कमरेड झलनाथ खनाललाई बधाई । उनले पार्टीमा पुनः प्रमोसन पाएका छन् । गुमाइसकेको प्रमोसन पुनः पाएकाले पनि उनलाई बधाई !

त्यसो त प्रमोसन भनेको केही गरेबापत पाइने हो । तर उनले केही गरेबापत होइन, केही नगरेबापत प्रमोसन पाए । जुन दिन उनी पार्टीमा डिमोसन भए, त्यसबेलादेखि झलनाथले पार्टीभित्र केही पनि गरेका छैनन् । न प्रधानमन्त्रीको आलोचना गरे, न प्रधानमन्त्रीलाई गाली गरे । न अध्यक्षको खुट्टा ताने, न गुटबन्दीको आरोप लगाए । यस्तो केही पनि गरेनन् । त्यही केही नगरेबापत झलनाथलाई प्रमोसन दिइएको हो । प्रमोसन भनेको केही नगरेबापत पनि पाउन सकिँदो रहेछ । यो देखेर अरु कोही नभए पनि कमरेड माधव नेपालचाहिँ पक्कै चकित भएको हुनुपर्छ ।

तर कमरेड झलनाथले यो प्रमोसन पाएको केवल ‘केही नगरेका’ कारणले मात्र होइन । ‘कहीँ नगएका’ कारणले पनि हो । पोहोर पार्टीभित्र पदको बाँडफाँट हुँदा उनी चीनमा थिए । चीन गएको मौका पारी पार्टीले उनलाई डिमोसन गरेको थियो । अहिले पनि त्यस्तै गर्ला भनेर उनी चीन गएनन् । चीन मात्र होइन, कहीँ पनि गएनन् । भित्री सूत्रले जानकारी दिएअनुसार त बैठकमा पदसम्बन्धी कुरा चलिरहँदा कमरेड खनाल पिसाबका लागि शौचालयसमेत गएका थिएनन् । के ठेगान, त्यही पिसाबका लागि निस्केकै बेला उता फेरि डिमोसन गरिदिने हुन् कि ? यति धेरै कष्ट सहेर पाएको प्रमोसन हो यो । यसका लागि झलनाथलाई जति बधाई दिए पनि पुग्दैन । बधाई ! बधाई ! बधाई !