकाण्डपछि बंगलादेशीलाई भारतले ‘ट्रान्जिट’ भिसामा कडाइ गरेको थियो । त्यसयता नेपाल आउने बंगलादेशीको संख्यामा गिरावट आएको छ । “भारतले भिसा नदिँदा उनीहरूको अवैध प्रवेश बढेको हुन सक्छ,” अध्यागमन स्रोत भन्छ ।
भारतीय बंगाली र बंगलादेशीको रूपरंग मिल्दोजुल्दो छ । भाषा पनि लगभग उस्तै बोल्छन् । पहिचान गर्न सक्ने संयन्त्र नहुँदा अध्यागमन कर्मचारी र प्रहरी उनीहरूको अवैध आगमनबारे बेखबर बन्ने गरेका छन् ।
अवैध रूपमा भारत प्रवेश गरेका बंगलादेशीलाई भारतीय सुरक्षाकर्मीले पटक पटक नियन्त्रणमा लिँदै आएका छन् । उनीहरू अवैध रूपमै नेपाली नागरिकता लिएर विभिन्न आपराधिक क्रियाकलापमा सक्रिय हुने र नेपाली नागरिक बनेर विदेशसमेत उड्ने गरेका छन् ।
भारतीय प्रहरी स्रोतका अनुसार पश्चिम बंगालको दक्षिण दिनाजपुरस्थित भारत–बंगलादेश सीमा क्षेत्र हिली र बंगलाबन्धलगायतका नाकाबाट बंगलादेशीको अवैध प्रवेश हुने गर्छ । भुटानी र तिब्बती नागरिक भने सिक्किमे नागरिक भन्दै अवैध रूपमा नेपाल छिर्ने गर्छन् ।
भुटानीको नेपालीसँग भाषा, अनुहार मिल्ने हुँदा उनीहरूको अवैध नेपाल प्रवेश सहज हुने गरेको छ । खोटाङको धार्मिकस्थल हलेसी दर्शनका लागि यो नाका उनीहरूले प्रयोग गर्दै आएका छन् । अध्यागमन कार्यालय प्रमुख गुप्ताका अनुसार चार महिनामा ५ सय भुटानी वैध बाटोबाटै नेपाल भित्रिएका छन् ।
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...