प्लटिङले सक्यो धान फल्ने खेत
अन्न भण्डार भनेर चिनिने यी जिल्लामा फल्ने धानकै कारण झापाको भद्रपुर र विराटनगरलगायत स्थानमा दर्जनौं कुटानी मिल सञ्चालनमा थिए । धान उत्पादन घटेसँगै अधिकांश मिल बन्द भइसकेका छन् ।
कुनै बेला पूर्वका झापा, मोरङ र सुनसरीमा उत्पादन भएको धान स्थानीय माग पूरा गरी निर्यात समेत हुन्थ्यो भन्दा अचेल पत्याउन गाह्रो पर्छ । अन्न भण्डार भनेर चिनिने यी तीन जिल्लामा फल्ने धानकै कारण झापाको भद्रपुर र विराटनगरलगायत स्थानमा दर्जनौं कुटानी मिल सञ्चालनमा थिए ।
धान उत्पादन निरन्तर घटेसँगै अधिकांश मिलहरू बन्द भइसकेका छन् । सञ्चालनमा रहेकाले पनि आयातीत धान, चामल प्याकिङ गर्ने काम मात्र गरिरहेका छन् । पहिले निर्यात गरेको धान र चामल अचेल भारतबाट ठूलो परिमाणमा आयात हुने गरेको छ ।
किन यस्तो भयो त ? कारण एउटामात्र छैन । घडेरीका लागि खेतीयोग्य जग्गामा प्लटिङ, इँटाभट्टाहरूले ओगटेको ठूलो क्षेत्रफलजस्ता कारणले पूर्वमा खेतीयोग्य जमिन खुम्चँदा आधाभन्दा बढी उत्पादन घटेको छ । सहरीकरण बढ्दै गएपछि खेती गर्ने क्षेत्रफल र उत्पादन घटेको हो ।
पूर्वी तराईका जिल्ला सदरमुकाम, नगरपालिका र सहरोन्मुख गाउँहरूमा धान लहलहाउने जग्गामा पक्की घरैघर छन् । धेरै क्षेत्रमा प्लटिङ गरिएकाले जग्गा बाँझै छ । मुख्य राजमार्ग र सहायक मार्ग आसपास हेर्ने हो भने प्लटिङ नगरिएको स्थान भेट्न मुस्किल पर्ने गरेको उद्योग वाणिज्य महासंघ प्रदेश १ समिति उपाध्यक्ष राजेन्द्र राउत बताउँछन् । “धान फल्ने ठाउँ मासिँदै गए”, उनी भन्छन्, “त्यसैले पहिले निर्यात गर्ने वस्तु अचेल आयात नगरी पुग्दै पुग्दैन ।”
धान उत्पादन हुने खेतमा यसरी धमाधम प्लटिङ भइरहेको छ । तस्बिरः माधव घिमिरे
घडेरीका लागि प्लटिङ र इँटाभट्टा विस्तारका कारण दशकयता झापा, मोरङ र सुनसरीमा करिब ५० हजार हेक्टर खेतीयोग्य जग्गा घटेको छ । यी तीन जिल्लामा ७१ वटा इँटा उद्योग छन् । प्रत्येकले १५ बिघा जमिन ओगटेका छन् । ओगटिएको जग्गामा पहिले मनग्य धान फल्थ्यो । अचेल इँटा ।
प्रदेश कृषि विकास निर्देशनालयका अनुसार प्रदेश १ का १४ जिल्लामा यो वर्ष ३ लाख ४० हजार ८ सय २९ हेक्टरमा धान खेती भएको छ । सबैभन्दा बढी झापामा ८७ हजार ५ सय, मोरङमा ८३ हजार ३ सय र सुनसरीमा ५५ हजार हेक्टरमा धान खेती गरिएको छ ।
तथ्यांक अनुसार झापामा करिब १० हजार, मोरङमा २० हजार र सुनसरीमा १७ हजार हेक्टर खेतीयोग्य जमिन घटेको पाइएको छ । कृषि व्यवसाय प्रवर्द्धन सहयोग तथा तालिम केन्द्रका निर्देशक राजेन्द्र उप्रेतीका अनुसार दशकअघि झापामा ९५ हजार हेक्टरमा धान खेती हुने गरेकामा घटेर करिब ८० हजार हेक्टरमा सीमित भएको छ ।
प्लटिङमा परिणत भएको खेतीयोग्य जमिन । तस्बिरः माधव घिमिरे
मोरङमा दशकअघिसम्म ९८ हजार हेक्टरमा धान खेती हुने गरेकामा यस वर्ष करिब ८० हजार हेक्टरमा मात्र धान खेती भएको तथ्यांक छ । सुनसरीमा ७२ हजार हेक्टरमा धान खेती हुने गरेकामा ५० हजार हेक्टरमा सीमित बनेको छ ।
१० वर्षअघि सप्तरी र सिरहासहित पूर्वाञ्चलमा ५ लाख ४७ हजार हेक्टरमा धान खेती हुन्थ्यो । अचेल करिब ४ लाख हेक्टरमा बर्खे धान हुने गरेको छ । खेतीयोग्य जमिन घटेसँगै धान उत्पादन पनि ह्वात्तै घटेको छ । दशकअघि वार्षिक १८ लाख टन धान उत्पादन हुने गरेकामा घटेर करिब १२ लाख टनमा झरेको छ ।
धान र अरू कृषि उत्पादन घट्नुको मुख्य कारण प्लटिङ गरी जग्गा खण्डीकरण पनि एक भएको अध्ययनले देखाएको छ । ठूलो परिमाणमा खेतीयोग्य जग्गा घटिरहेको पनि अध्ययनको निष्कर्ष छ । “खेतीयोग्य जग्गा निरन्तर घटिरहेको छ”, अध्येता समूहका सदस्य स्नातकोत्तर क्याम्पस अर्थशास्त्र विभागका सहप्राध्यापक अर्जुन बरालले भने, “सरकारले ठोस भूउपयोग नीति ल्याएर प्रभावकारी कार्यान्वयन नगरे यो क्रम बढेको बढ्यै जाने छ ।” बसोबास क्षेत्र र कृषि क्षेत्रलाई स्पष्ट छुट्याएर प्रभावकारी रुपमा कार्यान्वयन गर्नुपर्ने उनको सुझाव छ ।
खेती र उत्पादन कम भएसँगै धान चामल आयात परिमाण बढेको छ । विराटनगर भन्सार कार्यालयका अनुसार अघिल्लो आर्थिक वर्षमा भारतबाट ५ करोड ३६ लाख ८९ हजार ६ सय २१ किलो धान आयात भएको थियो । यसका लागि १ अर्ब ५० करोड १७ लाख ४४ हजार रुपैयाँ विदेशिएको तथ्यांक छ । सोही अवधिमा २ अर्ब ३ करोड ५९ लाख ६७ हजार रुपैयाँ बराबरको ५ करोड ५ लाख ८८ हजार ५ सय ८९ किलो चामल आयात भएको भन्सारले जनाएको छ ।
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...