दसैँका दृश्यहरू क्रमश: बदलिँदै छन् । १५ दिन लामो यो राष्ट्रिय चाड मनाइरहँदा कतै अभूतपूर्व खुसीयाली त कतै जेनतेन परम्परा धान्नुपर्ने बाध्यता देखिन्थे । दसैँको मौका छोपेर निरीह नागरिकको ढाड सेकाउने कालाबजारीदेखि यातायातको चर्को भाडा असुल्ने पनि कम देखिएनन् ।

त्यसो त दसैँ मनाउने सन्दर्भमा सामाजिक रूपमै धेरै हेरफेर देखिइसकेको छ । पारिवारिक मिलन र समझदारीको पर्व मानिने दसैँमा प्रतिस्पर्धा र तडकभडक डरलाग्दो गरी बढ्दै छ । आडम्बर नदेखाई दसैँ नै नहुने जस्तो स्थिति आइसक्यो ।

खासमा बर्खे कृषिकर्मपछिको शारदीय पर्व हो, दसैँ । यही मौसममा अन्य समुदायका पर्वहरू पनि पर्छन् । दाल, भातदेखि खसी र मरमसलासम्म बाहिरबाट ल्याएर हामी चाडपर्व मनाउँदै छौँ ।

विदेशबाट आयात गरेको चंगा उडाएर भए पनि खुसी खोज्ने कोसिस छ, हाम्रो । दसैँको रातो रौनकले ठूलाबडालाई भन्दा पनि बालबालिकालाई छोइहाल्छ । उनीहरूकै निर्दोष फर्‍याकफुरुकमा पर्वको मर्म जो लुकेको छ । हेरौँ हाम्रो महापर्वलाई, यी तस्बिरहरूमा ।