कविता, गीत, कथा, पटकथापछि सर्जक उपेन्द्र सुब्बा निर्देशक बनेका छन् । उनलाई निर्देशक बनाउने काम निर्माता एवं कबड्डी शृंखलाका निर्देशक रामबाबु गुरुङले गरेका हुन् । सुब्बाले जारी चलचित्रबाट बक्स अफिसमा धावा बोल्दै छन् ।

लिम्बू समुदायको संस्कारमाथि बनेको जारी विशुद्ध प्रेमकथा हो । चलचित्रमा दयाहाङ राई, विजय बरालको अभिनय रहेको छ । सुब्बाको घर पाँचथरमै सुटिङ गरिएको चलचित्रको कथा उनले करिब ८ वर्षअगाडि नै लेखेका थिए । भन्छन्, “केही नयाँ गर्न सक्छु भनेर नेपाली चलचित्रमा हात हालेको हुँ ।”

अहिले नेपाली चलचित्रको व्यापार खस्कँदो भए पनि सुब्बालाई कुनै सुर्ता छैन । भन्छन्, “घमन्ड गरेको होइन, तर राम्रो चलचित्र बने सबैले हेर्छन् ।” कोरोनाको बिगबिगी छ नि ? “त्यही भएर त जेठको गर्मीमा सारेको ।” खोलाको गीत कवितासंग्रह र लाटो पहाड कथासंग्रहबाट नाम कमाएका सुब्बा निर्देशकमा कति अब्बल हुनेछन्, त्यो भने २३ जेठमै थाहा हुनेछ ।