सुरु भयो खतराको घण्टी, परीक्षण भने कछुवा चालमा
भारतबाट फर्किएका व्यक्ति र स्थानीयमा कोरोना संक्रमण देखिएपछि नेपाल कोरोना संक्रमणको जोखिम चरणमा प्रवेश गरेको छ
राष्ट्रिय जनस्वास्थ्य प्रयोगशालाले दुई सातादेखि दिन बिराएर नयाँ संक्रमित भेटाइरहेको थियो । २२ चैतका तीन रिपोर्टले भने सिंगो मुलुकलाई झस्काइदियो । १४ चैतमा संक्रमित भेटिएर सेती प्रादेशिक अस्पतालमा उपचार गराइरहेका धनगढीका युवाका आफन्तमा कोरोना सरेको पाइयो । त्यस्तै, मुम्बइबाट फर्किएका कैलालीका २१ वर्षीय युवा र उत्तराखण्डबाट फर्किएका कन्चनपुरका ४१ वर्षीय व्यक्तिमा कोरोना पोजेटिभ देखियो । भारतबाट फर्किएका व्यक्तिमा पहिलोपटक कोरोना देखिएसँगै चैतयता स्वदेश फिर्नेको ठूलो संख्याले जनस्वास्थ्य अधिकारीहरूलाई झस्काईदिएको छ ।
विदेशबाट फर्किएका व्यक्तिबाट स्थानीयमा संक्रमण सरेको पुष्टि भएपछि नेपाललाई प्रकोपको दोस्रो चरणमा प्रवेश गरेको स्वास्थ्य मन्त्रालयका प्रवक्ता डा विकास देवकोटा बताउँछन् । २२ चैत साँझ बसेको मन्त्रिपरिषद् बैठकले लकडाउनमा कडाइ गर्दै एक प्रदेशबाट अर्को, एक जिल्लाबाट अर्को जिल्ला र एक स्थानीय तहबाट अर्कोमा जान समेत रोक लगाएको छ । साथै, कोरोना फैलिएको आशंकामा पोजेटिभ भेटिएका कैलाली, कन्चनपुर र बाग्लुङमा र्यापिड टेस्ट गर्ने निर्णय पनि गरेको छ । संक्रमित भेटिएका कैलालीका २१ वर्षिय युवा लकडाउनपछि गौरीफन्टा नाकामा आएका थिए । त्यहाँ सयौ व्यक्तिको भीडमा रहेकाले संक्रमण फैलिएको हुनसक्ने आशंका जनस्वास्थ्य अधिकारीहरूले गरेका छन् ।
सरकारले ११ चैतदेखि लगाएको लकडाउन लम्बाइरहे पनि आंशका गरिएका व्यक्तिको परीक्षण भने कछुवा गतिमा छ । अहिलेसम्म १ हजार ५ सय २१ व्यक्तिको कोरोना परीक्षण गरिएको छ । तीमध्ये नौ जनामा पोजेटिभ भेटिएकोमा चीनबाट फर्किएका विद्यार्थी निको भएर घर फर्किसकेका छन् । सुदूरपश्चिमका चार संक्रमित सेती प्रादेशिक अस्पतालमा छन् भने टेकु र बाग्लुङ अस्पतालमा दुई–दुई जना संक्रमित उपचारार्थ भर्ना छन् । देशभर अहिले ६९ जना आइसोलेसनमा छन् । कोरोना रोकथाममा अब पनि सरकारले युद्धस्तरमा गर्न नसके संक्रमणले महामारीको रुप लिनेभन्दै जनस्वास्थ्य विज्ञहरूले चिन्ता व्यक्त गरेका छन् ।
र्यापिड टेष्टको शतप्रतिशत विश्वसनीय नभए पनि त्यसले ठूलो भीडबाट संभाव्य संक्रमितको स्क्यानिङ गर्ने स्वास्थ्य अधिकारी बताउँछन् । विवादास्पद स्वास्थ्य सामाग्री खरिदमा ७५ हजार त्यस्ता र्यापिड टेष्ट किट पनि ल्याइएको छ । कोरोनाले महामारीकै लिएर सयौमा संक्रमण फैलिएमा परीक्षण गर्नका लागि भनेर र्यापिट किट मगाइएको उनीहरूको दाबी छ । “संक्रमण भेटिएका व्यक्तिको वरपर र्यापिड टेष्ट पहिल्यै गर्नुपर्थ्यो” स्वास्थ्य विभागमा पूर्व महानिर्देशक डा यशोबर्द्धन प्रधान भन्छन्, “सरकार अब युद्धस्तरमै जानुपर्छ । संक्रमण फैलियो र महामारी भयो भने हाम्रो साधनस्रोत र सामथ्र्यले नियन्त्रण गर्न सक्दैन, भगवान भरोसा हुनेछ ।”
