प्रधानमन्त्री केपी ओली हालै सिंगापुरबाट फर्किएका छन् । उनी सिंगापुर जानुको एउटै मात्र कारण रहेछ, स्वास्थ्य परीक्षण । अब सिंगापुरमा उनको के स्वास्थ्य परीक्षण भयो, त्यो त हामीलाई थाहा भएन । हुने कुरा पनि होइन । तथापि थाहा यत्ति भएको छ कि सिंगापुरका चिकित्सकले प्रधानमन्त्रीलाई धेरै धपेडी नगर्न सुझाव दिएका छन् । अर्थात्, आराम गर्न सुझाएका छन् । आराम गर्नुस्, आराम गरेपछि ठीक हुन्छ ।

सुझाव दिनु राम्रै हो । डाक्टरको कामै सुझाव दिने हो । तर सिंगापुरसम्म पुगेर प्रधानमन्त्री ओलीले जुन सुझाव पाए, त्यो उनलाई खासै चाहिने सुझाव भने होइन । किनभने आराम गर्नुस् भनेर उनलाई कसैले सुझाव दिनैपर्दैन । आराम त उनले मजाले गरिरहेका नै छन् । प्रधानमन्त्री भएदेखि उनले आजसम्म गरेको कुनै काम छ भने त्यो आरामै मात्र हो । अहिले देशमा मच्चिरहेको भाँडभैलो देख्दा पनि थाहा हुन्छ, देशका प्रधानमन्त्री मजाले आराम गरिरहेका छन्  । सरकारले हरेक वर्ष विकासका लागि बजेट ल्याउँछ तर खर्च गर्न सक्दैन । पुल बनाउने कुरा गर्छ तर बनाउन सक्दैन । जहाज चलाउने कुरा गर्छ तर चलाउन सक्दैन । रेल कुदाउने कुरा गर्छ तर कुदाउन सक्दैन । प्रधानमन्त्री त आराम गरिरहेका छन्, कुदाउने कल्ले ?