नेपाल पर्यटन वर्ष–२०२० को पहिलो महिना । आन्तरिक र बाह्य पर्यटक भित्र्याउन निजी क्षेत्र पनि उत्तिकै अग्रसर देखिन्छ । कलाकारका त के कुरा गर्नु ? नायिका वर्षा राउत पतिसँगै मिलेर युट्युबमा भिडियोब्लग अपलोड गरिरहेकी छन् । यता, लोकदोहोरी कलाकार पनि कम छैनन् । गायक लक्ष्मण चापागाईंले यसै साता नयाँ गीत ‘मायालु रापाकोटको’ भिडियो सार्वजनिक गरे । पर्यटन वर्षलाई लक्षित गरी तयार पारिएको सो गीतमा चापागाईं र सिर्जना सुवेदीको स्वर छ ।

चापागाईंकै लय र शब्द रहेको उक्त गीतमा अर्जुनकुमार पोखरेलले संगीत संयोजन गरेका छन् । गीतको भिडियोमा गायकसहित लक्ष्मण भुसाल, खुसी रामदाम र प्रतिसा लामा, देवेन्द्र सिलवाललगायतका कलाकारको अभिनय छ । रोइला भाकामा गाइएको गीत स्याङ्जाको अर्जुनचौपारी गाउँपालिकामा छायाँकन गरिएको हो । गायक चापागाईं पर्यटकीय, सांस्कृतिक तथा धार्मिक स्थललाई गीतका माध्यमबाट चिनाउने काम गरेको बताउँछन् । पश्चिम नेपालको मौलिक संस्कृतिका रुपमा प्रचलनमा रहेको लोकभाकालाई भूगोल, संस्कृति, धर्म तथा पर्यटनसँग जोडेको उनको जिकिर छ ।