सरकारले ११ चैतमा लकडाउन लगाएपछि पनि भारतीय सीमा र त्रिभुवन अन्र्तराष्ट्रिय विमानस्थलबाट आवागमन भईरहे । १२ चैतमा अन्तिमपटक भन्दै सीमानाकासम्म आइपुगेका नेपालीलाई क्वारेन्टाइनमा बस्ने प्रतिबद्धता दिएर स्वदेश प्रवेश गराइयो । केहीलाई गृहजिल्लासम्मै पुर्याउने व्यवस्थासमेत कैलाली र कन्चनपुर प्रशासनले गरेका थिए । लकडाउन अघि र पछि स्वदेश फर्किएकाहरूको १४ दिने क्वारेन्टाइन यसै साता सकिँदैछ । त्यसैले यो साता नेपालका लागि कोरोना संक्रमणको जोखिमका दृष्टिले धेरै महत्वपूर्ण हुने स्वास्थ्य मन्त्रालयका विज्ञ सल्लाहकार डा खेम कार्की बताउँछन् । “संक्रमणलाई परिवारकै सदस्यभित्र नियन्त्रण गर्न सकियो भने पनि ठूलो सफलता हुनेछ” भन्छन्, “अबको एक साता/१० दिनको स्थिति हेरेर संक्रमणको आंकालन गर्न सकिने छ । संक्रमण फैलिनबाट मुलुकलाई जोगाउन लकडाउनलाई कडाई गर्ने र विदेशबाट फर्किएका सबै क्वारेन्टाइनमा बस्नुपर्छ ।”
सरकारले सात वटै प्रदेशमा कोरोना परीक्षण प्रयोगशाला स्थापना गरी संचालनमा ल्याएको छ । चितवन र बुटवलबाट पनि २३ चैतदेखि परीक्षण थालिने मन्त्रालयको दाबी छ । तर, नमुना परीक्षणको क्वालिटी नियन्त्रणका लागि प्रदेशमा शंकास्पद देखिएका नमूनालाई केन्द्रीय प्रयोगशालाबाट पुन:परीक्षण गर्ने गरिएको छ । २१ चैतमा पोखराको एउटा नमूनामा पोजेटिभ देखियो । तर, राष्ट्रिय प्रयोगशालामा पुन:परीक्षण गरिदा नेगेटिभ पुष्टि भयो । “सुरुका केही नमूनामा क्वालिटी नियन्त्रणका लागि पुन: परीक्षण भए पनि बिस्तारै प्रदेशकै नतिजा अन्तिम हुनेछ” डा कार्की भन्छन् ।
संक्रमित आठै जनाको स्थिति सामान्य छ । उनीहरूलाई आइसोलेसनमा राखिए पनि विशेष उपचार गर्नुपरेको छैन । ८० प्रतिशतभन्दा कोरोना संक्रमितमा तत्कालै लक्षण नदेखिने र झट्ट हेर्दा स्थिति पनि सामान्य देखिने भएकाले भित्रभित्रै संक्रमण फैलिएको त छैन भन्ने चिन्ता हुन थालेको पूर्वमहानिर्देशक प्रधान बताउँछन् । “भुसको आगोझैँ भित्रभित्रै सल्किएको पनि हुनसक्छ” उनी भन्छन्, “त्यसैले र्यापिड टेष्टलाई बढाउनने र लकडाउन बढाउनुको विकल्प छैन ।”
