यतिखेर बाराको पथलैया पुग्ने हो भने पानीसरी पसिना बग्छ । बटुवा छहारीमा बसेर कोही चिसो पिउँदै गरेका देखिन्छन् भने कोही हातेपंखा हम्केर तात्तिएको ज्यानलाई थोरै भए पनि राहत दिने प्रयासमा हुन्छन् । तर एक थरी मजदुर भने तरतरी पसिनाको पर्वाह नगरी साबेल पिक चलाउन र पाइप वेल्डिङ गर्न व्यस्त देखिन्छन् ।

लामो समयदेखि चर्चामा रहेको पेट्रोलियम पाइपलाइनको काम अन्तिम चरणमा पुगेको छ । नेपाल–भारत दुवै सरकारको प्राथमिकतामा रहेको भारतको मोतिहारीदेखि बाराको अमलेखगन्जसम्म पेट्रोलियम पाइपलाइनअन्तर्गत अब पर्सा राष्ट्रिय निकुन्जभित्रको साढे दुई किलोमिटर क्षेत्रभित्र मात्र पाइप बिछ्याउन बाँकी छ ।

मोतिहारीदेखि अमलेखगन्जसम्म पाइपलाइन बिच्छ्याउने काम ९५ प्रतिशत सकिएको छ । पाइपलाइन बिछ्याउने क्षेत्रमा करिब ९ किलोमिटर पर्सा राष्ट्रिय निकुन्ज पर्ने भएकाले त्यहाँ ६ हजार ५ सय ठूलासाना रुख काटिएको छ । मोतिहारीदेखि अमलेखगन्जसम्म ७० किलोमिटर लम्बाइको पाइपलाइन बिछ्याउने काम झन्डै ६८ किलोमिटरसम्म पूरा भइसकेको छ ।

अहिले बाँकी कामका लागि बिहान ७ देखि सूर्यास्त नहुन्जेलसम्म मजदुर खटिरहेका छन् । यसरी काम गर्दा थकाइ र गर्मी लाग्दैन त ? उनीहरु भन्छन्, “थकाइ भनेको त पैसा हात नपरुन्जेल मात्र हो । मजदुरीको पैसा हात परेपछि सबै सन्चो हुन्छ ।”

तस्बिरहरु हेर्नुहोस :