पेसाले लेखक, अध्येता तथा प्रकाशक हुन्, अर्चना थापा । उनी आक्कलझुक्कल नाटकमा पनि देखिन्छिन् । उनी अभिनीत दोस्रो नाटक मकैको अर्कै खेती अहिले थिएटर भिलेजमा चलिरहेको छ ।

नाटक खेल्नुभएको यो पहिलोपटक हो ?

होइन । यसअघि पनि अभिनय गरिसकेकी छु ।

मकैको अर्कै खेतीमा कस्तो भूमिकामा देखिनुभएको छ ?

म अनपढ र गरिब महिलाको भूमिकामा देखिएकी छु । लेखक श्रीमान्ले पैसा कमाएन, खालि लेखी मात्रै रह् यो भनेर किचकिच गरिरहन्छु नाटकमा । यसबाहेक, प्रकाशकको भूमिका पनि छ । 

नाटकबारे थप केही कुरा !

यो कृष्णलाल अधिकारीले लेखेको नाटक मकैको खेती होइन । यद्यपि, त्यसका थुप्रै ‘मेटाफोर’ यसमा प्रयोग भएका छन् । नाटक सबै अदालतको सेटिङमा छ ।

रमाइलो प्रसंग के छ नाटकको ?

दैनिक जीवनमा श्रीमान् सञ्जीव (उप्रेती)लाई मैले चुरोट नपिऊ भनेर कचकच गरिरहन्छु । तर पनि यताउता लुकेर पिइछाड्छन् । यसमा पनि त्यस्तै सेटिङ छ । त्यो रमाइलो लाग्छ हामी दुवैलाई ।

नाटक खेल्दाको अप्ठ्यारो के हो ?

मेरो वास्तविक जीवन र यस नाटककी म बिलकुल फरक छौँ । यसमा म अनपढ र कचकचे श्रीमती भएकी छु । गरिब र पीडित महिलाको भाव अनुहारमा ल्याउन साह्रै गाह्रो भो !

नाटकमा तपाईंको दोहोरो चरित्र छ त्यसो भए ?

हो । म एउटी प्रकाशक भएर यसमा लेखकलाई गाली पनि गरेकी छु । एउटा लेखककै कारण देशमा नाकाबन्दी लागेको, आन्दोलन भएको, देशमा समस् या लेखककै कारण भएको आरोप लगाउँछु ।

लेखनीका काम के गर्दै हुनुहुन्छ ?

नेपाली भाषामा कथाको काम गरिरहेकी छु । तर, अनेक कारणले काम अघि बढ्न सकिरहेको छैन ।