सरकारले देशभरका डाक्टर र स्वास्थ्यकर्मीलाई हाईअलर्टमा राख्नुपर्ने पूर्वमहानिर्देशक प्रधान बताउँछन् । स्वास्थ्य मन्त्रालयले उपत्यकाभित्र कोरोना बिरामी बढेमा टेकुबाट पाटन र बलम्बुस्थित सशस्त्र प्रहरी अस्पतालमा उपचारको व्यवस्था मिलाएको छ । तीन सयभन्दा धेरै बिरामी भए बल्ल ठूला सरकारी अस्पताल खाली गराएर वीर, शिक्षण वा सिभिल अस्पतालमा उपचार प्रबन्धको रणनीति लिइएको छ । उपत्यकाका अस्पतालमा तीन सय आईसीयु बेड छन् भने भेन्टिलेटरको संख्या पनि १ सय ५० भन्दा धेरै छैन ।
सबैभन्दा अधिक चार संक्रमितको उपचारार्थ भर्ना गरिएको धनगढीस्थित सेती प्रादेशिक अस्पताललाई सुदूरपश्चिमको मुख्य कोरोना विशेषज्ञ अस्पतालका रुपमा विकास गर्नेबारे स्वास्थ्य मन्त्रालयमा छलफल सुरु भएको छ । अस्पतालमा पाँच बेडको आईसीयु र एउटा भेन्टिलेटर छ । तत्कालै ५ बेडको आईसीयु र दुई वटा भेन्टिलेटर थप्न लागिएको अस्पताल प्रमुख डा हेमराज पाण्डे बताउँछन् । तर, आईसीयु, एनआईसीयु, डायलेसिस र विशेषज्ञ प्रसुती सेवा दिदैआएको अस्पतालबाट बिरामी अरु अस्पताल सार्दा ती सेवाहरू बन्चित हुने स्थिति आउनसक्छ ।
२ सय ३० बेडको सेती अस्पतालले अहिले छुट्टै भवनमा २४ बेडको कोरोना वार्ड संचालनमा ल्याएको छ । उनीहरूको उपचारमा संलग्न चिकित्सक र नर्सलाई नजिकै होटलमा बस्ने व्यवस्था मिलाइएको छ । उनीहरूका लागि दुई सातालाई पुग्ने पीपीई पनि छ । “एकैपटक धेरै जनशक्ति संक्रमितबाट एक्पोज नहोउन भनेर थोरै संख्यामा डाक्टर र नर्स कोरोना वार्डका लागि खटाएका छौ” अस्पताल प्रमुख डा पाण्डे भन्छन्, “अहिले बिरामी थोरै र स्थितिसामान्य भएकाले खासै गाह्रो छैन । संक्रमण फैलिएर धेरै र सिकिस्त बिरामी आए कसरी काम गर्ने पूर्वतयारी गर्नुपर्छ ।”
कोरोना संक्रमित को कहाँ ?
- १० माघ, काठमाडौ : चीनबाट फर्किएका ३२ वर्षिय युवा । निको भई घर
- १० चैत, काठमाडौं : फ्रान्सबाट कतारहुँदैआएकी १९ वर्षिय युवा । टेकु अस्पतलामा उपचाररत
- १२ चैत, धादिङ : दुबईबाट आएका ३२ वर्षिय युवा । टेकु अस्पतालमा उपचाररत
- १४ चैत, कैलाली : दुबईबाट आएका ३४ वर्षिय युवा । सेती प्रादेशिक अस्पतालमा उपचाररत
- १५ चैत, बाग्लुङ : बेल्जियमबाट कतारहुदैआएकी १९ वर्षिय युवा । बाग्लुङ अस्पतालमा उपचाररत
- २० चैत बाग्लुङ : दुबईबाट आएकी ६५ वर्षिय महिला । बाग्लुङ अस्पतालमा उपचाररत
- २२ चैत कञ्चनपुर : भारत उत्तरान्चलबाट आएका ४१ वर्षिय पुरुष । सेती प्रादेशिक अस्पतालमा उपचाररत
- २२ चैत कैलाली : भारत मुम्बईबाट आएका २१ बर्षिय युवा । सेती प्रादेशिक अस्पतालमा उपचाररत
- २२ चैत कैलाली : दुबईबाट आएका युवाकी ३४ बर्षिय भाउजु । सेती प्रादेशिक अस्पतालमा उपचाररत
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...