चिकित्सक विनोदकुमार साह, ३८, टर्कीस्थित अस्पतालमा सिनियर कन्सल्ट्यान्टका रुपमा कार्यरत छन् । सिरहा, गोलबजारका साहलाई भर्खरै टर्की सरकारले ‘२०१५ का उत्कृष्ट चिकित्सक’को रुपमा सम्मान गर्‍यो ।

टर्की कहिले जानुभएको थियो ?

शिक्षा मन्त्रालयबाट एमबीबीएस पढ्न छात्रवृत्ति पाएको थिएँ । त्यही सिलसिलामा सन् २००० मा टर्की आएँ ।

कहाँ कार्यरत हुनुहुन्छ ?

टर्कीको हेकिम अस्पतालमा डक्टर अफ पेडियाट्रिक्स एन्ड नियोनाटल इन्टेन्सिभ केयर युनिटमा सिनियर कन्सलट्यान्टका रूपमा काम गर्दैछु ।

तपाईंले भर्खरै पाएको पुरस्कार कस्तो हो ?

सन् २०१४ मा पनि मैले टर्कीको एउटा स्टेटमा काम गर्दा ‘बेस्ट डक्टर अफ स्टेट’का रूपमा सम्मान पाएको थिएँ । भर्खरै पनि टर्की सरकारले सन् २०१५ का लागि ‘बेस्ट डक्टर अफ इयर’का रूपमा सम्मानित गरेको छ ।

पुरस्कार पाएपछि कस्तो प्रतिक्रिया पाउनुभयो ?

मेरा परिवारका सदस्य साह्रै खुसी भए । गोलबजारका गाउँलेहरू पनि यो सफलतामा खुसी र दंग छन् ।

नेपाल नफर्किने त ?

मलाई टर्की सरकारले एमडी पढ्न छात्रवृत्ति दिएको हो । त्यसै कारण पनि यहाँका मानिसको सेवा गर्नु कर्तव्य ठान्छु ।

उतै बस्ने ?

होइन । म नेपाल आएर त्यहाँका बालबच्चाको उपचारमा रमाउन चाहन्छु । त्यता आउने प्रक्रियामा छु । तीन महिनाभित्र आइसक्छु ।

प्रतिष्ठित पुरस्कार जित्नुभएको छ । नेपाल सरकारबाट के अपेक्षा छ ?

मैले पुरस्कारका लागि काम गरेको होइन । आफ्नै सन्तुष्टिका लागि हो । मेरै देशले मलाई केही दिनुपर्छ जस्तो पनि लाग्दैन । मैले मेरै देशलाई केही दिनु छ ।

—सिपी अर्याल