यहाँ मानिसहरु वर्षौंदेखि न्याय नपाएर भौँतारिरहेका छन् । अड्डा– अदालत धाउँदाधाउँदा कति पुस्ता बितिसके । तर, मुद्दा ज्यूूँका त्यूँ छन् । समयमै फैसला नहुने, भएका फैसलामा पनि चित्त नबुझाउने । बरु, उल्टै विभिन्न लाञ्छना लगाउने । अदालत भ्रष्ट बन्यो, विश्वास, आस्था गुमायो नानाथरी । न्यायालय अशुद्ध बन्यो । अब न्यायको मूर्तिलाई कसरी पवित्र पार्ने ?

जुक्ति आखिर फुरिछाड्यो, कायममुकायम प्रधानन्यायाधीश दीपकराज जोशीलाई । अनि, आफैँ वटुकधारण गरेर हातमा श्रीयन्त्र उचाले । चरु होमे । जल, अक्षता छर्किए । अनि, उनले न्यायालयको शुद्ध्याइँ गरे । झट्ट हेर्दा के हो यस्तो भन्ने लाग्न सक्छ । तर, यो त संघीयताको कार्यान्वयन पो रहेछ । गाउँ–गाउँमा सिंहदरबार भनेजस्तै घर–घरमा न्यायालय । किनभने, कोटिहोम गरेपछि अब न्याय पाउने पक्का । फेरि यस्तो कोटिहोम जोकोहीले घरघरमा लगाउन सक्छ । एउटा कुरा ख्याल गरे पुग्छ– अक्षता, जल कसको निधारमा पार्ने भन्ने निशाना भने चुकाउनु हुँदैन । जय होस् ।